Növbəti toplantı

Bu gün Müsavat Partiyasının Divanının növbəti iclası keçirilib. Öncə Müsavat Partiyasının Başqanı İsa Qəmbər Güney Azərbaycan Milli Oyaniş Hərəkatının rəhbəri Mahmudəli Çöhrəqanlının 50 yaşının tamam olduğunu bildirib və bu münasibətlə Müsavat Partiyası və şəxsən öz adından onu təbrik edib. Müsavat Başqanı Mahmudəli Çöhrəqanlıya apardığı işdə ona uiğurlar arzulayıb və bildirib ki, bu haqq davasında Müsavat Partiyası həmişə Mahmudəli Çöhrəqanlının yanında olacaq. İsa Qəmbər M. Çöhrəqanlıya şəxsi həyatında xoşbəxtlik və uzun ömür arzulayıb.

Toplantıda qərarların icra vəziyyətinə və görülən işlərə baxıldıqdan sonra partiyadaxili məsələlər müzakirə edilib. Divan üzvü Gülağa Aslanlı Lənkəran Şəhər Təşkilatının növbəti konfransı barədə məlumat verib. O bildirib ki, konfrans yüksək səviyyədə keçib və Yadigar Sadiqov yenidən rayon təşkilatına sədr seçilib. Daha sonra qarşıdan gələn 18 mart mitinqi ilə bağlı müzakirələr aparılıb və mitinqə hazırlığı gücləndirməklə bağlı müvafiq qərarlar qəbul edilib, Divan üzvlərinə konkret tapşırıqlar verilib.

Toplantıda həmçinin son vaxtlar cəmiyyətin diqqətində olan bir məsələ- sabiq səhiyyə naziri Əli İnsanovun məhkəmə prosesi ilə bağlı fikir mübadiləsi aparılıb. Qeyd edilib ki, bu məhkəmə prosesi də bütün əvvəlki dövrlərdə keçirilmiş siyasi proseslər kimi birtərəfli və qərəzli aparılır. Müdafiə hüququ ardıcıl şəkildə pozulur, məhkəmə iclasının gedişinə faktiki olaraq hakim yox, prokuror nəzarət edir. Məhkəmə prosesi qeyri-şəffaf keçirilir, müxalifət və müstəqil mətbuat nümayəndələri müxtəlif bəhanələrlə iclas zalına buraxılmırlar . Bundan əlavə ittiham olunan şəxsin hüquqları kobud şəkildə pozulur, onunla qeyri-insani rəftar edilir ki, bu da hətta məhkəmə prosesinin keçirildiyi dövrdə belə müttəhimlərə təzyiq göstərmək və işgəncə verməkdən başqa bir şey deyil. Partiyanın Divanı bütün bunların yolverilməz olduğunu qeyd edib və bu hakimiyyətdən özbaşınalıqlara son qoyulmasını tələb edib.
Axırda cari məsələlərə baxılıb.

isagambar.az, Bakı, 05 mart 2007-ci il