Müsavat Partiyasının müraciəti

“Monitor” jurnalının baş redaktoru Elmar Hüseynovun vəhşicəsinə qətlə yetirilməsindən iki il vaxt keçir. Bu qətlin üstünün tez bir zamanda açılacağına ən yüksək səviyyədə söz verilməsinə baxmayaraq ki, ötən iki il ərzində nəinki qətlin sifarişçiləri və icraçıları tapılmayıb, əksinə cinayət işinin istintaqında gün-gündən irəliləyişlər əvəzinə geriləmə baş verir. İstintaqı aparan qurumların davranışları açıq-aydın göstərir ki, hakimiyyət bu qətlin üstünü açmaqda maraqlı deyil. Əslində Elmar Hüseynovun qatillərinin Əliyev rejimi dövründə heç vaxt tapılmayacağını

biz hələ faciənin baş verdiyi günlərdə söyləmişdik. Çünki sifarişçi və icraçıların kim olmasından asılı olmayaraq Elmara açılan güllə rejimin atdığı güllə idi. Əliyev rejiminin bütün bu illər ərzində müstəqil, azda mətbuata və onun təmsilçilərinə qarşı yeritdiyi repressiv siyasət belə deməyə əsas verir. Ayrı-ayrı mətbuat orqanlarının müxtəlif səpgili təzyiqlərlə üzləşməsi, hətta birdəfəlik bağlanması, jurnalistlərin döyülməsi, qanunsuz olaraq həbsə atılması, ölümlə hədələnməsi və nəhayət, öldürülməsi artıq adi normaya çevrilib.

Son vaxtlar “Realnıy Azerbaydjan” və “Gündəlik Azərbaycan” qəzetlərinin redaksiyalarına edilən basqınların, hər iki qəzetin baş redaktoru Eynulla Fətullayevə qarşı aparılan böhtan kampaniyasının da hakimiyyət tərəfindən təşkil edilməsi heç kimdə şübhə doğurmur. Bu gün artıq onun həyatına real təhlükə yaranıb.
Müsavat Partiyası bir daha hakimiyyətdən azad sözə, müstəqil mətbuata qarşı basqıları dayandırmağı, “Realnıy Azerbaydjan” və “Gündəlik Azərbaycan” qəzetlərinin kollektivinə, həmin qəzetlərin baş redaktoru Eynulla Fətullayevə qarşı təqiblərə son qoymağı tələb edir.

Biz habelə mərhum jurnalist Elmar Hüseynovun qətlinin 2-ci ildönümündə ölkədəki bütün ictimai-siyasi təşkilatlara, vətəndaş cəmiyyəti institutlarına, eləcə də beynəlxalq təşkilatlara müraciət edərək cinayətkarların tapılıb cəzalandırılması üçün hakimiyyətə təzyiqləri artırmağa çağırırıq.

Müsavat Partiyasının mətbuat xidməti, 01 mart 2007-ci il