Cinayət başında...

Ramil Usubova arxalanan "Şəms" restoranı tikinti sərhədlərini aşaraq 20 illik bağda soyqırım təşkil edib

Hacı Məmmədovlar yetişdirən nazirin qorxusundan Ekologiya Nazirliyi əraziyə yaxın düşə bilmir

Bakının axtikturasına yamaq olan tikintilərin arxasında yüksək çinli məmurların dayandığı təzə xəbər deyil. Şəhər yiyələri bu yamaqlarla bağlı nə qədər əsaslandırıcı arqumentlər sadalasalar da, bu şıdırğı tikinti meydanında halal pulların xərcləndiyi barədə fikirlər yalnız absurd adlandırıla bilər. Bu pul seli və məmurların öz vəzifəsindən sui-istifadəsi heç bir sərhəd tanımır. Qeyd etdiklərimizə sübut olaraq Xətai rayonu ərazisində aparılan bir tikinti ilə bağlı redaksiyamıza daxil olmuş məlumatları diqqətinizə çatdırmaq istərdik.

Rayondakı Gəncə prospekti, 26 ünvanında yerləşən "Şəms" şadlıq evinin arxasında yeni yaşayış binasının tikintisinə bir neçə ay əvvəl başlanıb. Ətrafda yaşayanlar tikintinin şadlıq evinin sahibi Sabir Fərəcov tərəfindən aparıldığını bildirirlər. O da bildirilir ki, sözügedən tikintinin həqiqi və qeyri-rəsmi sahibi daxili işlər naziri, "restoranlar kralı" Ramil Usubovdur. Hələlik bu məsələnin araşdırılması ilə bağlı əlaqədar instansiyalara ünvanladığımız suallara cavab ala bilmədiyimizdən biz tikinti sahibi və tikinti havadarının kimliyi barədə fikirləri öz mötəbər mənbələrimizə istinadən səsləndiririk. Bakının mərkəzindən uzaq bir rayonda aparılan tikintinin bu qədər diqqət cəlb etməsinin səbəbi təkcə onun havadarının yüksək çinli hökumət məmuru olması deyil. Belə faktlar artıq təzə xəbər sayılmır. Bu məsələdə Ekologiya və Təbii Sərvətlər Nazirliyi, Bakı şəhər İcra Hakimiyyəti və rayon icra orqanlarının da məsuliyyəti var. Tikintinin qeyri-adiliyi ondadır ki, Bakıdakı digər belə obyektlərdən fərqli olaraq buradakı binanın qazılmaqda olan bünovrəsindən çıxarılan daş, qaya parçalarpı ərazidəki bağın, 20 ildən bəri yetişdirilən ağacların dibinə yeridilməklə bağ darmadağın edilir. Bununla tikinti sahibi yaxınlıqda ayrı-ayrı vətəndaşların saldığı meyvə ağacları olan bağlara gedən yolları da qeyri-qanuni olaraq bağlayıb.

Bu günlərdə Rusiya telekanallarından birində Moskvada yeni tikinti həvəskarlarının yaşıllıqlarla bağlı problemləri necə həll etdikləri barədə süjet göstərilmişdi. Parkda gələcəkdə tikinti apararkən kəsəcəyi ağacların cəriməsini ödəməyin asan yolunu tapan işbaz ağacların üzərinə kimyəvi məhlul atmaqla onları qurutmuşdu. Ancaq rus "tikintibazlar" bunu ərazidə tikinti işlərinə başlamazdan əvvəl etmişdilər ki, bunu kimin etdiyi bəlli olmasın. Xətaidə isə məqsəd və məram gözgörəsi bəllidir. Aldığı yerdə tikinti aparan işbaz, gələcəkdə zəbt edəcəyi ərazinin də ağaclarını elə bəri başdan qurudur ki, sonra işləri çox çətin olmasın. Bir də ki, bünövrədən çıxan daş havayıdır. Eyni zamanda, Ekologiya və Təbii Sərvətlər Nazirliyi və Bakının digər yiyələri də tikinti sahibinə binanın əsasından çıxan qaya parçalarının bunun üçün nəzərdə tutulmuş əraziyə daşınmasını tələb etmir. Bəlkə də tələb etməyə cürət etmir. Buna əmin olmaq üçün ekologiya və təbii sərvətlər naziri Hüseynqulu Bağırovun cəsarətsiz sifətinə baxmaq yetər. Axı tikinti-dağıntı işlərinin arxasında Ramil Usubov kimi çəkili bir şəxs dayanır. Onun "obyekt"indən Hacı Məmmədov kimi "sıravi"lər çııbsa, görün Ramil Usubovun özü nədir! Adamı 10 dəqiqənin içində yoxa çıxarar...

Hələlik biz tikinti aparılan ünvanda çəkilmiş şəkilləri yuxarıda adları sadalanan rəsmilərin diqqətinə çatdırırıq. Mətbuatın neçə vaxtdan bəri "şadlıq evləri maqnatı" kimi təqdim etdiyi DİN sahibinin "Şəms"ə nə kimi aidiyyatı olduğu təbii ki, rəsmi sənədlərdə əksini tapmayıb. Ancaq bu o demək deyil ki, Xətaidə Ramil Usubovdur, Bağdadda kor xəlifə. Mövzu ilə bağlı rəsmi sorğularımız davam edəcək. Güman edirik ki, səlahiyyətlərindən istifadə edən məsullar apardıqları tikintini sənəd üzərində hüquqları çatan sərhədlərə sığmağa çalışacaqlar. Cənab nazir isə, ən azı, Xocalıda soyqırıma məruz qalmış həmvətənlərimizi gözü önünə gətirəcək. Soyqırıma məruz qalan ağaclar və bu iki insidentin törədiciləri arasında elə prinsipial fərq yoxdur...

Azadlıq jurnalı, № 3, 18.07.2005