Müsavat Partiyasının bəyanatı

Keçmiş səhiyyə naziri Əli İnsanov bu günkü məhkəmə prosesində son söz söyləyərkən bir sıra mühüm faktlar açıqlayıb. Ə. İnsanov deyib ki, 2003-cü ilin avqustunda mərhum dövlət başçısı Heydər Əliyev koma vəziyyətində olub və o, İlham Əliyevin baş nazir təyin olunması ilə bağlı sərəncam imzalaya bilməzdi. Daha sonra Ə. İnsanov deyib ki, qeyri-qanuni olaraq baş nazir postunu ələ keçirmiş İ. Əliyev sonrakı mərhələdə prezident seçkilərini ciddi səkildə saxtalaşdırıb.

İ. Əliyevi baş nazir təyin edərkən H. Əliyev koma vəziyyətində olduğuna görə də belə bir sərəncamın imzalamaq imkanında olmaması barədə fikirlər həmin vaxt və ondan sonrakı dövrlərdə həm ölkə, həm də xarici mətbuat səhifələrində çox səslənib. Bununla bağlı hətta müxtəlif araşdırmalar aparmağa da cəhdlər göstərilib. Lakin rəsmi hakimiyyət orqanları bu fikirləri qulaqardına vurub, araşdırma aparmaq istəyən insanlara ciddi təzyiqlər göstərərək bunun qarşısını alıblar. Həmin dövrdə ölkənin səhiyyə naziri işləmiş və H. Əliyevin faktiki şəxsi həkimi olmuş bir şəxs tərəfindən bu faktların açıqlanması sübut edir ki, İ. Əliyevin baş nazir təyin olunması barədə verilmiş sərəncam həqiqətən saxtadır. Yəni, İ. Əliyev hakimiyyəti qeyri-qanuni yollarla ələ keçirib. Bu isə ölkədə prezident hakimiyyətinin qeyri-legitimliyi haqqında deyilən fikirləri bir daha təsdiq edir.

Müsavat Partiyası ölkədəki bütün ictimai-siyasi qüvvələri məsələyə ciddi münasibət göstərməyə çağırır. Biz habelə respublika baş prokurorluğundan fakt üzrə cinayət işi qaldırılmasını, Milli Məclisdən isə məsələnin hüquqi-siyasi tərəflərinin ətraflı şəkildə araşdırılması üçün xüsusi parlament komissiyasının yaradılmasını tələb edirik.

Müsavat Partiyası Mətbuat Xidməti
Bakı, 10.04.2007