Bu gün Müsavat Partiyası Divanının növbəti toplantısı olub

Toplantıda qərarların icrası vəziyyəti və görülən işlər müzakirə edildikdən sonra partiya daxili məsələlərə baxılıb. Xaricdə yaşayan müsavatçıların fəaliyyətini tənzimləyən Əsasnamə layihəsi təsdiq olunub. Sonra partiyanın mərkəzi icra aparatının yaradılması ilə bağlı Müsavat Partiyası başqanının qəbul etdiyi Əsasnamə olduğu kimi təsdiq edilib.

Bundan sonra toplantıda ölkədəki ictimai-siyasi və sosial-iqtisadi durum müzakirə olunub. Hökumətin enerji daşıyıcılarının qiymətlərinin və kommunal xərclərin artırılması ilə bağlı qərarı ətrafında geniş fikir mübadiləsi aparılıb və bununla bağlı xüsusi qərar qəbul edilib. Qərarda hökumətin xalqa zidd bu addımı qətiyyətlə pislənilib və bununla bağlı kütləvi aksiyaların keçirilməsi məqsədə uyğun sayılıb. Divan qərara alıb ki, kütləvi aksiyaların keçirilməsi üçün ölkədəki digər siyasi qüvvələrlə məsləhətləşmələrə başlanılsın. Hökumətdən əhalinin sosial müdafiəsi üçün bir sıra vacib tədbirlərin həyata keçirilməsi və həmin tədbirlər görülənədək qiymətlərin artırılması ilə bağlı qərarın icrasının dayandırılması tələb edilib. Divanın toplantısında iştirak edən Millət Vəkilləri ilə birgə qərara alınıb ki, Müsavat Deputat Qrupu məsələnin Milli Məclisdə müzakirəsi üçün parlamentin növbədən kənar iclasının çağırılması təşəbbüsü ilə çıxış etsin.

Daha sonra toplantıda son vaxtlar Milli Orduda yaranmış vəziyyət, xüsusi ilə Azərbaycan əsgərlərinin tez-tez ermənilərə əsir düşməsi ilə bağlı müzakirələr aparılıb və Müsavat Deputat Qrupuna həvalə edilib ki, bununla bağlı Milli Məclisdə xüsusi təhqiqat komissiyasının yaradılması təşəbbüsü ilə çıxış etsinlər.
Axırda cari məsələlərə baxılıb.

Müsavat Partiyasının mətbuat xidməti, 08 yanvar 2007-ci il