Amerikadan seçki saxtakarlığına daha bir etiraz

Avropada Təhlükəsizlik və Əməkdaşlıq Komissiyası bəyanat verdi

Birləşmiş Ştatların Avropada Təhlükəsizlik və Əməkdaşlıq Komissiyası-Helsinki Komissiyası Azərbaycanda parlament seçkisinin nəticələrinə dair bəyanat yayıb (“Azadlıq” radiosu). Qurumun Beynəlxalq Siyasət üzrə direktoru Ronald McNamara deyib ki, hakimiyyət tərəfindən atılmış bir sıra addımlara, İlham Əliyevin iki sərəncamına baxmayaraq, onlar tam yerinə yetirilməyib. O, Beynəlxalq Müşahidə Missiyasının seçkinin nəticələrinə dair noyabrın 7-də yaydığı ilkin hesabatına istinad edib: “Həmin hesabata görə, 6 noyabr parlament seçkisi ATƏT öhdəliklərinin və Avropa Şurası standartlarının çoxuna uyğun gəlməyib”.

Ronald McNamara seçki günü Bakıda hər yerdə adları seçici siyahısında olmayan vətəndaşlarla üzləşdiyini deyib: “Kimsə deyirdi ki, məsələ səs verməkdə deyil, səsləri kimin saymasındadır. Təəssüf ki, noyabrın 6-da mənim gördüyüm seçki rəsmiləri Azərbaycanın bundan əvvəlki saxta seçkilərini idarə edənlər idi”.

McNamara bildirir ki, məntəqələr bağlanan kimi, o, seçki komissiyası üzvlərinin boş bülletenləri bir otağa apardığını görüb, yerli müşahidəçilər buna etiraz edib, o da iradını bildirəndən sonra səssayma davam edib.

“Nəticədə, 21 nəfər arasından müsteqil bir namizəd həmin məntəqədə qalib çıxdı. Sonradan ise 9 saylı Binəqədi dairəsində seçkinin nəticələri ləğv olundu, bir sıra dairələrdə də belə olmuşdu” deyə, o vurğulayıb.

Helsinki Komissiyasının sədri Sem Braunbek də dərin təəssüfünü bildirib: “Biz ümid edirik ki, bu seçki Azərbaycanda demokratiyaya doğru ilk addım olacaq, ancaq seçkini keçirən hakimiyyət bu sınaqdan çıxmadı”.

Helsinki Komissiyası seçkidən sonra polisin müxalifətin yürüş-mitinqini dağıtdığına da toxunur: “Aydındır ki, Azərbaycan rəhbərliyi qonşu Gürcüstan və Ukraynada olduğu kimi rəngli inqilabın baş verməsini istəmir”.

Tuncay

Yeni Müsavat qəzeti, 02 dekabr 2005-ci il