Bu gün Müsavat Partiyasının qərargahında partiyanın Məclisinin növbəti toplantısı keçirilib

Toplantıda parlament seçkilərinin nəticələri və partiyanın qarşısında duran vəzifələr müzakirə olunub. Sözügedən məsələlərlə bağlı Müsavat Partiyasının başqanı İsa Qəmbər geniş nitq söyləyib. Sonra Müsavat başqanının müavini Arif Hacılı çıxış edərək parlament seçkilərində baş verən qanun pozuntuları haqqında məlumat verib. Daha sonra Məclis üzvləri müzakirələrdə iştirak ediblər. Çıxış edənlər parlament seçkilərinin total şəkildə saxtalaşdırıldığını, ölkə Konstitusiyası və seçki qanunvericiliyinin tələblərinə cavab vermədiyini bildirib bu barədə konkret faktlar söyləyiblər.

Müzakirələrdən sonar seçkilərin nəticələri, “Azadlıq” blokunun fəaliyyətinin gücləndirilməsi və müxalifətin konsolidasiyası istiqamətində qərarlar qəbul olunub. Məclis Müsavat partiyasının Divanının qərarını bəyənərək deputat seçilmiş üzvlərin indiki mərhələdə Milli Məclisin işində iştirak etməməsini məqsədəuyğun sayıb

Məclis seçkinin nəticələri və parlamentə bağlı digər məsələlərin yekun müzakirəsini yanvarın sonu–fevralın əvvəllərində keçirmək barədə qərar qəbul edib.

Məclisin bu günkü toplantısında həmçinin Ermənistan-Azərbaycan konfliktinin həllinə dair intensivləşmiş danışıqların intensivləşdirilməsi ilə bağlı bəyanat da qəbul edilib.

Bəyanatda deyilir:

“Son günlər Ermənistan-Azərbaycan konfliktinin həlli ilə bağlı beynəlxalq səylərin xeyli dərəcədə artması müşahidə edilir. Regiona Minsk qrupu həmsədrlərinin gəlişi ilə bağlı bu məsələ ətrafında şərhlər və müzakirələr daha da artıb. Bu şərhlərin içərisində belə bir fikir xüsusi ilə qabardılır ki, guya 2006-cı ildə Ermənistan-Azərbaycan konfliktinin həllində bütün tərəflər üçün daha konstruktiv addımlar atmaq üçün münasib şərait yetişib. Hətta belə bir fikir də vurğulanır ki, son vaxtlar əldə edilmiş kompromislər hesabına aralıq sazişi adlandırıla biləcək bir mətn üzərində razılaşma da əldə edilib.

Müsavat Partiyasının Məclisi belə hesab edir ki, Ermənistan-Azərbaycan konfliktinin beynəlxalq hüquq normaları və Azərbaycanın ərazi bütövlüyü və suverenliyi çərçivəsində həll edilməli və burada Azərbaycan hər hansı təslimçi sülh sazişinə sürüklənməməlidir.

Bu prosesi hər zaman diqqət mərkəzində saxlayan Müsavat Partiyası bundan sonra da gəlişmələri diqqətlə müşahidə edəcək. Müsavat Partiyası Azərbaycanın bütün ictimai-siyasi quruluşlarını, bütövlükdə cəmiyyəti bu ümummilli məsələdə ayıq-sayıq olmağa çağırır.

Axırda cari məsələlər baxılıb.

Müsavat Partiyasının mətbuat xidməti, 17 dekabr 2005-ci il