Koordinasiya şurası fəaliyyətini davam etdirəcək

Müsavat Partiyası qurumun fəaliyyətinə dair təkliflərlə çıxış edib

Bu gün Müsavat Partiyasının qərargahında Söz və Mətbuat azadlığının müdafiəsi üzrə Koordinasiya Şurasına daxil olan partiyaların və Müsavat deputat qrupu təmsilçisinin qatıldığı toplantı keçirildi. Toplantıdan sonra jurnalistlər üçün brifinq keçirən Müsavat başqanı İsa Qəmbər bildirdi ki, KŞ-a daxil olan siyasi qüvvələr ölkədə demokratiyaya qarşı total hücumun başladığını və demokratik düşərgənin buna qarşı mübarizə aparmasının zəruriliyini qeyd ediblər. Müzakirələrin yekununda KM-in fəaliyyətinin davam etdirilməsi barədə razılığa gəlinib. Qərara alınıb ki, gələn həftə KŞ-nın tam tərkibdə toplantısı keçirilsin.

İsa Qəmbər Müsavat Partiyasının KM-in fəaliyyətilə bağlı təkliflərini də jurnalistlərin diqqətinə çatdırıb.

Həmin təkliflərdə bunlar nəzərdə tutulur:

1.KŞ-nın adının dəyişdirilməsi
2. Aparıcı qəzet redaktorları, QHT rəhbərləri, partiya liderləri və millət vəkillərindən ibarət KŞ-nın tərkibinin tanınmış ziyalılar və ictimai-siyasi xadimlərin hesabına genişləndirilməsi
3. İş forması
a) KŞ-nın tam tərkibdə - 100-120 nəfər – toplantıları (Bu, İctimai Palata, KŞ Məclisi və s. adlana bilər)

b) Redaktorların, QHT-çilərin, siyasilərin, deputatların və tanınmışların ayrı=ayrılıqda toplantıları

4. 2006-cı ilin dekabr ayı üçün iş planı:

a) KŞ-na daxil olan qüvvələrin əməkdaşlıq edə biləcəyi məsələlərin çərçivəsinin müəyyənləşdirilməsi;
b) Azərbaycanda mövcud vəziyyətin səbəblərinin və mahiyyətinin xalqa və beynəlxalq ictimaiyyətə çatdırılması;
c) KŞ-nin strategiyasının və 2007-ci ildə fəaliyyət proqramının hazırlanması;
d) KŞ-nın əsasnaməsinin hazırlanması;
e) KŞ-nın tərkibinin müəyyənləşdirilməsi;
f) Dekabr 2006-cı ildə birgə kütləvi tədbirlərin keçirilməsinə hazırlıq

Bu təkliflər barədə məlumat verdikdən sonra İsa bəy bildirib ki, toplantıda Milli Demokrat Partiyasının sədri İsgəndər Həmidov öz təkliflərini səsləndirib. Həmin təkliflərdə həm müxalifətin fəaliyyətinin müvəqqəti dayandırılmasına, həm də KŞ-nin fəaliyyətinin genişləndirilməsinə dair bəndlər əksini tapıb. Müsavat başqanı fərqli fikirdə olan partiyaları da konkret təkliflərlə çıxış etməyə çağırıb. O, həmçinin KŞ-nin fəaliyyət formalarından biri kimi kütləvi aksiyaların təşkili məsələsinin də nəzərdən keçiriləcəyini deyib.

Müsavat Partiyasının mətbuat xidməti, 01 noyabr 2006-cı il