”Azadlıq ” blokunun dekabrın 18-də “20 Yanvar-Qələbə” marşrutu üzrə mitinq keçirmək üçün müraciət etmişdi

”Azadlıq ” blokunun dekabrın 18-də “20 Yanvar-Qələbə” marşrutu üzrə mitinq keçirməklə bağlı dekabrın 2-də Bakı şəhər İcra Hakimiyyətinə ünvanladığı müraciətə bu gün cavab verilib. Cavab məktubunda müxalifətin aksiyanı yenə də Biləcəri qəsəbəsində yerləşən Könüllü Hərbi-Vətənpərvərlik və Texniki İdman Cəmiyyətinin stadionunda keçirməsi (Motodrom) məqsədəuyğun hesab edilib.

Bakı şəhər İcra Hakimiyyəti həmin cavab məktubunda 26 noyabr 2005-ci ildə “Qələbə” meydanında müxalifətin keçirdiyi mitinq zamanı güc strukturları tərəfindən törədilmiş zorakılıq və insanlara zor tətbiq edilməsinin günahını müxalifətin üzərinə yıxmağa cəhd edib. Belə ki, guya mitinq iştirakçıları həmin gün qanunsuz hərəkətlərə yol vermiş, zorakılığa və kütləvi itaətsizliyə çağırışlar səsləndirmiş, eləcə də daxili işlər orqanlarının əməkdaşlarına zorakı müqavimət göstərmiş, xidməti vəzifələrini yerinə yetirən polis və daxili qüvvələrin əməkdaşları müxtəlif dərəcəli bədən xəsarəti almışlar. Bakı şəhər İH-nin məktubundakı bu sitatlar Bakı şəhər prokuroru Ədalət Mirsalamlı və Bakı şəhər baş polis idarəsinin rəisi Məhərrəm Əliyevin məktublarına istinadən tərtib edilib. Cavab məktubunda göstərilənlərin nə dərəcədə qanunauyğun olub-olmaması ilə bağlı hüquq müdafiəçisi Səfdər Nəhmətliyə müraciət etdik. S. Nəhmətli dedi ki, Bakı şəhər İH bilməmiş deyil ki, 26 noyabr hadisələri ilə bağlı Respublika prokurorluğu cinayət işi başlayıb və təhqiqat aparılır. Belə olan halda şəhər prokuroru və paytaxtın baş polisinin hadisələrə birtərəfli mövqedən yanaşması və İcra hakimiyyətinin də bu yanlış mövqeyə istinad edərək mitinqin təşkilatçılarına cavab verməsi anlaşılan deyil. Eləcə də, cavab məktubundan görünür ki, daxili işlər naziri R. Usubovun cidd-cəhdlə həmin mitinqin dağıdılmasında daxili qoşunların qüvvəsindən istifadə edilmədiyini israr etməsi həqiqətə uyğun deyil.
Bakı şəhər İcra hakimiyyətinin məktubunda hədələyici tonlar da mövcuddur. Məktubda birbaşa göstərilir ki, sərbəst toplaşmaq azadlığı haqqında AR qanununun müddəalarının pozulması kimi qiymətləndiriləcək hallar mövcud olarsa, yarana biləcək mənfi nəticələrə görə mitinqin təşkilatçıları və hətta iştirakçıları da məsuliyyət daşıyacaqlar. S. Nəhmətlinin fikrincə, məktubun bu formada tərtib olunması Azərbaycan qanunvericiliyini bilməməkdən və siyasi naşılıqdan irəli gəlir. Belə ki, hər hansı bir hadisəyə görə, cavabdehlik məsuliyyətini məhkəmə müəyyən edə bilər. Olmayan hadisəyə görə, qarşı tərəfin günahlandırılması isə siyasi riyakarlıqdan başqa bir şey deyil.

Müsavat Partiyasının mətbuat xidməti, 16 dekabr 2005-ci il