İSA QƏMBƏRİN KİYEV SƏFƏRİ BAŞLADI

Müsavat başqanı “Pora” və “Reformı i Poryadok” partiyalarının birgə qurultayında çıxış edib

Xəbər verdiyimiz kimi, dünən Müsavat Partiyasının başqanı İsa Qəmbər Ukraynaya gedib. Kiyev hava limanında Müsavat başqanını Azərbaycan diasporasının nümayəndələri qarşılayıblar. Müsavat Partiyasının Ukraynadakı təmsilçisi Əvəz Kazımlıdan aldığımız məlumata görə, İsa bəy hava limanından birbaşa “Pora” və “Reformı i Poryadok” partiyalarının seçkiqabağı birgə qurultayına yola düşüb.

“Pora” Vətəndaş Partiyasının rəhbəri Vladislav Kaskivin təqdimatından sonra Müsavat başqanı qurultayda çıxış edib. O, Azərbaycanda keçirilən parlament seçkilərilə bağlı qısa məlumat verib. Daha sonra isə İsa Qəmbər Azərbaycanda demokratiyanın inkişafına verdikləri dəstəyə görə, Ukraynanın demokratik qüvvələrinə Müsavat Partiyası və “Azadlıq” bloku adından təşəkkür edib.

Qurultay işini başa çatdırdıqdan sonra Müsavat başqanı Ukraynanın siyasi qüvvələrilə görüşlərə başlayıb. Dünən o, “Narodnıy Rux Ukrainı” təşkilatının rəhbərliyilə bir araya gəlib, həmçinin başqa siyasi qüvvələrin təmsilçilərilə görüşüb. Bu günsə İsa Qəmbər “Xalq Birliyi Bizim Ukrayna” Partiyasının sədri və “Bizim Ukrayna” birləşmiş seçki blokunun rəhbəri Roman Bessmertnı ilə görüşəcək. O, Müsavat Partiyasıyla əməkdaşlıq sazişi imzalamış digər siyasi qüvvələrin rəhbərlərilə də bir araya gələcək.

KÖNÜL, Yeni Müsavat, 20.12.2005