Ukrayna seçki ərəfəsindədir

Ukrayna seçki ərəfəsindədir. Narıncı inqilabdan sonra gələn ilin martında ölkədə ilk parlament seçkiləri keçiriləcək. Artıq ölkə bu seçkilərə ciddi hazırlıq gedir. Bu günlərdə ölkənin aparıcı siyasi güc mərkəzlərindən biri sayılan “Bizim Ukrayna ” bloku və dünyada Ukraynadakı narıncı inqilabın avanqardı kimi tanınan “Pora ” Partiyası öz qurultaylarını keçirəcəklər.

Sözügedən qurumların hər ikisi bu mötəbər tədbirdə iştirak etmək üçün Müsavat Partiyasının başqanı İsa Qəmbərə dəvət məktubu göndəriblər.
Qeyd edək ki, dekabrın 18-də qurultayını keçirəcək “Bizim Ukrayna” blokunda ölkənin aparıcı siyasi partiyaları- “ Xalq Birliyi Bizim Ukrayna ”, Ukrayna Xalq Ruhu, Ukrayna Sənayeçilər və Sahibkarlar Partiyası, Ukrayna milli Konqresi, “Sobor” Ukrayna Respublika Partiyası və Xristian-demokrat İttifaqı Partiyası təmsil olunurlar.

Dekabrın 19-da isə “Pora” və “İslahatlar və qayda ” partiyalarının birgə qurultayı keçiriləcək.

Hər iki dəvət məktubunda “Xalq Birliyi Bizim Ukrayna” partiyasının sədri Roman Bezsmertnıy və “Pora” Partiyasının sədri Vladislav Kaskiv Müsavat Başqanını qurultaya dəvətlilər arasında görməkdən qürur hissi keçirəcəklərini bildiriblər. Onlar öz məktublarında Müsavat Partiyası ilə əməkdaşlığın bundan sonra da davam edəcəklərinə əminliklərini ifadə ediblər.

Qeyd edək ki, dekabrın 19-da Müsavat Partiyasının başqanı İsa Qəmbər keçiriləcək qurultay və tədbirlərin bəzilərində iştirak etmək, Ukrayna siyasi qüvvələri ilə əməkdaşlığı inkişaf etdirmək məqsədilə Kiyevə qısa müddətli səfərə yola düşəcək.

Müsavat Partiyasının mətbuat xidməti, 18 dekabr 2005-ci il