Rusiyalı jurnalistdən maraqlı cavab
 
“Exo Moskvı”nın baş redaktoru İsa Qəmbərdən də müsahibə götürmək istəyir

Xəbər verdiyimiz kimi, Rusiyanın “Exo Moskvı” radiosunun baş redaktoru Aleksey Venediktov Azərbaycanın dövlət başçısı İlham Əliyevdən geniş müsahibə götürüb. Bir neçə gün ölkəmizdə qonaq olan Venediktovla “Exo” qəzetindən olan həmkarlarımız da söhbət ediblər.
Jurnalistlərin çeşidli suallarına cavab verən Aleksey Venediktov Azərbaycana gəlişinin məqsədini açıqlayıb, medianın çağdaş vəziyyətinə və s. məsələlərə toxunub. Jurnalistlərdən birinin “Azərbaycanda prezidentdən başqa elə siyasətçi varmı ki, siz onunla müsahibə hazırlamaq istərdiniz?” sualına isə rusiyalı həmkarımız belə cavab verib: “...Biz xaricdən ölkəmizə (Rusiyaya - S.M.) səfərə gələn baş nazirlərlə, parlament üzvləri ilə, hətta tanınmış müxalifət liderləri ilə müsahibələr götürməyə cəhd edirik. Bizim üçün fərqi yoxdur bu ABŞ dövlət katibidir, yoxsa Azərbaycanın, Boliviyanın və ya Lüksemburqun xarici işlər naziri. Təki həmin ölkələrdə Rusiyanın marağı olsun. Biz həmin anda ona dəvətnamə göndəririk. Əgər sizin müxalifətin lideri İsa Qəmbər Moskvaya səfər edərsə, əlbəttə ki, biz çalışacağıq ki, ondan müsahibə götürək. Buna şübhəniz olmasın”.

Yeni Müsavat qəzeti, 27 dekabr 2006-cı il, Səbuhi MƏMMƏDLİ