Növbəti toplantı

Bu gün Müsavat Partiyası Divanının növbəti toplantısı keçirilmişdir. Gündəlikdə görülən işlər, partiyadaxili və ictimai-siyasi məsələlər yer alıb.

Partiyadaxili məsələnin müzakirəsi zamanı Ağcabədi RT-nın və Müsavat Gənclər Təşkilatının konfransına hazırlıq haqqında fikir mübadiləsi aparılıb.

İctimai-siyasi vəziyyətə dair məsələnin müzakirəsi zamanı əsas diqqət Seçki Məcəlləsinə dəyişikliklərlə bağlı noyabrın 9-da keçiriləcək iqtidar-müxalifət görüşünə yönəlib. Venesiya Komissiyasının planlaşdırdığı bu dəyirmi masanın IFES-in təşkilatçılığı ilə keçirilməsi təşəbbüsünə qarşı müxalifət liderlərinin etiraz etməsi və bu tədbirdə iştirakdan imtina edilməsi qərarı düzgün hesab edilib. Qeyd olunub ki, həmin görüş əvvəlcədən nəzərdə tutulduğu kimi, VK-nın təşəbbüskarlığı ilə keçiriləcəyi təqdirdə iştirak etmək olar.

Divanda, həmçinin son vaxtlar regionda gedən proseslər barədə fikir mübadiləsi aparılıb.

Yığıncağın sonunda bir sıra cari məsələlər baxılıb.

isagambar.az, 05 noyabr 2007-ci il, Bakı