İctimai Televiziya, yoxsa AzTV-3

Hələlik bütün işlər ikinci istiqamətində gedir. Əslində İsmayıl Ömərovun rəhbərlik, Cahangir Məmmədlinin sədri olduğu qurumun guya nəzarət etdiyi telekanaldan başqa nəsə gözləmək əbləhlikdir. Sadəcə, baş qatırlar. Avqust ayından efirə çıxacağı deyilən İctimai Televiziya hələ ki, kadrlarını prezident aparatı ictimai-siyasi şöbənin müdiri Əli Həsənovun göstərişi ilə formalaşdırır. Baxmayaraq ki, istər C.Məmmədli, istərsə də İ.Ömərov kadrların onların iradəsindən kənar ictimaiyyətin televiziyasına yerləşdirilməsini istisna edirlər. Bugünlərdə "Şərq" qəzetinə müsahibəsində İ.Ömərov bunu xüsusi vurğulayıb. Amma "Yeni Müsavat" qəzetinə bir neçə gün əvvəl verdiyi müsahibədə isə namizədlərin Yayım Şurası ilə razılaşdırıldığını deyib. Görünür şərait belə tələb edir, müxalifət qəzetinə müsahibədə deyilən sözləri iqtidarın nəzarətində olan qəzetdə demək olmaz.

Əli Həsənovun işçisi İbrahim Məmmədovu İctimai Televiziyaya gətirmək üçün İ.Ömərov özü "seçim" edib, "Şərq"ə inansaq, heç kimlə məsləhətləşmədən, "Yeni Müsavat"a istinad etsək, Cahangir Məmmədlinin məsləhətindən sonra. Əli Həsənovdan isə söhbət belə gedə bilməz. Eləcə də AzTV-də iqtidarın jurnalisti sayılan, hansısa nazirin maşın bağışladığı Esmira Çərkəzqızını da İ.Ömərov "öz seçimi" ilə işə dəvət edib. Eyni zamanda başqa departamentlərdə artıq məskunlaşanları da...

İyulun 10-da müxalifətin "Qələbə" meydanında əvvəlkilərdən də izdihamlı mitinqi keçirildi. Amma nədənsə bütün telekanallar bu mitinqlə bağlı hər hansı informasiya vermədilər. Hətta müstəqil "ANS" də dəstədən geri qalmadı. Həmin gün bu telekanalın efirində əsas diqqət Qırğızıstana, orada keçirilən mitinqlərə yönəldilmişdi. Ümumiyyətlə xarici xəbərlər (önəmli olub-olmamasının əhəmiyyəti yoxdur) informasiya proqramlarında daxili xəbərləri xeyli kölgədə qoyur. Azərbaycanda - qulaqlarının dibində müxalifətin "Azad seçki" tələbi ilə keçirdiyi çoxminli aksiya heç yada da düşmür. Azərbaycan seyrçisinin xaricdə baş verənlərə ciddi tələbat duyduğunu biz də başa düşürük. Onu ödəmək gərəkdir. Daxili imkanlar hesabına olsa da...

Müstəqilliklə bağlı bir jurnalist dostumun dahiyanə fikrini xatırlatmaq yerinə düşər. O, müstəqilliyi ilə öyünən kütləvi informasiya vasitələri haqqında deyib: "...Həqiqətən müstəqildir, istədiyi adamdan rüşvəti müstəqil ala bilər".

*** Yeri gəlmişkən, nə qədər qəribə olsa da, deyilənə görə, "Azadlıq" blokunun sonuncu iki mitinqinin qətnaməsindən də İctimai Televiziya ilə bağlı bənd çıxarılıb...

Azadlıq jurnalı, № 3, 18.07.2005