Müsavat Partiyası Divanının bəyanatı

Son dövrlər İran rejiminin rəsmi dairələrinin Azərbaycan Respublikasına qarşı dostluq və mehriban qonşuluqla bir araya sığmayan hərəkətləri narahatlıq yaradacaq həddə çatmışdır. İran hakimiyyətinin təmsilçilərinin Azərbaycan Resbuplikasını “Şimali İran” adlandırması, bəzi rəsmi qəzetlərdə ölkəmizin itirilmiş İran torpaqları kimi təqdim edilməsi, İran televiziyalarında, xüsusən də Azərbaycan dilində yayımlanan “Səhər” proqramında bəzi siyasi liderlərimizin təhqir olunması yolverilməzdir.
Müsavat Partiyasının Divanı ölkəmizin ərazi bütövlüyü, suverenliyi və sərhədlərinin toxunulmazlığına qarşı qonşu İranın yaxın tarixdə atdığı addımları da nəzərə alaraq bəyan edir:

1. İranın rəsmi dairələrinin ölkələrimiz və xalqlarımız arasında tarixi dərinliyi olan ikitərəfli münasibətlərin normal inkişafına zərər vuran, Azərbaycan Respublikasının həyati vacib maraqlarını təhdid edən hərəkətləri pislənilsin;

2. İran İslam Respublikasının KİV-lərində Azərbaycanın tarixi və mədəniyyəti haqqında məqsədyönlü şəkildə təhrif olunmuş, əlli milyona yaxın Azərbaycan türkünün milli heysiyyatına toxunan yazıların dərc olunmasına və dini ideyaların təbliği adı altında ölkəmizin daxili işlərinə qarışmağa, separatizm meylləri yaratmağa, eyni zamanda islam inqilabı ideyalarını ixrac etməyə son qoyulsun;

3. İslam təəssübkeşliyi ilə öyünən İİR-nın, Azərbaycan ərazisinin böyük bir hissəsini işğal edən, on minlərlə müsəlmanı qətl edən, bir milyonadək insanı öz vətənində didərgin edən Ermənistanla münasibətlərinə yenidən baxılsın;

4. İranda yaşayan Azərbaycan türklərinin milli-mədəni hüquqlarına və insan haqlarına hörmətlə yanaşılsın.

Müsavat Partiyasının mətbuat xidməti, 11 dekabr 2006-cı il