Kütləvi aksiyalar davam etdiriləcək
İsa Qəmbər: 3 dekabrda yürüşə gələnlərin sayı əvvəlki aksiyalardan daha artıq olmalıdır

“26 noyabr seçki və siyasi proseslərdə iştirak edən bütün subyektləri sınağa çəkdi”. Çıxışına bu sözlərlə başlayan Müsavat başqanı İsa Qəmbər xalqın növbəti sınaqdan şərəflə çıxdığını bildirdi: “Xalq hakimiyyətin qəddarlığından qorxmayaraq, mübarizəyə davam etməyə hazır olduğunu sübut etdi. 26 noyabr hadisələrinin ən mühüm nəticələri bundan ibarətdir”.

İqtidarın bu sınaqdan sınıq çıxdığını və xalqa aid olmadığını ortaya qoyduğunu əlavə edən Müsavat başqanı rejimin ölkə və beynəlxalq ictimaiyyətdə özünü ifşa etdiyini söylədi: “Demokratik müxalifət isə bu mərhələdən birliyini qoruyaraq çıxa bildi”.

Baş verənlərlə bağlı beynəlxalq birliyin nümayiş etdirdiyi mövqeyə toxunan İ.Qəmbər ABŞ-ın ölkəmizdəki səfirliyinin bəyanatının yerinə düşdüyünü və proseslərə müsbət təsir etdiyini bildirdi. Müsavat başqanı 26 noyabrla bağlı beynəlxalq birliyin reaksiyasının davam etdiyini diqqətə çatdırdı. O, bunu müsbət hal kimi qiymətləndirdi: “Hakimiyyətin simasının ifşa olunmasına baxmayaraq, bəzi dairələrin iqtidara olan ümidləri hələ də qalmaqdadır. Onlar hakimiyyəti proseslərdən kənarda saxlamaq istəyirlər. Məsələn, ABŞ Dövlət Departamentinin sözçüsü bildirib ki, hadisələri törədənlərin içərsindən günahkarlar müəyyənləşdirilib cəzalandırılmalıdır. Seçki saxtakarlıqları zamanı da analoji fikirlər səsləndirilirdi. Azərbaycanda elə sadəlövh insan varmı ki, hesab etsin ki, 26 noyabrda xalqa qarşı zorakılıq nümayiş etdirən qüvvələr bunu hansısa nazirin, polis rəisinin göstərişi ilə həyata keçiriblər? Aydın deyilmi ki, bu cinayətin arxasında İlham Əliyev və Ramiz Mehdiyev dayanır.

Fəaliyyət istiqamətlərimizdən biri beynəlxalq ictimaiyyətlə işimizi davam etdirmək olmalıdır. Qərar qəbul edən mərkəzlərdən fərqli olaraq beynəlxalq ictimaiyyət, Qərb ölkələrinin xalqları hadisələrə prinsipial qiymət verirlər. Birmənalı şəkildə Azərbaycan hakimiyyətini ittiham edirlər. Deməli, biz beynəlxalq təşkilatlarla işləməklə yanaşı Qərbin azad ictimaiyyətinə və mediasına müraciətlərimizi davam etdirməliyik. Öz hakimiyyətlərindən prinsipial mövqe tutmağı tələb etmələri üçün onları fəallaşdırmalıyıq”.

İ.Qəmbər “Azadlıq” bloku, Milli Birlik Hərəkatı və AMİP-in gələcəkdə həyata keçirəcəyi bir çox işlərin olduğunu dedi. Mübarizənin ağırlığının əsasən mitinq komitəsi üzərinə düşdüyünü söyləyən İsa bəy kütləvi aksiyaların davam etdirilməsi barədə qərar qəbul olunduğunu qeyd etdi. O, 3 dekabr aksiyasının hadisələrdən sonra Azərbaycan cəmiyyətinin vəziyyətinə qiymət verilməsi üçün mühüm mərhələ olacağını bildirdi: “3 dekabrda sübut etməliyik ki, cəmiyyətimiz nəinki geri çəkilməyib, əksinə, daha əzmlə, prinsipiallıqla mübarizəni davam etdirmək əzmindədir. Həmin tarixdə yürüşə gələnlərin sayı əvvəlki aksiyalardan daha artıq olmalıdır. 26 noyabrdan sonra cəmiyyətdə yaranan qəzəb dalğasını dinc istiqamətə yönəltməyə çalışmalıyıq”.

İsa bəy bildirdi ki, situasiyanın dəyişməsinin və hakimiyyətin geri çəkilməsinin yolu mitinqlərin möhtəşəmliyinin təmin olunmasından asılıdır: “3 dekabr mitinqində indiyə qədər olandan iki dəfə artıq insan iştirak etməlidir. Bu tamamilə real işdir. Buna gücümüz çatar, yetər ki, bütün təşkilatçılıq işimizi, insanları inandırmaq bacarığımızı ortaya qoyaq. Hamımız bir yerdə əlimizdən gələni etsək, 3 dekabr və ondan sonrakı kütləvi aksiyaların möhtəşəmliyini təmin edə biləcəyik. Dekabrın 10-nu bütün dünya xalqları İnsan Haqları günü kimi qeyd edirlər. Həmin tarixdə Azərbaycanda ən möhtəşəm kütləvi tədbiri keçirə bilərik. Hesab edirəm ki, birliyimizi qorumaq, məsələlərə ayıq gözlə baxmaq və xalqla açıq şəkildə danışmaq şərti ilə mübarizəmizi davam etdirib, qələbəyə nail olacağıq”.

Yeni Müsavat, 01.12.2005