"Hacı Məmmədov" biznesi
ən gəlirli sahəyə çevrilib

Son günlər Hacı Məmmədov məsələsi yenidən mətbuatın gündəmindədir. Zakir Nəsirovun həbsinin təsdiqlənməsiylə mətbuatda bu mövzu yenidən ön sıraya çıxdı. Özü də yeni versiyalarla. Baxmayaraq ki, işi aparanlar "istintaq sirri" adıyla hər hansı açıqlama verməkdən imtina edirlər. Amma bütün bunlara baxmayaraq, istintaqdan kütləvi informasiya vasitələrinə məlumatlar vaxtaşırı ötürülür. Hətta, deyilənə görə, bu "sızmaların" qarşısını almaq üçün çox ciddi işlər aparılır. Belə ki, istintaq qrupunun bütün hərəkətləri, telefon danışıqları izlənilir. Onlar təcrid olunmuş vəziyyətdə fəaliyyət göstərirlər. Onların kimlərləsə hər hansı kontaktda olmasına imkan verməməyə çalışılır.

Tutulanların vəkilləri də hələlik mətbuata açıqlama verməkdən çəkinirlər. Deyilənə görə, onlara da danışmamaqla bağlı ciddi xəbərdarlıq edilib. Qalmaqallı məhkəmə proseslərindən tanınan, eyni zamanda bu proseslərlə bağlı mətbuatla təmasdan çəkinməyən vəkil Adil İsmayılov da hələ ki, susur.

Hacı Məmmədovun həbsindən 5 aydan artıq vaxt keçməsinə baxmayaraq qəzetlərdə tutarlı faktlara söykənən informasiyalar getmir. Bunun başlıca səbəbini çoxları Ramil Usubovda görürlər. Yəni bütün problemlərin, cinayətkarlığın kökü məhz gedib nazirə dirənir. Onun hələ də vəzifədə qalması işin tam açılmasını ləngidir.

İndi o, bütün imkanlarını səfərbər edib müavinlərini bu cinayət faktından kənarda saxlamağa cəhd göstərsə də, istədiyinə nail ola bilməyib. Zakir Nəsirovun həbsi nazirin bütün planlarını alt-üst edib. Deyilənə görə, həbsin qarşısını almaq üçün ən müxtəlif, "real faktlara söykənən" təklifləri qəbul edilməyib. Üstəlik, indi də başqa bir müavini, Hacı Məmmədov məsələsindən sonra istefaya göndərilən Zahid Dünyamalıyevin həbsi barədə söhbətlər dolaşır. Düzdür, hələ bu rəsmən təsdiqlənməyib. Amma qeyri-rəsmi mənbələr onun istintaqa çağırılaraq 5 saat müddətində dindirildiyini deyirlər. Dindirildikdən sonra buraxılan keçmiş nazir müavininin əslində ev dustağı olduğu xəbər verilir. Ondan heç yerə getməmək iltizam da alınıb.

Daha bir informasiyaya görə, R.Usubovun müavinlərinin həbs edilməsi onun özünün günahıdır. Belə ki, yaxınlarda dar bir dairədə söhbət zamanı R.Usubov İ.Əliyevin onu istefaya göndərmək iqtidarında olmadığını deyib. Bütün polis sisteminə nəzarət etdiyini, yeri gələrsə, güclü şəkildə müdafiə olunacağını vurğulayıb. Təbii ki, dairə nə qədər dar olsa da, görüş gizli keçirilsə də, lentə alınan söhbət lazımi yerə çatdırılıb və məlub həbslər baş verib.

İndi bütün ölkənin diqqəti Milli Təhlükəsizlik Nazirliyindədir. Heç bir işdə polisə etibar olunmur. Sadəcə, seçki ərəfəsi olduğundan hakimiyyət bu qurumu narazı salmaq istəmir. Bütünlüklə çirkaba batırılan DİN-də köklü islahatların aparılması indiki məqamda məqsədəuyğun sayılmayıb, seçkidən sonraya saxlanılıb. Bəzi mənbəələr isə Ramil Usubovun yaxın vaxtlarda istefaya göndəriləcəyini də istisna etmirlər. Polisdəki mənbənin məlumatına görə, müavinlərindən birinin həbsi, birinin isə ev dustağı olması onun istefaya göndərilməsinə hazırlığın ilkin göstəricisi sayıla bilər. İnandırıcı görünməsə də, hətta bəziləri bu qurumun Milli Təhlükəsizlik Nazirliyinə tebe etdiriləcəyini də deyirlər.

Avropa Şurasının Azərbaycan üzrə həmməruzəçisi Anders Herkel də son səfərində DİN-də baş verənlərdən təəccübləndiyini bildirmişdi. O, eyni zamanda bütün baş verənlərdən sonra daxili işlər naziri Ramil Usubovun hələ də istefa verməməsinin səbəbini anlamadığını demişdi. Doğrudan da Avropa mentaliteti başqadır. Neçə illərdir Azərbaycanla işləyən şəxs hələ də, deyəsən, bu iqtidarın əsl simasını dərk edə bilməyib, yaxud neyləsin ki, bütün bunlar ona çatmır. Şübhəsiz, belə cinayət faktı Azərbaycanda başqa hakimiyyətin zamanında aşkarlansaydı, istefalar baş alıb gedərdi. Amma mahiyyət başqa şeydir. Bu, indiki iqtidarın mahiyyətinin göstəricisidir...

Aldığımız məlumata görə, Hacı Məmmədovun son illərdə keçirdiyi bütün görüş yerləri - restoranlar, saunalar, istirahət mərkəzləri nəzarətə götürülüb və bu yerlərdə çalışanlar, onların sahibləri vaxtaşırı istintaqa cəlb olunurlar. Hacı Məmmədovun həbsindən sonra paytaxtın görkəmli yerlərində olan bir çox villalar "Tibb mərkəzi"nə, "Mebel evi"nə çevrilib. Bir çoxları satışa çıxarılıb. Adam oğurluğundan gələn pullarla tikilən bu tipli evlər indi həmin işin istintaqı ilə bağlı satılır, deyilənə görə, bir çoxları adlarının bu məsələdə hallanmasının qarşısını almaq üçün milyon dollarla pul təklif edirlər. Hətta bəzilərindən bu pulların alındığı barədə məlumatlar da var. Bu məsələdə keçmiş baş prokurorun, keçmiş milli təhlükəsizlik nazirinin, hətta Milli Bankın sədrinin adları hallandırılır. Çox böyük məbləğlər müqabilində danışıqlar aparıldığı deyilir. Konkret məbləğlər də söylənilir. 5 milyon dollar, 10 milyon dollar. Bəli, bu pullar adı çəkilən cinayətin istintaqından yayınmaq, yaxud istintaqa cəlb olunmuşları az itki ilə xilas etmək üçün verilən, təklif olunan, alınan pullardır.

Göründüyü kimi, "Hacı Məmmədov" biznesi çiçəklənmə dövrünü yaşayır. Seçki ilində bu biznesdən gələn pullara hakimiyyətin çox böyük ehtiyacı var.ÿXarici təzyiqlərin, seçkini demokratik keçirmək tələbinin müqabilində müxalifətə qarşı aparılan "qara piar" üçün, heç şübhəsiz, külli miqdarda vəsait tələb olunur. Halal yolla qazanılan pullar buna bəs etməz...

Azadlıq jurnalı, № 3, 18.07.2005