“ƏLİYEV REJİMİNƏ YOX, XALQA SƏDAQƏTLİ OLMAQ LAZIMDIR”

İsa Qəmbər: “Bu hakimiyyətin mahiyyəti işfa olundu”

Müsavat Partiyasının başqanı, “Azadlıq” blokunun həmtəsisçisi və 20 saylı Nərimanov ikinci seçki dairəsindən deputatlığa namizədi İsa Qəmbər dünən Az.TV-də ödənişsiz efir vaxtında çıxış etdi. Çıxışın tam mətnini təqdim edirik.

Axşamınız xeyir, hörmətli televiziya tamaşaçıları, mənim əziz bacılarım və qardaşlarım!

Son günlər ölkədə baş verən hadisələr hamımızın gözü qarşısındadır. Bütün bunları diqqətlə izləyirik, müşahidə edirik. Mən bunların təfərrüatına varmaq istəmirəm - hər şey göz qabağındadır. Ancaq təbii ki, baş verən hadisələri təhlil etməli, onların nəticələrini deməliyik və yenə də kimin doğru, kimin yalan söylədiyini yada salmalıyıq. Çünki bu hadisələr davam edəcək. Hələ nazirlər, komitə sədrləri - bu hakimiyyətin nümayəndələri dəymiş armudlar kimi tökülməkdə davam edəcəklər. Bu proses Ramiz Mehdiyevədək gedəcək. Hələ bilmək olmaz ki, bu oyunların arxasında duran adamların ssenarisində başqa nə oyunlar var və başqa kimlər gedəcək. Bunun hamısını bir yerdə görəcəyik.

Biz bunları deyirdik. Biz deyirdik ki, bu hakimiyyət monolit deyil, dava etməyə, bir-birini qırmağa hazır olan qruplardan ibarətdir. Biz deyən oldu, olmadı? Biz deyirdik ki, bu hakimiyyət korrupsiyalaşmış, rüşvətxor bir hakimiyyətdir. Evlərini-eşiklərini gördünüz. Özü də o gördüyünüz evlər sizi çaşdırmasın. Hələ tutulmayan, işdən çıxarılmayan nazirlərin evləri, villaları tutulanlarınkından qat-qat dəbdəbəlidir, orada qat-qat çox sərvətlər görə bilərsiniz. Özü də oradakı sərvətlər bizim kimi sadə adamların gözünə böyük görünür. Bizim evimizdə şkafda, vazanın içərisində birimiz iki “şirvan”, birimiz üç-beş min manat pul qoyuruq ki, çörək, qənd almağa pulumuz olsun. Həmin indi gördüyünüz pullar da bu adamların cibxərcliyidir, gündəlik xərcləridir. Bu adamların dolanışığı, rüşvətxorluğu bu şəkildədir. Dediyim kimi, hələ tutulmayanların, işdən çıxarılmayanların da sərvətləri, villaları bundan qat-qat çoxdur, böyükdür, dəbdəbəlidir, genişdir. Bunu da görəcəksiniz, şahidi və iştirakçısı olacaqsınız.

Biz deyirdik ki, Əliyevlər rejiminə sədaqət göstərməyin mənası yoxdur, xalqa sadiq olmaq lazımdır. Gördünüzmü, 10 il, 12 il, 15 il Əliyevlərə xidmət edən adamları bir günün içərisində Bayıla, MTN-ə atdılar. Onları məhv etməyə hazırdırlar. Bu gün onlara işgəncə verirlər. Bu gün işgəncə verərək onlardan yalan ifadələr almağa çalışırlar. Bu adamlar rüşvətxorluq ediblər, çox qanunları pozublar. Ancaq bu adamların dövlət çevrilişi etmək istəməsi haqda uydurmaya bu ölkədə heç kim inanmaz. Çünki bu adamların xasiyyəti, fəaliyyət tərzləri başqadır. Eyni zamanda gördünüz ki, bu var-dövlət, sərvət toplamağın axırı yoxdur. Yadınızdadırsa, Türkiyənin baş naziri Azərbaycan parlamentinin tribunasında çıxış edəndə bu adamlara üzünü tutdu. Dedi, bu qədər sərvət, mal-mülk toplamağın mənası yoxdur, heç nəyi özünüzlə apara bilməyəcəksiniz. İndi o biri dünyaya yox, hətta vəzifədən vəzifəsizliyə o mal-mülkü apara bilmirlər. Hamısı bir qrup hakimiyyətdə olan adam tərəfindən mənimsənilir. Bir qrup o birisinin əlindən almaqla məşğuldur. Bütün bunlar hamısı göz qabağındadır. Bu hakimiyyətin mahiyyəti ifşa olundu. Bu hakimiyyətin rüşvətxorluğu, monolit olmaması ifşa olundu. Hakimiyyət özü-özünü ifşa edir. Bu məsələ davam edəcək. Bu, ciddi bir hakimiyyət böhranıdır və böhran getdikcə dərinləşəcək. Bunun da nəticəsində əvvəl-axır xalq öz sözünü deyəcək və öz hakimiyyətini, öz parlamentini seçəcək.

Biz isə “Azadlıq” bloku olaraq monolit bir şəkildə, birgə fəaliyyətimizi davam etdiririk. Mən keçən dəfə sizə demişdim: son günlərdə Ukraynaya səfər etməli oldum. Həm oradakı dostlarımız, həmkarlarımızla görüşdük, söhbətləşdik, bir sıra müqavilələr, sənədlər imzaladıq, həm də gücümüz çatan qədər oradakı dostlarımız, həmkarlarımız vasitəsilə Rəsul Quliyevin azadlığa çıxması məsələsini sürətləndirdik. Orada Ukraynanın hakimiyyət partiyasıyla - Yuşşenkonun partiyasıyla əməkdaşlıq haqda saziş imzaladıq. Bu da bir daha dünyanın bizimlə bir yerdə olduğunu göstərir. Son günlərdə ABŞ Senatının Azərbaycandakı seçkilərlə bağlı qətnamə qəbul etdiyini də bilirsiniz.

Mən sizin hamınıza müraciət edirəm. Ürəkli olun. Qanun çərçivəsində, dinc şəkildə mübarizə aparacağıq və qalib gələcəyik.

Tanrı Azərbaycanı qorusun.

Hazırladı: Ülkər ƏLİYEVA, Yeni Müsavat, 25.10.2005