Liderlər növbəti mitinqin vaxtını müəyyənləşdirdi

Konstitusiya Məhkəməsinin anti-konstituion qərarı müzakirə edildi

Azərbaycan Respublikası Konstitusiya Məhkəməsinin seçkilərin nəticələrin təsdiq edilməsi barəsindəki qərarından sonra «Azadlıq», «Yeni Siyasət» blokları və Milli Birlik Hərəkatının liderləri birgə fövqalədə iclas keçirmişlər.
İclasda Konsitutsiya Məhkəməsinin seçkilərin nəticələrin təsdiqi haqqında qərarı müzakirə edilmiş və bununla bağlı bəyanat qəbul edilmişdir.
Liderlər 3 noyabr 2005-ci il tarixdə keçirlməsi nəzərdə tutulan mitinqə aksiyanın təşkilatçıları ilə qanunazidd olaraq razılaşmadan mitinqin yerinin dəyişdirilməsi ilə bağlı Bakı Şəhər İcra Hakimiyyətinin qərarı müzakirə edilmişdir.
Liderlər «Motodrom»un mitinqin keçirilməsi üçün əlverişli olmaması və bu addımın sərbəst toplaşmaq azadlığının məhdudlaşdırılması, ölkədə hakimiyyətin qarşıdurma yaratmaq cəhdi və bu cəhdin yeni repressiya dalğasının başlanmasına rəvac verdiyini nəzərə alıb, ümumrespublika mitinqinin təxirə salınması və 10 dekabr ümumdünya insan hüquqları günündə «Azərbaycanda seçki saxtakarlığına etiraz» və «insan hüquqlarının müdaifəsi» şüarları ilə mitinq keçirilməsi barədə Bakı Şəhər İcra Hakimiyyətinə müraciət edilməsi haqqında qərar vermişlər.

"Azadlıq bloku" bəyanatla çıxış edib

Azərbaycan Respublikası Konstitusiya Məhkəməsi 06 noyabr 2005-ci ildə Azərbaycan Respublikası Milli Məclisinə keçirilmiş seçkilərin nəticələrinin təsdiq olunması ilə əlaqədar qərarı ilə seçkilərin nəticələrinin saxtalaşdırılması prosesini tam başa çatdırdı. MSK-nın seçkilərin yekunları haqqında protokolunun daha mürtəce formada təsdiq edilməsi, seçkilərdə iştirak etmiş namizədələrin, siyasi partiya bloklarının və siyasi partiyaların şikayətlərinin araşdırılmaması, müxalifətdən olan və seçkilərdə qalib gəlmiş «Azadlıq bloku»nun namizədləri Əli Kərimlinin və Qulamhüseyn Əlibəylinin dairələrində seçkinin nəticələrinin ləğv edilməsi bir daha təsdiq edir son seçkilər zamanı baş verən hadisələrlə Azərbaycanda demokratiyadan imtina edib. Konstitusiya Məhkəməsinin qərarı ölkədə müstəqil məhkəmə hakimiyyətinin olmadığını, seçkilərin saxtalaşdırılması sifarişinin şəxsən dövlət başçısı İ.Əliyev tərəfindən verildiyini və onun seçkidən əvvəl verdiyi sərəncamlarının xalqı və dünya ictimaiyyətini aldatmaq məqsədi güddüyünü bir daha təsdiq etdi.

«Azadlıq bloku» təəsüflə qeyd edir ki, Konstitusiya Məhkəməsi Azərbaycan Respublikasının Konstitusiyasının və seçki qanunvericiliyinin pozulması ilə əlaqədar çoxsaylı faktlara heç bir hüquqi qiymət verməməklə vətəndaşlarımızın demokratik və ədalətli seçkilərə olan son ümidini də puç etməklə ölkədəki ictimai-siyasi vəziyyətin daha da gərginləşməsinə şərait yaratmışdır.

«Azadlıq bloku» hesab edir ki, Konstitusiya Məhkəməsi parlament seçkilərinin nəticələrinin təsdiq edilməsi haqqındakı 01.12.2005-ci il tarixli qərarı ilə Konstitusiyanın 130-cu maddəsinin tələblərini pozmuş, habelə Konstitusiyanın 24, 54, 55, 56, 57, 60, 71-ci maddələrində vətəndaşların nəzərdə tutulmuş hüquqları tapdalanmış, xalqın siyasi iradəsinin və Konstitusiyanın əleyhinə dövləti cinayət baş vermişdir.

«Azadlıq bloku» Azərbaycan xalqını Konstitusiyanı müdafiə etməyə, xalqın iradəsini zorlayan indiki recimə qarşı ardıcıl mübarizə aparmağa çağırır və bir daha bəyan edir ki, demokratiya və azadlıq uğrunda mübarizə tam və qəti qələbəyədək davam etdiriləcəkdir.

"Azadlıq" bloku mətbuat xidməti, 02 dekabr 2005-ci il