"NAMİZƏDLİYİNİZİ "AZADLIQ" BLOKU NAMİZƏDLƏRİNİN XEYRİNƏ GERİ GÖTÜRÜN"
Oktyabrın 14-də Müsavat Partiyasının başqanı, "Azadlıq" blokunun 20 saylı Nərimanov ikinci seçki dairəsindən deputatlığa vahid namizədi İsa Qəmbər Az.TV-də ödənişli efir vaxtında çıxış etdi. Çıxışın mətnini təqdim edirik:
Axşamınız xeyir, hörmətli tamaşaçılar, hörmətli seçicilər, mənim əziz qardaşlarım və bacılarım!
Bu gün mən də qərara gəldim ki, məhdud imkanlarımızdan istifadə edib ödənişli efir vaxtı alaq və 4 dəqiqə yox, 8 dəqiqə sizinlə rahat söhbət edə bilək. Bir aya yaxındır ki, siz televiziyada çıxışları izləyirsiniz. Artıq yüzlərlə namizəd sizin qarşınızdan keçib. Bəlkə də artıq yorulmağa başlamısınız ki, bu adamlar bir-biriləriylə mübahisə edirlər, bir-birilərini təkzib edirlər, bəzən bir-birilərini təkrar edirlər, bəzən maraqsız danışırlar. Təbii ki, müəyyən bir yorğunluq ola bilər. Ancaq qətiyyən yorulmayın. Sona qədər hamıya diqqətlə qulaq asın. Hansı partiyanı təmsil etməsindən olmasından, bitərəf, yaxud tərəfli olmasından asılı olmayaraq, hamıya diqqətlə qulaq asın və qiymət verin: kim həqiqəti söyləyir, kim yalan danışır?
Bizi - "Azadlıq" blokunun namizədlərini, liderlərini də bəzən yalan danışmaqda ittiham edirlər. Mən istəyirəm qısaca xatırladım ki, biz nə deyirik və baxaq görək, mənim dediklərimin qarşısına kim nə söz çıxara bilir?
Mən deyirəm ki, Azərbaycanımızın torpaqlarının böyük bir hissəsi məhz Heydər Əliyevin dövründə işğal olunub.
Mən deyirəm ki, atəşkəs dövründə - 11 illik müddətdə torpaqlarımızın azad olunması istiqamətində heç bir real addım atılmayıb. Torpaqlarımızın azadlığına bir addım da yaxınlaşmamışıq. Hakimiyyət özü də bunu etiraf etdi ki, vəziyyət sıfır nöqtəsindədir.
Mən deyirəm ki, yüzminlərlə qaçqınlarımız, köçkünlərimiz ağır vəziyyətdə yaşayırlar və onlara istər dövlət büdcəsindən ayrılan, istərsə də xaricdən gələn yardımların böyük bir hissəsini rüşvətxor məmurlar mənimsəyirlər.
Mən deyirəm ki, 2-3 milyona yaxın vətəndaşıma işsizlik ucbatından ölkəni tərk etməyə məcbur olub, Rusiyada, Ukraynada, başqa ölkələrdə ağır şəraitdə çalışmaq məcburiyyətindədirlər.
Mən deyirəm ki, buna baxmayaraq, yenə də ölkəmizdə böyük işsizlik var.
Mən deyirəm ki, ölkədə işləyənlər də çox aşağı maaş alırlar və bu maaşla yaşamaq, ailə saxlamaq mümkün olan məsələ deyil. Yeri gəlmişkən, mən deyəndə ki, İlham Əliyevin maaşı 20 min dollar ətrafındadır, bəziləri mübahisə edirlər ki, nə vaxtsa fərman verib, nəyisə dəyişib. Mən bilmirəm. Mən qanuna baxıram. Kimin evində var, elə bu dəqiqə açsın, Seçki Məcəlləsinin 209-cu maddəsinin ikinci bəndinə baxsın - orada İlham Əliyevin maaşının məbləği göstərib. Mən hesab edirəm ki, müəllim 20-30 dollar məvacib aldığı bir vaxtda dövlət başçısının 20 min dollar maaş almağa haqqı yoxdur. Əgər bu maaş ona çox görünürsə, Seçki Məcəlləsini dəyişdirsinlər, normal hala gətirsinlər. Biz də inanaq ki, doğrudan da bu adam öz maaşının çox olduğunu dərk edib, bunun fərqindədir.
Mən deyirəm ki, ölkədə rüşvətxorluq, korrupsiya baş alıb gedir.
Mən deyirəm ki, ölkədə dərəbəylik, qanunsuzluq baş alıb gedir.
Mən deyirəm ki, bu ölkənin parlamenti müstəqil bir hakimiyyət qolu kimi fəaliyyət göstərmir, Prezident Aparatından gələn qanunların təsdiqi üçün notarial kontor kimi çalışır, müstəqilliyini itirmiş bir qurumdur.
Mən deyirəm ki, ölkədə müstəqil məhkəmələr yoxdur. Bu məhkəmələr siyasi məsələ olanda hakimiyyətin, Ramiz Mehdiyevin, Prezident Aparatının sifarişiylə, siyasi məsələ olmayanda isə rüşvətlə işləyir, kim çox pul versə, onun xeyrinə qərar çıxarır.
Bu sözləri mən deyirəm. Bununla bağlı kimin mənimlə diskussiya aparmaq fikri varsa, İlham Əliyev, Ramiz Mehdiyev, Əli Əhmədov - kim istəyir, gəlsin, oturaq, burada üz-üzə söhbət edək və xalq da görsün, kim yalan danışır, kim doğru? Mənim dediklərim faktlardır, bunları təkzib etmək mümkün deyil. Hələ çox şeyləri də demək lazımdır və yeri gələndə deyəcəyik.
Eyni zamanda biz vədlər veririk. Çünki biz müxalifətdəyik. Biz deyirik ki, hakimiyyətə gəlsək, filan addımları atacağıq. Biz deyirik ki, hakimiyyətin vəd verməyə ixtiyarı yoxdur. Çünki bu rejim 12 ildir hakimiyyətdədir və bunlar vəd yox, hesabat verməlidirlər. Bizim arxamızca danışmaqla məşğul olmamalıdırlar. Müxalifəti tənqid etmək hakimiyyətin fəaliyyət sahəsi, səlahiyyəti deyil. Onlar xalqa gördükləri işlərlə bağlı hesabat verməlidirlər.
Buna görə də mən hesab edirəm ki, bizim vədlərimiz diqqət mərkəzində olmalıdır. Bunu da sınamağa sizin imkanınız olacaq. Bizə inanmaq, ya inanmamaq sizin işinizdir, hörmətli seçici, əziz bacım, əziz qardaşım. Mən vəd verirəm, başqa namizədlər sözlər verirlər. Siz qiymət verməlisiniz ki, biz bunları həyata keçirə bilərik, yoxsa yox.
Mən sizə deyirəm ki, biz hakimiyyətə gələndə Azərbaycanın neft gəlirlərindən hər bir ailəyə ildə bir milyon manat pul ayıracağıq. Biz bunu edəcəyik. Buna heç kimin şübhəsi olmasın.
Mən deyirəm ki, biz hakimiyyətə gələndə maaşları yüksəldəcəyik. Həkimlərin, müəllimlərin, polislərin, ordu zabitlərinin, büdcə təşkilatlarında çalışan digər vətəndaşlarımızın, qardaşlarımızın, bacılarımızın maaşlarını ayda aşağısı 400-500 dollara qədər artıracağıq.
Mən deyirəm ki, pensiyaçıların təqaüdlərini ayda 100 dollara qədər artıracağıq.
Mən deyirəm ki, tələbələrin təqaüdlərini artıracağıq.
Mən deyirəm ki, biz hakimiyyətə gələndə pullu təhsil müəssisələrində təhsil alan övladlarının problemlərini həll etmək üçün ailələrə, yaxud həmin tələbələrin özlərinə dövlət səviyyəsində kreditlər ayrılacaq.
Biz bir sıra başqa məsələləri vəd edirik və əminik ki, hakimiyyətə gələndə bunu edəcəyik.
Qısa vaxtdan istifadə edib, bir məsələyə toxunmaq istəyirəm. Bilirsiniz ki, ayın 17-də saat 16-da Rəsul Quliyev Azərbaycana, vətənə dönür. Hakimiyyət çaşqınlıq içindədir. Hərəsi bir söz deyir. Biri deyir ki, Rəsul Quliyevin gəlməsi ancaq ADP-nin qərarıdır, bunun başqa partiyalara aidiyyatı yoxdur. O birisi deyir ki, İsa Qəmbər və Əli Kərimli Rəsul Quliyevi tələyə salmaq istəyirlər. Özləri də bilmirlər, nə danışırlar. Əvvəla, Rəsul Quliyevin dönməsi təkcə onun, təkcə ADP-nin qərarı deyil. Bu, "Azadlıq" blokunun qərarıdır, Müsavatın, Cəbhənin, eyni zamanda Milli Komitənin, cəmiyyətin böyük bir hissəsinin qərarıdır. Bu qərar da Rəsul Quliyevin qərarıyla tamamlanıb, inşallah, ayın 17-də gerçəkləşəcək. Mən bütün müsavatçıları, ölkədə demokratik dəyişikliklər etmək istəyənləri ayın 17-də Rəsul Quliyevin dinc qarşılanma mərasimində iştirak etməyə çağırıram. Heç bir provokasiyaya, təxribata getmədən, hakimiyyətin təxribatlarına baş qoşmadan sakit şəkildə qarşılama mərasimində iştirak etməyə çağırıram. Hesab edirəm ki, Rəsul Quliyevin dönməsilə ölkədə demokratik proseslər xeyli sürətlənəcək.
Mən fürsətdən istifadə edib YAP-çı bacılarıma və qardaşlarıma da bir neçə kəlmə söz demək istəyirəm. Hazırda namizədlərin sırasında səhv etmirəmsə, 525 YAP-çı deputatlığa namizəd var. Təxminən bu ayın axırında İlham Əliyevlə Ramiz Mehdiyev YAP-çı namizədlərin sayını 525-dən 75-ə endirmək əməliyyatını həyata keçirəcəklər. Təxminən 450 YAP-çı namizəd sıradan çıxarılacaq. Onlara təzyiqlər ediləcək, hədə-qorxu gəlinəcək, deyiləcək ki, siz bizim hesabımıza vəzifə almısınız, varlanmısınız, sərvət toplamısınız, bütün bu sərvətlərinizi itirə bilərsiniz və buna görə də bizim sözümüzə tabe olub, namizədlikdən çəkinməlisiniz. Ona görə də mən həmin YAP-çı qardaşlarıma və bacılarıma müraciət edib deyirəm ki, ya indidən "Azadlıq" blokunun namizədlərinin, Vətənin həqiqi oğlanlarının, qızlarının xeyrinə namizədliyinizi geri götürün, şərait yaradın ki, vəziyyət aydınlaşsın, ya da bunu edə bilməyəcəksinizsə, bilin ki, sonradan Ramiz Mehdiyevin hədə-qorxusuyla namizədlikdən çəkinsəniz, bütün xalq biləcək ki, bu nə oyundur və bu oyun necə baş verdi. Xahiş edirəm, indidən fikirləşin və qərarınızı verin.
Nəhayət, öz namizədliyimi irəli sürdüyüm dairənin seçicilərinə də salamlarımı, hörmətlərimi bir daha çatdırmaq istəyirəm. Mən Nərimanov rayonunun 20-ci dairəsindən namizədəm. Artıq görüşlərə başlamışam və növbəti görüşüm də bu bazar günü, saat 17:30-da Atatürk prospekti 37 və 37A saylı binaların həyətində olacaq. Tanımayanlar "Solmaz" şadlıq evini soruşa bilərlər. Orada görüş keçirəcəyik. Mən 20-ci dairənin seçicilərini həmin görüşə dəvət edirəm. Görüşək, bir daha dərdlərimizi müzakirə edək. Mən bütün ölkənin mənafeyini təmsil etməyə hazırlaşdığım kimi, dairəmin seçicilərinin də maraqlarını təmsil edəcəyəm.
Tanrı sizləri qorusun!
Tanrı Azərbaycanımızı qorusun!
Hazırladı: Ülkər ƏLİYEVA, Yeni Müsavat qəzeti, Bakı, 15.10.2005
P.S. Aldığımız məlumata görə, İsa Qəmbərin çıxışı zamanı Bakının bəzi hissələrində işıqlar söndürülüb. Konkret olaraq Maştağa qəsəbəsində və İsa Qəmbərin namizəd olduğu 20 saylı Nərimanov ikinci seçki dairəsinin ərazisinə daxil olan bəzi yaşayış massivlərində elektrik enerjisi kəsilib.