"HAMINIZI RƏSUL QULİYEVİ QARŞILAMAĞA DƏVƏT EDİRƏM"
Müsavat Partiyasının başqanı, "Azadlıq" blokunun həmtəsisçisi və 20 saylı Nərimanov ikinci seçki dairəsindən deputatlığa namizədi İsa Qəmbər dünən Az.TV-də ödənişli efir vaxtında növbəti çıxışını etdi. Çıxışın mətnini təqdim edirik.
Axşamınız xeyir, hörmətli televiziya tamaşaçıları, hörmətli seçicilər.
Bir daha sizi "Azadlıq" blokunun və Müsavat Partiyasının adından salamlayıram. İcazə versəniz, namizədi olduğum 20 saylı Nərimanov seçki dairəsinin seçicilərinə bir neçə kəlmə söz demək istəyirəm.
Mənim əziz bacılarım və qardaşlarım. Hamınızı salamlayıram. Mən 20-ci dairədən namizədliyimi ona görə vermişəm ki, 23 ildir həmin dairənin ərazisində yaşayıram. Bu dairə mənim üçün doğmadır, əzizdir. Bu dairənin bütün problemlərindən xəbərdaram və mənə etimad göstərəcəyiniz təqdirdə Azərbaycanımızın bütün problemlərini həll etməyə çalışacağım kimi, təbii ki, 20-ci dairənin də problemlərini, o cümlədən sizin hər birinizin dərdini öz dərdim, problemim kimi qəbul edəcəm, sizə kömək etməyə çalışacam. Yeri gəlmişkən, sabah Atatürk prospekti 37 və 37A saylı binaların həyətində növbəti görüşüm keçiriləcək. Axtaranlar və görüş yerinə yaxşı bələd olmayanlar "Solmaz" şadlıq evini soruşsunlar. Yığışaq, söhbətləşək, dərdlərimizdən, problemlərimizdən danışaq. Hamınızı həmin görüşə dəvət edirəm.
Ancaq özünüz də bilirsiniz ki, ölkəmizin, xalqımızın problemləri ümumidir. Yəni bunlar bir dairənin, bir rayonun problemləri deyil. Əgər dünənki teleçıxışıma baxdınızsa, mən əsas problemləri sadaladım və izah etdim ki, onların əksəriyyəti Əliyev rejiminin fəaliyyəti, yaxud fəaliyyətsizliyi nəticəsində baş verir, böyüyür, həll olunmur. Bu rejimin səriştəsizliyi, bacarıqsızlığı, rüşvətxorluğu, korrupsiyaya qurşanması, dərəbəyliyi, insanlara hörmət etməməsi, sayğı göstərməməsi nəticəsində bu problemlər bu həddə gəlib çıxıb. Özünüz də gördünüz ki, məndən sonra çıxış edən hakimiyyət nümayəndələri gətirdiyim faktların, söylədiyim arqumentlərin qarşısında heç bir söz deyə bilmədilər. Ümumi sözlər danışdılar. Gücləri ona çatdı, sağ olsunlar.
Bu günsə problemlərin həlliylə bağlı hakimiyyətin nə etməyə hazırlaşdığını sizə demək istəyirəm. Gələn ilin büdcə layihəsi parlamentdə müzakirə olunmağa başlayıb. Gələn ilin büdcəsi bu illə müqayisədə 1,5 milyard dollar artırılır. Bu, yaxşı haldır və əslinə qalsa, daha çox artmalıdır. Ancaq bu 1,5 milyard dollar artım müxtəlif sahələr arasında nə cür bölünür? Mən sizə deyim. Artımın 33 faizi tikinti xərclərinə, 21 faizi müdafiə xərclərinə, 20 faizi ümumdövlət xidməti xərclərinə veriləcək. Ümumdövlət xidməti də polis, hüquq-mühafizə orqanları və digər sahələri əhatə edir. Çox gözəl, bu sahələrə də pul ayırmaq lazımdır. Ancaq təhsilə bu artımdan nə qədər ayrılacaq? Artımın cəmi 7,3 faizi təhsilə, 7,1 faizi sosial problemlərə və cəmi 2,2 faizi səhiyyə sahəsinə ayrılacaq. Bu ayırmalarla səhiyyədə, təhsildə, sosial sahədəki problemləri həll etmək mümkündürmü? Bu, hakimiyyətin yalançılığını göstərmirmi? Bu şəkildə ölkəni idarə, problemləri həll etmək mümkündürmü? Bu gün bizə qəribə bir xəbər də gəldi. Bəlkə də təəccüblənəcəksiniz, amma Çevik Polis Alayının nümayəndələri bizə müraciət etdilər. Dedilər ki, deyirsiniz, bizim maaşımızı 6 dəfə artırıblar, bu düzgündür, ancaq xəbəriniz olsun ki, maaşımızı bugünə qədər verməyiblər. Bu kişilərin maaşını artırmısınız, heç olmasa, verin də. Bu hakimiyyətin yalançılığı elə həddə gəlib çatıb ki, bunların heç bir sözünə inanmaq mümkün deyil.
Bilirsiniz ki, mən dünənki çıxışımda bütün müsavatçıları və demokratik fikirli, vətənpərvər insanları oktyabrın 17-də saat 16:00-da Azərbaycan Demokrat Partiyasının lideri Rəsul Quliyevi qarşılama mərasiminə dəvət etmişəm. İnanıram ki, dinc qarşılanma mərasimində onminlərlə insan iştirak edəcək. Bizə belə məlumatlar gəlir ki, doğrudan da çox böyük insan kütlələri bu qarşılama mərasimində dinc şəkildə iştirak etmək niyyətindədirlər. Mən çağırışımı yenə də təkrar edirəm. Eyni zamanda hakimiyyət nümayəndələrinə müraciət etmək istəyirəm ki, növbəti yanlışlığa yol verməsinlər, daha bir gərginliyin yaranmasına çalışmasınlar. İmkan versinlər ki, Rəsul Quliyev vətənə dönsün, bu Vətənin övladı, vətəndaşı kimi burada yaşaya, parlament seçkilərində normal şəkildə iştirak edə bilsin. Əgər ona aid bir sualınız, sözünüz varsa, istintaqınızı apara bilərsiniz. Həbsdə olduğumuz və olmadığımız müddətlərdə bizim hamımızla bağlı nə qədər istintaq aparmısınız. Bunu bu şəkildə də həll etmək mümkündür.
Biz problemlərimizi bir yerdə həll edə bilərik. Çünki biz bir olanda hər şeyi həll etmək olur. Bilirsiniz ki, "Azadlıq" bloku ölkənin üç aparıcı siyasi qüvvəsini bir araya gətirib. Ancaq bu, məsələnin sonu deyil. Bugünlərdə biz Liberal Partiyasının və Milli Birlik Hərəkatının lideri Lalə Şövkətlə də saziş imzaladıq. Bu gün biz bir yerdəyik, bir yerdə prosesi aparacağıq, mübarizəmizi davam etdirəcəyik.
Eyni zamanda bilirsiniz ki, biz "YeS" blokuyla da danışıqlar aparırdıq. Onlara rəsmən bir saziş layihəsi göndərmişdik. Onlar bunu bir qədər dəyişib, başqa bəndlərlə başqa bir saziş layihəsini rəsmən bizə göndərdilər. Bu layihələrdə müəyyən fərqlər var idi. Ancaq bu gün "Azadlıq" blokunun liderləri olaraq biz bir daha iclas keçirdik. "YeS" blokunun göndərdiyi saziş layihəsini araşdırdıq. Qərarımız bundan ibarətdir ki, həmin layihəni nöqtəsinə, vergülünə toxunmadan qəbul edirik və günü sabah sazişi imzalamağa hazırıq! Elə buradan da "YeS"də olan dostlarımıza, həmkarlarımıza, qardaşlarımıza xəbər göndəririk ki, sabah bu sazişi imzalamağa hazırıq. Bu birlik prosesi davam edəcək. Biz bütün Azərbaycanı birləşdirəcəyik. Hətta YAP-çı qardaş-bacılarımızı da birləşdirəcəyik.
Tanrı Azərbaycanımızı qorusun.
Hazırladı: Ülkər Əliyeva, Yeni Müsavat, 15.10.2005