Özgürlüklə köləlik arasında

Fransız filosofu Aleksis dö Tokvil iki yüz il bundan öncə, 1835-ci ildə yazırdı: "Bu gün dünyada bir amaca doğru getdiyi görünən iki xalq var. Bunlar ruslarla amerikalılardır: Amerikalılar təbiətin onların yoluna çıxardığı çətinliklərlə çarpışma aparırlar, ruslar adamlarla: Birinci çarpışma gərəyi olaraq özgürlükdən yararlanır, ikinci köləlikdən". İki yüz il qabaq deyilmiş bu sözlər hələ də aktuallığını saxlamaqdadır. Rusiya kimi böyük bir dövlət üçün bu olduqca acınacaqlı faktdır. Bu faktın bugünkü Azərbaycanla birbaşa bağlılığı bizim üçün daha çox acılar doğurmaqdadır. hə, BUGÜNKÜ Azərbaycanda belədir: burada hakimiyyət ya zəlzələdən, ya vəlvələdən xalqın, ölkənin qarşısına çıxan çətinliklərlə deyil, sözün böyük anlamında ADAMLARLA çarpışma aparır. Bu, dahi, ümummilli lider epitetləri qazandırılan kimsənin qurduğu sistem, formalaşdırdığı recimdir. Biz buna görə bu recimi yalnız antidemokratik deyil, eləcə də antimilli recim adlandırırıq. Bu recim xaraktercə antidemokratik, antimilli recimdir. Buna görə burada çətinliklərlə deyil, ADAMLARLA çarpışma aparılır. Bu günlər ortaya çıxan Ruslan Bəşirli olayı da bu seriyadan sayılmalıdır. Açıq-aydın göründüyü kimi, h.Əliyev KQB-si qurğu qurmaqla gənc siyasətçini agentlərinin əlilə tora saldı. Sonra da seriya teleşoular düzəltdi. Elementar əxlaqdan, hüqüq normalarından uzaq teleşoular. Sonra da ortaya özünün professor-ziyalı - deputat əlaltılarını, başqa cür desək, agentura şəbəkəsini çıxardı. Ola bilsin, ən başlıcası, "Bandotdeldən" bağıra-bağıra çıxmış İqbal Ağazadəni, AXCP-nin siyasi dustaqlıqdan qurtardığı Ramiz Tağıyevi televiziyalarına çıxarıb, özlərinə yardımçı elədilər. Eləcə də, bir sıra üzdəniraq yazarları. Bütün bunlarsa sonucda müxalifətin böyük birliyini- "Azadlıq" blokunu parçalamağa, ən başlıcası, AXCP-ni, onun liderini sındırıb, əzməyə yönəlmişdi. Bir yandan yaxşı oldu: bir daha bu ölkədə kimin kim olduğu, kimin hansı dəyərlərə qulluq elədiyi üzə çıxdı. Belə görsənişlərə Əliyevçi recimin seçkiqabağı sınaqları kimi baxmaq gərəkdir. İndiki gedişlə bu ilki seçki meşokların seçkisi olacaq-pul dolu meşokların seçkisi. İndiki monopoliya televiziyaları da beləcə satılanların üzünə açıq olacaq:

"Qatıq" hakimiyyətin "qatıq" siyasətləri

Bir sıra müxalifət qəzetləri hakimiyyətin Ruslan Bəşirli quramasını uduzduğunu yazır. Məncə, bu, düzgün yanaşma deyil. Nəyə görə? İndiki hakimiyyətdə çox maraqlı bir kvartet aparıcı rol oynamaqdadır: İ.Əliyev-R.Mehdiyev, K.heydərov-Z.Məmmədov kvarteti. Qəzetlər R.Bəşirli olayında sonuncu iki fiqurun başlıca rol oynadığını yızır. Bununla bağlı tutarlı faktlar da gətirilir. Bunların hamısı inandırıcıdır. Ən azı, onların hər ikisinin- istər Nəqliyyat nazirinin, istərsə də Gömrük şefinin ermənilərlə əski alver qardaşlığına görə.

MTN-in Bəşirli olayındakı rolu istər-istəməz ortaya belə bir faktı da çıxarır: kvartetdən olan o biri cütlüyün də işdə rolu var- başlıca qərar verən rolu.

Başlanğıc olaraq onlar işi yaxşı düşünüb qurublar: istəyiblər R.Bəşirlini yıxmaqla Ə.Kərimlini, Ə.Kərimlini yıxmaqla çox qorxduqları AXCP-ni yıxsınlar. Onlar buracan, demək olar, yaxşı düşünüblər. Buracan. Ağılları buracan çatıb, burdan belə yox. Nə ölkədəki durumu dəyərləndirə biliblər, nə də dünyadakı durumu. Bununla da onlar özlərinin "qatıq" siyasətlərini ortaya qoyublar. "Primitiv əməliyyat" erməni MTN-çiləri azərbaycanlı kolleqalarının işini belə dəyərləndirdilər. Burada başqa bir dəyərləndirməyə də gərək yaranır: PRİMİTİV hAKİMİYYƏT. Bu, İlham Əliyev-kvartet hakimiyyəti üçün ən uyğun, ən tutarlı dəyərləndirmə olardı!

Demokratiyaya hələ də ölkənin "iç işi", özlərinin feodal düşüncələrinə uyğun olaraq feodal mülkiyyəti kimi baxanlar başladıqları uğursuz işin gerisini, nəylə sonuclanacağını görə bilməzdilər. Onlar demokratikləşmə proseslərinin QLOBALLAŞDIĞINI hələ də anlamayıblar. Anlaya bilmirlər!

Udub-uduzmağa gəlincə, onların bu işi udduğuna söz ola bilməz. Ancaq bu uduş hansısa milli, dövlətçilik idealına söykənən, uzaq gedən uduşlardan deyil, bir neçə günlüyə əlini-əlinə vurub, opponentin başına açdığı oyuna gülmək üzərində qurulmuş qumarbaz-korrupsioner, korporativ-kvartet uduşudur!

Belələrini, bu sayaq ucuz dəyər yiyələrini sonra nə olacağı, nə baş verəcəyi çox az düşündürür. İnanmırsınız? Elədirsə, indi ortada olan siyasətə baxın: başını AXCP - demokratiya divarına çırparaq gicəllənmiş bu hakimiyyət indi, Bəşirli-erməni suçlaması ilə bağlı demokratik dünyanın təpkilərilə üzləşəndən sonra, ortaya 122-ci Xankəndi seçki dairəsi söhbətini salıb- Azərbaycanın demokratik dövlət imicinə ağır zərbə vurandan, bizi bir daha demokratik dünyanın gözündə aşağılayandan sonra! Nə böyük iyrənclikdir: dünən antierməni kampaniyası aparan televiziyalar bu gün ermənisevər kampaniya aparmaqdadır. İndi gərək Qukasyandan belə bir reaksiya gəlsin: PRİMİTİV hAKİMİYYƏT!!!

Son olaraq yenidən Tokvilə qayıtmaq gərəyi yaranaır: "Birinci (amerikalılar) çətinliklərlə çarpışmada özgürlükdən yararlanırlar, ikincilər (ruslar, Rusiya yolu gedənlər.-X.B.) köləlikdən". Onlar ölkədə yaratdıqları köləlikdən, demək olar, bir həftə gen-bol yararlandılar. Bu köləliksə İ.Əliyevin yaratdığı köləlik deyil (onun buna gücü çatmaz), atasının qırx il uzunu KQB gücünə yaratdığı köləlikdir.

Beləliklə, bizim qurtuluşumuz köləlikdən, Əliyevçi köləlik sistemindən, köləlik recimindən qurtulmaqdadır!

XALİQ BAHADIR

Azadlıq jurnalı, № 7, 15.08.2005