Psixoza qarşı müalicə kursu

Hakimiyyətin psixoz tutmasına son qoymaq üçün demokratik dünyanın İlham Əliyevə "sakitləşdirici iynə vurması" lazım imiş

İlham Əliyev hökumətində bir həftə ərzində bir psixoz tutması yaşandı. AXCP əleyhinə təxribatları kütləvi psixoza çevirməyə çalışsalar da, öz aralarındakı psixozu hakimiyyət dəhlizlərindən kənara çıxara bilmədilər. "Ruslan Bəşirli tamaşası"nın ilk günündə əhali baş verənləri çaşqınlıqla qarşılasa da, sonradan videoçəkilişin kəsilib-doğrandığını və hakimiyyətin siyasi məqsədlərini görüncə insanlar bütün bunların AXCP sədri Əli Kərimliyə qarşı qeyri-peşəkar formada hazırlanmış təxribat olduğunu anladı və istehza ilə qarşıladı.

Amma sonrakı günlərdə də hakimiyyətdə psixoz davam etdi. Yalnız demokratik dünya - ATƏT və ABŞ səfirliyi İlham Əliyevi tutub "sakitləşdirici iynə vurandan" sonra psixoz tutması yavaş-yavaş ötüb keçdi.

Beləliklə, psixoz sona gəldi. Amma xoşluqla yox. Bir həftə ərzində AXCP-nin qərargahına "dəlicəsinə" basqınlar etməyə cəhd edən muzdlular hər dəfə cəbhəçilərin qətiyyətli sifətlərini görüncə birabırçı tərzdə qaçmağa girişdilər. AXCP sədri Əli Kərimli həmişəki kimi, öz qərarlarını vaxtında verdi. O, nə zaman döyüşərək müdafiə olunmaq və nə zaman qərargaha çəkilmək barədə qərarları da dəqiqliklə verdi. Bir neçə gün ərzində süni qəzəb nümayiş etdirən beş-üç nəfər hakimiyyət əlaltısı qərargaha tərəf cummaq əzmi göstərdilər və hər dəfə cəbhəçilər onların burnundan vurub geri qaytardı. Həhayət, Əli Kərimli hakimiyyətin təxribatını ifşa edərək cəbhəçilərə qərargahdan bayıra çıxmamağı tapşırdı. Amma bundan sonra muzdlu piketçilərdən heç kim qərargaha yaxın düşə bilmədi. Çünki artıq təxribat ifşa olunmuşdu və küçə iğtişaşları törədib şərini üstünə yıxmaq üçün bayırda bir cəbhəçi qalmamışdı. Bir sözlə, qərar vaxtında verilərək İlham Əliyevi və Ramiz Mehdiyevi məyus etmişdi...

Sonra məsələyə ATƏT qarışdı və AXCP əleyhinə təxribatları pislədi, "Sərhədsiz Reportyorlar" baş verənlərin mahiyyətini açaraq hakimiyyəti ittiham etdi, səfirliklərin nümayəndələri qərargaha gələrək AXCP-yə qarşı təxribatı özləri müşahidə etdilər və partiya sədrilə görüşərək təxribatların yolverilməz olduğunu dilə gətirdilər, Əli Kərimli ATƏT-in Bakı nümayəndəsi Maurisio Pavesi ilə görüşdü. Həhayət, ABŞ səfirliyi məsələyə birmənalı münasibətini bildirdi və sonra Əli Kərimli səfir Rino harnişlə görüşdü. Görüşdə səfir bildirdi ki, baş verənlər ABŞ dövlət katibinin diqqət mərkəzindədir. Sonra səfir harniş məsələyə konkret olaraq münasibət bildirdi: "Mən və təmsil etdiyim hökumət belə hesab edir ki, Bəşirli hadisəsi qanunun aliliyinə uyğun olaraq məhkəmələrdə araşdırılmalıdır. Bu, sonu olmayan, bitib-tükənməyən və televiziya ekranlarından düşməyən "qara piar"ın mövzusu olmamalıdır. Əgər ona qarşı ittihamlar əsaslıdırsa, onda qoy polis onu araşdırsın. Son həftə ərzində siyasi partiyalara, xüsusən onlardan birinə qarşı çox ciddi kampaniya aparılıb. Əgər qanuni fəaliyyət göstərən partiya bu cür təqiblərin obyekti olubsa, fiziki təqiblərə və media tərəfindən hücuma məruz qalıbsa, çətin ki, ATƏT bu seçkiləri obyektiv adlandırsın".

Beləliklə, demokratik dünya birləşərək, İlham Əliyev hakimiyyəti üzərində psixoz üzrə tam bir müalicəsi kursu keçdi və yalnız bundan sonra sakitləşdilər. Doğrudanmı işi bu həddə gətirib çıxarmaq lazım idi? Bəlkə dünyanın psixlərə baş qoşmayacağını düşünürdünüz? Yanılmısınız. Hə qədər artistlik etsəniz də, demokratik dünyanı və AXCP-ni demokratik seçki tələblərindən yayındıra bilməyəcəksiniz.

Amma deyəsən, demokratiyanı Azərbaycana gətirmək üçün payıza qədər hakimiyyətə bir neçə dəfə də "iynə vurmaq" lazım gələcək...

Müşfiq Tofiqoğlu

Azadlıq jurnalı, № 7, 15.08.2005