Müxalifət icazəsiz aksiya keçirə bilər

Sərdar Cəlaloğlu: “Meriya istədiyimiz yeri ayırmasa, “28 May” meydanında icazəsiz aksiya keçirəcəyik”

BAKI. «Azadlıq» bloku, Milli Birlik Hərəkatı və Milli İstiqlal Partiyası bazar günü keçmiş «Qələbə» kinoteatrının qarşısında təyin etdikləri aksiyaya Bakı şəhər İcra Hakimiyyəti tərəfindən müsbət cavab verilməyəcəyi halda razılaşdırılmamış aksiya keçirəcək.

Bu barədə APA-ya məlumat verən ADP sədrinin birinci müavini Sərdar Cəlaloğlu bildirib ki, onlar aksiya keçirəcəkləri yeri də müəyyənləşdiriblər. Şəhər rəhbərliyi aksiyanın «20 Yanvar» metrostansiyası – keçmiş «Qələbə» kinoteatrı marşrutu ilə yox, yenə də «Motodrom»da keçirilməsini məsləhət görsə, aksiya şəhərin mərkəzində olacaq. Parlament seçkilərinə kimi şəhərin mərkəzində dəfələrlə razılaşdırılmamış aksiyalar keçirdiklərini xatırladan S. Cəlaloğlu bildirib ki, bu dəfə də aksiya “28 May” meydanında keçiriləcək: «Amma biz Bakı şəhər İcra Hakimiyyətinin qanunun tələbinə uyğun olaraq vətəndaşların sərbəst toplaşmaq hüququnu pozmayacağına ümid edirik».

APA, 15.12.2005