XALQIN BU CİNAYƏTKAR REIİMİ DƏYİŞMƏK HAQQI VAR

MÜTƏŞƏKKİL MÜBARİZƏMİZ HAKİMİYYƏTİ NARAHAT EDİR

MÜSAVAT BAŞQANINDAN MÖHTƏŞƏM TƏKLİF: "BU GÜN HAKİMİYYƏTƏ QARŞI BİRLİKDƏ MÜBARİZƏ APARAN DEMOKRATİK QÜVVƏLƏR BİR PARTİYADA BİRLƏŞMƏLİDİRLƏR"

Seçki saxtakarlığına etiraz edən müxalifət qüvvələrinin dünənki aksiyasında Müsavat Partiyasının başqanı İsa Qəmbər etdi. Çıxışın tam mətnini təqdim edirik:

Əziz bacı və qardaşlarım!

Bir daha sizi salamlayıram. Eşq olsun sizin mübarizənizə, dəyanətinizə, əzminizə!

Biri deyir ki, havalar soyuduqca insanlar mitinqə gəlməyəcəklər. O biri söyləyir ki, adamlar mitinqlərdən yorulacaqlar, bezəcəklər və deyəcəklər ki, biz daha gəlmirik. Bu hakimiyyət düşünür ki, mitinqlərin gününü dəyişməklə, insanlara maneçilik yaratmaqla aksiyaya gələnlərin sayını azalda biləcək. Bu gün Siz - on minlərlə Azərbaycan vətəndaşı, demokratiya aşiqi, azadlıq yolunda hər cür fədakarlığa hazır olan insanlar bu meydanı yenidən doldurmaqla, möhtəşəm yürüş və mitinq keçirməklə bütün bu deyilənlərin yanlış olduğunu, böyük bir xalqı təmsil etdiyinizi sübut etdiniz, eşq olsun sizlərə!

Əzizlərim, biz bütövlükdə Azərbaycan tarixinin indiki mərhələsinin çox mühüm günlərini yaşayırıq. On iki ildir ki, cinayətkar bir rejim, Azərbaycanı işğal edərək xalqımızın, bizlərin, başına olmazın oyunlar açır. Bu hakimiyyətin, Əliyev rejiminin günahı üzündən torpaqlarımızın böyük bir qismi işğal altındadır, yüz minlərlə insanımız öz vətənində qaçqına-köçkünə çevrilib, onlar qul-kölə vəziyyətində yaşamağa məcbur edilirlər. Milyonlarla insanımız işsizlik, imkansızlıq ucbatından bu gözəl vətənimizi, məmləkətimizi tərk etməyə, xaricə getməyə məcbur olublar. Azərbaycanda həyat səviyyəsini biabırçı bir vəziyyətə salıblar. Özləri isə dünyanın ən varlı, ən zəngin insanları səviyyəsində yaşayırlar, hətta özləri üçün dünyanın ən zəngin insanlarının özlərinə rəva bilmədikləri həyat şəraitini təmin edirlər. Öz villaları ilə, təyyarələri ilə, dənizlərin-okeanların ortasında aldıqları adalarla xalqa meydan oxuyurlar, insanlara gözdağı verirlər. Göstərirlər ki, biz bu cür yaşayacağıq, siz isə qul kimi, kölə kimi. Belə bir hakimiyyətə nə demək olar!? (Meydan böyük coşğu ilə "İstefa!" qışqırdı - D.S.)

Uzun illər ərzində bu cinayətkar tayfa öz xalqına qarşı bu genosidi davam etdirib. Hər şeyini oğurlayıb, üstəlik də hər seçkidə xalqın səsini oğurlamağa davam edir. eçənci seçkilərdir ki, demokratik qüvvələr, əslində xalq qalib gəlir, çünki xalqın iradəsi ortalıqda olur. Ancaq cinayətkar rejim həmin səsləri oğurlayır, xalqın iradəsini əlindən alır və özünün cinayətkar hakimiyyətini davam etdirir. Biz hər dəfə bu rejimə qarşı müxtəlif formalarda mübarizə aparmışıq. Hesab edirəm ki, 2005-ci ilin parlament seçkilərindən sonra aparılan mübarizə öz möhtəşəmliyi, sistemliliyi, düşünülmüş xarakteri ilə təkcə Azərbaycan xalqının deyil, dünya tarixinə düşəcək. Çünki bu mübarizə qələbə ilə bitəcək! ("Azadılq!" hayqırtıları meydanı bürüyür - D.S.)

Qələbəyə aparan yollar barədə müxtəlif fikirlər səslənir, müxtəlif təkliflər var. Meydanda qalmaq fikri kifayət qədər populyar bir şəklə gəlib çıxıb, rəhbərlikdə də bu ideya müzakirə olunub. Təbii ki, bu ideyanın yaşamaq haqqı var. Çünki bu xalqın mübarizə haqqı, cinayətkar rejimi dəyişmək haqqı var. Ona görə də bu təklif, təbii ki, məntiqli bir təklifdir. Mən xüsusən gənclərin bu fikirdə olduğunu bilirəm. Bilirəm ki, meydanın əksəriyyəti də mübarizənin davamlı olması, radikallaşması, nəhayət, bu rejimlə vidalaşılması üçün mümkün olan hər şeyi etməyin tərəfindədir. Biz bunları gözəl başa düşürük. Amma eyni zamanda biz onu da bilirik ki, Azərbaycan xalqı, Azərbaycanın demokratik qüvvələri bir çox sahələrdə hakimiyyətdən üstündür. Biz əqidəmizlə, mütəşəkkilliyimizlə, mübarizliyimizlə, təmizliyimizlə, mənəvi saflığımızla hakimiyyətdən üstünük. Biz gücümüzlə, birliyimizlə mövcud iqtidardan güclüyük. Amma hakimiyyətin bizdən güclü olduğu iki sahə var. Bunlardan biri puldur. Pul məsələsində biz onlarla yarışa girə bilmərik. Bu hakimiyyətin xalqdan üstün olduğu ikinci bir sahə zorakılıq məsələsidir. Zor məsələsində, etiraf etmək lazımdır ki, hakimiyyət xalqdan üstündür. Onların yalnız pula və zora ümidi qalıb, gücü çatır.

Bizim mütəşəkkil, düşünülmüş mübarizəmiz hakimiyyəti ciddi şəkildə narahat edir. Hökumət mübarizəni yekunlaşdırmaq, zorakılığa bəhanə tapmaq, mitinqləri dayandırmaq, ölkədə artan ictimai-siyasi fəallığı azaltmaq üçün yollar axtarır. Buna görə də hər bir hərəkətimiz, addımımız on dəfə ölçülüb, bir dəfə biçilməlidir. Atacağımız addımlar bu hərəkatın dayanmasına yox, mitinqlərin, yürüşlərin, aktivliyin davam etməsinə, nəhayətdə xalqın qəlbəsinə gətirib çıxarmalıdır. Bunun üçün kifayət qədər imkanlarımız var. Bu gün seçkilərdən sonra Azərbaycanın bütün milli - demokratik qüvvələri bir araya gəlib. Hesab edirəm ki, bu qüvvələrin bir təşkilatda, bir hərəkatda birləşməsi barədə düşünmək lazımdır. AXCP, ADP, Müsavat Partiyası, Liberal Partiyası, digər siyasi qüvvələr - bütün bu qüvvələr ya bir partiyada, ya da bir hərəkatda, təşkilatda birləşməlidir, biz mübarizənin yeni bir mərhələsinə başlamalıyıq. Seçkilərdə iştirak etmiş namizədlərin böyük bir hissəsi - artıq 600-ə qədəri bir araya gəlib. Onlar seçkilərin nəticələrinin ləğv olunmasını, yeni seçkilərin keçirilməsini tələb edirlər. Hesab edirəm ki, bu namizədlərin iştirakı ilə forumumuzu davam etdirməliyik. Eyni zamanda 125 dairənin hamısında həqiqətən kimin qalib gəldiyini araşdırıb, rəsmiləşdirib o adamların Xalq Məclisi şəklində fəaliyyət göstərməsini təmin etməliyik. Çünki siz onlara səs vermisiniz, onların xalqı təmsil etməyə haqqları var, indi parlamentdə oturmaq istəyən quldur çoxluğun yox. Ona görə hesab edirəm ki, bu 125 adamı müəyyənləşdirib Xalq Məclisi yaratmalıyıq və xalqın adından danışmağa həm hüquqi, həm siyasi, həm mənəvi haqqı olan bir təşkilat qurmalıyıq. Biz bunu da edə bilərik. Bizim hələ istifadə edə biləcəyimiz imkanlar çoxdur. Cəmiyyət yeni-yeni hərəkətə gəlir. Artıq şirkətlərdə tətillər başlayıb. Sonuncu dəfə nə vaxt eşitmişdiniz ki, Azərbaycanda fəhlələr, mühəndislər tətil etsinlər. Artıq bu tətillərə də start verilib. Bu tətil Azərbaycan xalqının artan fəallığından, mübarizə potensialından xəbər verir. Hesab edirəm ki, biz ictimai-siyasi fəallığı daha da artırmalıyıq. Hesab edirəm ki, Qərbi, dünyanı utandırmağın zamanı bitməyib. Azad dünya azadlığı, haqqı uğrunda mübarizə aparan xalqların yanında olacağını bəyan edib və bizim tamamilə mənəvi haqqımız var ki, onlardan öz sözlərinə əməl etmələrini tələb edək. Biz bunu da etməliyik.

Hakimiyyətin özünün də içərisində ciddi çaşqınlıq var. Onlar da ciddi tərəddüd içərisindədirlər. Biz hakimiyyəti xalqla hesablaşmağa vadar etməliyik. Xalqla, xalqın seçilmiş nümayəndələri ilə, liderlərlə danışmağa məcbur etməliyik. Belə yollarla biz bu mərhələni uğurla, qələbə ilə başa vura bilərik və nəticədə xalqımızın uzun illərdən bəri istədiyi azad seçkiyə nail ola, xalqın seçdiyi parlamentin millətimizin problemlərinin həllinə başlamasını təmin edə bilərik. Çadırları meydana gətirməyə isə bizim hər zaman imkanımız var. Biz bunu gələn həftənin şənbə günü də edə bilərik, bütün dünyada insan hüquqlarının qeyd olunduğu 10 dekabrda da. Bu, bizdən, sizdən asılıdır. Hakimiyyətə xalqa qarşı zorakılıq həyata keçirmək üçün bəhanə, əsas verməməliyik. Mübarizəmizi necə mütəşəkkil, dinc şəkildə başlamışıqsa, o şəkildə də davam etdirib qələbəyə qədər aparmalıyıq. Xalqımız buna hazırdır. Bunun yolu bizim birliyimizdən, əzmimizdən keçir. Bu birlik də ortadadır, sizin əzminiz də. Gündən-günə bu birliyi və əzmi gücləndirərək xalqımızı bütün hədəflərinə çatdırmağa qadirik! İnşallah, buna çatacağıq! Mən sizi bu yolla mübarizəyə səsləyirəm! Mən sizi qələbəyə səsləyirəm! Tanrı sizlərə yar olsun, Azərbaycanımızı qorusun!

Hazırladı: Dünya SAKİT

"AZADLIQ BLOKU"NUN 26 NOYABR 2005-Cİ İL TARİXLİ YÜRÜŞ-MİTİNQİNİN QƏTNAMƏSİ

Yürüş-mitinq iştirakçıları 1993-cü ildən başlayaraq mövcud rejimin hakimiyyətdə olduğu dövrdə keçirilən bütün seçkilər kimi 6 noyabr 2005-ci il üçüncü çağırış Azərbaycan Respublikası Milli Məclisinə keçirilən seçkilərin də qeyri-azad, qeyri-demokratik şəkildə keçirilməsini, seçkilərin bütün ölkə miqyasında total və mütəşəkkil cinayətkarlıqla saxtalaşdırılmasını, mövcud rejimin öz opponentlərinə qarşı aqressiv və repressiv metodlarla mübarizə aparmasını, hakimiyyətin siyasi müstəvidə itirilmiş nüfuzunu zorakı yolla bərpa etmək istəyini, Azərbaycan dövlətinin beynəlxalq təşkilatlar qarşısında azad və ədalətli seçkilər keçirməklə əlaqədar götürdüyü öhdəliyi yerinə yetirməməsini, siyasi əqidəsinə və peşə fəaliyyətinə görə insanların qətlə yetirilməsini və qeyri-qanuni olaraq həbs olunmasını, vətəndaşların sərbəst toplaşmaq azadlığına süni maneələrin yaradılmasını, Konstitusiya və qanunların kobud surətdə pozulmasını, ən başlıcası keçirilən seçkilərin Azərbaycan xalqının həqiqi iradəsini müəyyən etmədiyini, Mərkəzi Seçki Komissiyasının seçki pozuntuları ilə bağlı daxil olan şikayətləri obyektiv araşdırmamasını nəzərə alaraq tələb edirlər:

1. 6 noyabr 2005-ci ildə üçüncü çağırış Azərbaycan Respublikası Milli Məclisinə keçirilən seçkilərin nəticələri total şəkildə saxtalaşdırıldığına, DSK-ların protokolları Azərbaycan Respublikası Seçki Məcəlləsinə uyğun olmadığına görə seçkilərin yekunlarını təsdiq etməsin və yeni seçkilər təyin etsin;
2. Xalqın həqiqi siyasi iradəsini əks etdirən parlament hakimiyyətini formalaşdırmaq məqsədi ilə Azərbaycan Respublikasının Milli Məclisinə yeni seçkilər keçirilsin.
3. 6 noyabr seçkilərinin nəticələrinin saxtalaşdırılmasını həyata keçirən vəzifəli şəxslər qanuna müvafiq olaraq cəzalandırılsın;
4. MSK-nın seçkilərin saxta nəticələrini təsdiq etməklə bağlı qərarı qeyri-qanuni hesab edilsin;
5. Elmar Hüseynovun qətlinin sifarişçiləri və icraçıları tapılaraq cəzalandırılsın;
6. Siyasi əqidəsinə görə qeyri-qanuni olaraq həbs olunan insanlar dərhal azadlığa buraxılsın.

26 noyabr 2005-ci il, Bakı şəhəri