Müsavat Partiyasının başqanı İsa Qəmbər görkəmli şair Ramiz Rövşəni 60 illik yubileyi münasibətilə təbrik edib

Təbrikdə deyilir:

“Hörmətli Ramiz bəy!

60 illik yubileyinizi təbrik edir, Sizə uzun ömür, can sağlığı və yeni-yeni yaradıcılıq uğurları arzulayıram.

Siz Azərbaycan ədəbiyyatının görkəmli simalarından birisiniz. Sizin şerləriniz həm forma, həm də məzmun baxımından bütövlükdə poeziyaya yeni nəfəs gətirib, onu daha da zənginləşdirib.
Siz sağlığındaykən klassik adını qazanmış çox nadir sənətkarlardansınız . Bu gün Azərbaycanda poeziya ilə, ədəbiyyatla maraqlanan çox az adam tapılar ki, Ramiz Rövşən şerinin vurğunu olmasın. Bu şerləri əzbərdən bilən minlərlə insan, özü üçün böyük bir yaradıcılıq məktəbi hesab edən onlarla, yüzlərlə gənc sənətkar var.
Xalqımız Sizi təkcə görkəmli bir sənətkar kimi yox, həm də böyük, bütöv bir şəxsiyyət kimi tanıyır. Çünki Ramiz Rövşən öz şerlərində tərənnüm etdiyi bəşəri dəyərlərə şəxsi həyatında da həmişə sadiq qalıb. Siz ölkəmizin, xalqımızın həyatının ən çətin və məsuliyyətli anlarında obyektiv, prinsipial mövqe nümayiş etdirmiş, şəxsi ləyaqət və fədakarlıq nümunəsi göstərmisiniz. Təsadüfü deyil ki, bu gün ictimai rəydə Siz əsl ziyalılıq etalonu kimi qəbul edilirsiniz.

Hörmətli Ramiz bəy!

Bir daha Sizi yubiley münasibətilə təbrik edir, şəxsi həyatınızda xoşbəxtlik, bütün sahələrdəki fəaliyyətinizdə uğurlar arzulayıram. Ümid edirəm ki, yeni-yeni böyük sənət əsərləriylə hələ bundan sonra da bizi çox sevindirəcək, ədəbiyyatımızın zənginləşməsinə misilsiz töhfələr verəcəksiniz.

Müsavat Partiyasının mətbuat xidməti, 15 dekabr 2006-cı il