"Azadlıq" blokunun Sədrlər Şurası növbəti etiraz aksiyasının yanvarda keçirilməsi barədə qərar qəbul edib

Bu gün «Azadlıq» blokunun Sədrlər Şurasının toplantısı keçirilib. Toplantıdan sonra ADP sədrinin birinci müavini Sərdar Cəlaloğlu keçirdiyi mətbuat konfransında müzakirə olunan məsələlər haqqında məlumat verib.

S. Cəlaloğlu bildirib ki, iclasda dekabrın 18-də keçirilmiş, Bakı şəhər İcra Hakimiyyəti ilə razılaşdırılmamış aksiyanın nəticələri müzakirə edilib. Bu aksiyanın parlament seçkilərinin nəticələrinin saxtalaşdırılmasına etiraz olaraq Azərbaycan vətəndaşlarının iradə ortaya qoyması kimi qiymətləndirən blok aksiyaları davam etdirməklə bağlı qərar qəbul edib. S. Cəlaloğlunun sözlərinə görə, növbəti aksiyanın yanvarda keçirilməsi qərara alınıb. Aksiyanın vaxtı isə blok rəhbərliyinin növbəti iclasında müəyyən olunacaq. Toplantıda «Azadlıq» blokunun siyasi blok kimi fəaliyyətini davam etdirməsi qərara alınıb və bu istiqamətdə blokun ciddi strukturlaşması məqsədəuyğun sayılıb. S. Cəlaloğlunun sözlərinə görə, blokun komissiyaları, departamentləri və Məclisinin yaradılması nəzərdə tutulub. Bu məsələ partiyaların rəhbər orqanlarında müzakirə olunduqdan sonra həll ediləcək. Son vaxtlar sahibkarların həbs olunması da blok rəhbərliyi tərəfindən pislənilib.

APA, 22.12.2005