İsa Qəmbər: “Haqqımız uğrunda dinc mübarizə aparacağıq”
“Azadlıq” blokunun həmtəsisçisi və 20 saylı Nərimanov ikinci seçki dairəsindən deputatlığa vahid namizədi, Müsavat başqanı İsa Qəmbər dünən Az.TV-də namizədlər üçün ayrılmış ödənişsiz efir vaxtında çıxış etdi. Çıxışın tam mətnini təqdim edirik:
Hörmətli tamaşaçılar, mənim əziz bacılarım və qardaşlarım!
Seçki ərəfəsində Azərbaycan Dövlət Televiziyasında son dörd dəqiqəlik çıxışdan istifadə edərək sizləri bir daha salamlayıram.
Gördüyünüz kimi, bu dörd dəqiqələr ərzində biz istədiyimizin mində birini də sizə çatdıra bilmədik. Ancaq əvəzində hakimiyyət bu zamandan gen-bol istifadə edir. Bayaq məndən əvvəl İlham Əliyev yarım saat təbliğat apardı - halbuki ali icra hakimiyyətinin rəhbəri kimi onun belə bir təbliğat aparmağa ixtiyarı yoxdur. Bizim əleyhimizə danışdı, xeyli yalanlar söylədi. Bu yalanların nə mənası var? Axı xalq gözəl bilir ki, 2003-cü ilin prezident seçkilərində kim qalib gəlib. Elə bilirsiniz, xalq bunu unudub? Yaxud bu “çevriliş”lər barədə nağıllar kimə lazımdı? Bu nazirləri Heydər Əliyev təyin etməmişdimi? Deyirsiniz ki, onlar Qurana and içmişdilər. Guya indi işdən çıxarmadığınız, həbs etmədiyiniz nazirlər Qurana and içmirlər? Hamınız eyni şəkildə bu xalqa zidd fəaliyyət göstərirsiniz, bu xalqa öz problemlərini həll etməyə, inkişaf etməyə imkan vermirsiniz. Ona görə xalq sizin əleyhinizədir.
Biz “Azadlıq” bloku olaraq Azərbaycanımızı qarış-qarış gəzdik. Böyüklü-kiçikli onlarla görüşlər keçirdik. Və xalqın, seçicilərin böyük əksəriyyətinin “Azadlıq” blokuna səs vermək niyyətində olduğunu gördük. Seçicilər də deyirlər ki, biz “Azadlıq” blokuna səs verəcəyik. Yeri gəlmişkən, seçicilərə bildirmək istəyirəm ki, seçki günü məntəqələrdə bülletenləri alanda hər bir bülletendə “Azadlıq” blokunun emblemini görəcəklər. Hansı namizədin adı qarşısında “Azadlıq” sözü yazılıbsa, həmin emblem varsa, ona səs verməklə siz arzunuza, niyyətinizə çata biləcəksiniz.
Bütün xalq eyni niyyətləri daşıyır. Hamımız bir yerdə Qarabağımızın işğaldan azad olunmasını, korrupsiyanın, rüşvətxorluğun, işsizliyin aradan qalxmasını istəyirik. Milyonlarla soydaşımızın vətənə dönməsini, ölkəmizin inkişafını, maaşların artırılmasını arzulayırıq. Hamı bunu istəyir və bunu etmək üçün inşaallah, noyabrın 6-da hər birimiz seçki məntəqələrinə gəlib, “Azadlıq” blokuna səs verəcəyik, bu arzumuzu reallaşdırmağa çalışacağıq.
Onu da deyim ki, “Azadlıq” bloku noyabrın 6-da saxtakarlıqların qarşısını almaq üçün güclü müşahidə sistemi təşkil edəcək. Noyabrın 7-də biz protokolları əldə etdikdən sonra onları ümumiləşdirməyə, hesablamağa çalışacağıq, təhlil aparacağıq ki, hakimiyyət öz saxtakarlıq niyyətinə nə dərəcədə nail olub, olmayıb. Yalnız bundan sonra biz öz dinc, kütləvi tədbirlərimizə başlamaq niyyətindəyik.
Yəqin artıq eşitmisiniz ki, noyabrın 8-də saat 15-dən 18-dək “Qələbə” kinoteatrının qarşısında yürüş-mitinq keçirəcəyik. Eyni qaydada 9-10 noyabrda da mitinqlər keçirmək fikrindəyik. Bunlar müstəsna olaraq dinc xarakterli tədbirlər olacaq. Biz “Qələbə” kinoteatrını da ona görə seçmişik ki, hakimiyyət zorakılıq etmək üçün bəhanə əldə edə, qarışıqlıq sala bilməsin. Onu da bilirik ki, hakimiyyətin təxribat planları var. İnanıram ki, “Azadlıq” blokunu təmsil edən partiyaların üzvləri, tərəfdarları - sizlər hakimiyyətin təxribatlarına baş qoşmayacaqsınız. Müxtəlif təxribat üsulları olacaq. Heç bir təxribata baş qoşmaq olmaz. Yalnız dinc şəkildə, qanun, Konstitusiya çərçivəsində proseslərdə iştirak etmək, səs vermək, haqqımızı müdafiə etmək lazımdır. Bu gün - müqəddəs Ramazan günü mən hamınızı bir daha bayram münasibətilə təbrik edirəm. Doğrudan da, Allahın bir lütfüdür ki, mənim Az.TV-də seçki ərəfəsində son çıxışım bu günə təsadüf edir. Bu, bəlkə də təsadüf deyil. Sabah İctimai Televiziyada sizə müraciət etmək imkanım olacaq. Hələliksə sağ olun. Tanrı Azərbaycanımızı qorusun.
Yeni Müsavat, 04.11.2005, Səhifəni hazırladı: Ülkər ƏLİYEVA