“AZADLIQ” BLOKU DEKABRIN 18-NƏ MİTİNQ TƏYİN ETDİ

Bu barədə meriyaya xəbərdarlıq məktubu göndərildi

Birləşmiş müxalifət növbəti aksiyasının vaxtını dəqiqləşdirib. Belə ki, dekabrın 18-də “Azadlıq” blokunun təşkilatçılığı ilə “20 Yanvar” - “Qələbə” marşrutuyla yürüş-mitinq keçiriləcək. Aksiyanın üç saat 15:00-dan 18:00-a kimi keçirilməsi nəzərdə tutulub. Mitinqlə bağlı artıq Bakı Şəhər İcra Hakimiyyətinə xəbərdarlıq məktubu da göndərilib.

Yürüş-mitinqdə parlament seçkilərində saxtakarlığa yol verən komissiya üzvlərinin cəzalandırılması, yeni parlament seçkilərinin keçirilməsi və digər tələblərin səsləndirilməsi nəzərdə tutulur.

Müsavat Partiyası mitinq komitəsinin üzvü Qabil Hüseynli meriyanın bu dəfə qanunlara hörmətlə yanaşacığına ümid etdiyini söylədi. O, ötən aksiyalarda olduğu kimi, Milli Birlik Hərəkatı və AMİP mitinqinə dəstək verəcəklərini dedi.

Q.Hüseynli aksiyada narıncı atributlardan geniş istifadə olunmasının nəzərdə tutulduğunu vurğuladı. Qeyd etdi ki, budəfəki mitinqdə gənclərin fəaliyyəti önə çəkiləcək: “Son günlər gənclərə qarşı təzyiqlər artıb. Hakimiyyətin bu repressiyalarına cavab olaraq, gənclər aksiyada ayrıca kolonla iştirak edəcəklər”.

AXCP mitinq komitəsinin sədri Həsən Kərimov “Azadlıq” blokunun kütləvi aksiyalara fasilə vermək niyyətində olmadığını bildirdi: “Hakimiyyət son iki mitinqə icazə verməməklə mitinqlərin qarşısını almaq məqsədi güdür, lakin buna nail ola bilməyəcək”. Aksiyaya qərar verildiyi gündən təşkilati strukturlarda hazırlıqlara başlanıldığını vurğulayan H.Kərimov həftə ərzində rayon təşkilatlarında genişləndirilmiş müşavirələr keçiriləcəyini bildirdi.

“Bakı Şəhər İcra Hakimiyyəti 3 və 10 dekabr aksiyaları ilə bağlı mövqeyini yenə də nümayiş etdirərsə, atılacaq addımlar nədən ibarət olacaq” sualına cavabında H.Kərimov sitasiyaya uyğun hərəkət edəcəklərini bildirdi: “Məsələ blokun Sədrlər Şurasında müzakirə edildikdən sonra qərar veriləcək. Lakin bu dəfə razılaşdırılmamış aksiyalara başlamaq qərarı gündəmə gələ bilər. Tərəfdarlarımız da bunu tələb edirlər”.

LEYLA, Yeni Müsavat, 14.12.2005