Keçmiş müsavatçı məhkəmə yolu ilə partiyaya bərpa olundu?

Məlum olduğu kimi, Müsavat Partiyası Məclisinin keçmiş üzvü, 95 saylı Tərtər Seçki Dairəsindən Milli Məclisə deputat seçilmiş Aynur Quliyeva (Camalqızı) guya qanunsuz olaraq Müsavat Pariyasından xaric olunması və bu səbəbdən yenidən partiya sıralarına bərpa edilməsi iddiası ilə Binəqədi rayon məhkəməsinə müraciət etmişdi. Bu günlərdə məhkəmə heç bir əsas olmadan və qanunsuz olaraq A.Quliyevanın iddiasını təmin edib.

Məsələ ilə bağlı Müsavat Partiyasının MNTK-sı açıqlama verib. Açıqlamada bildirilir ki, Quliyeva Aynur Camal qızı 6 noyabr 2005-ci ildə keçirilən parlament seçkilərində 95 saylı Tərtər Seçki Dairəsindən öz namizədliyini irəli sürüb. “Azadlıq” blokunun həmin dairədən vahid namizədi olduğu üçün partiya A. Quliyevaya ya öz namizədliyini geri götürməyi, ya da partiyadan çıxmağı təklif edib. A. Quliyeva ikincini - partiyadan öz xahişi ilə çıxmağı məqbul variant hesab edərək bununla bağlı ərizə yazacağını söyləyib.

Müsavat Partiyasının Divanı onun xahişini və yazılı şəkildə təqdim edəcəyi ərizəsini nəzərə alaraq onun partiya sıralarından çıxarılması ilə əlaqədar qərar qəbul edib. Müsavat Partiyasının Nizamnaməsinə əsasən hər hansı cəza almış partiya üzvü Divanın qərarından MNTK-ya şikayət edə bilər.

A. Quliyeva MNTK-ya müraciət etmədən birbaşa Binəqədi rayon məhkəməsinə müraciət edib və ilk dəfədir ki, Azərbaycan məhkəməsi bu tipli məsələ ilə bağlı qərar verib.

Müsavat Partiyası MNTK-sı bəyan edir ki, Binəqədi rayon məhkəməsi məsələni ciddi araşdırmadan və partiya Nizamnaməsinin verdiyi imkanları nəzərə almadan qərar qəbul edib.

Xatırladaq ki, məhkəmənin qərarı partiyaya təqdim olunduqdan sonra məsələ ilə bağlı lazımi hüquqi addımlar atılacaq.

Müsavat Partiyasının mətbuat xidməti, 28 dekabr 2005-ci il