Növbəti toplantı

Bu gün Müsavat Partiyası Divanının növbəti yığıncağı keçirilib. Gündəlik qərarların icrası, görülən işlər, partiyadaxili və ictimai-siyasi vəziyyətə dair məsələlərdən ibarət olub.

Partiyadaxili məsələdə rayon təşkilatlarının fəaliyyəti haqda müzakirələrə başlanıb. Gülağa Aslanlının Yasamal RT haqqında təqdim etdiyi məlumat dinlənilib və nəzərə alınıb.

Daha sonra 1918-ci il 15 sentyabr tarixində Bakının işğaldan azad olunmasının ildönümü ilə bağlı keçiriləcək tədbirlər müzakirə edilib. Bununla bağlı sentyabrın 14-də saat 11.00-da Şəhidlər Xiyabanında Türk əsgərlərinin şərəfinə ucaldılmış abidənin ziyarət edilməsi, saat 12.00-da isə partiya qərargahında Müsavat rəhbərliyinin, ziyalıların və tarixçilərin iştirakı ilə geniş tədbir keçirilməsi qərara alınıb.

Toplantıda son vaxtlar ölkədəki bir sıra siyasi qüvvələrin proporsional seçki sisteminin bərpası və dövlət idarəçiliyinə dair islahatların həyata keçirilməsi istiqamətində təşəbbüsləri də müzakirə olunub. Qeyd edilib ki, bu məsələlər Partiya Məclisinin iyun ayında keçirilən sonuncu toplantısında partiyanın fəaliyyətinin prioritet istiqaməti kimi müəyyənləşdirilib və Müsavat Partiyasının bu istiqamətdə keçiriləcək müzakirələrdə yaxından iştirakı məqsədəuyğun hesab edilib. Sonra 2008-ci ildə keçiriləcək Prezident seçkilərinə hazırlıqla bağlı ilkin müzakirələr başlayıb.

Yığıncaqda İranda yaşayan soydaşlarımızın öz ana dilində təhsil almaq üçün oktyabrın 1-də keçiriləcək aksiyasına mənəvi dəstək ifadə olunub. Bundan əlavə İraq-Türkmən cəbhəsinin rəhbərlərinin Bakıya səfəri və bu səfər çərçivəsində onların partiya rəhbərliyi ilə görüşlərində qaldırdıqları problemlərlə bağlı müzakirələr aparılıb. Qərara alınıb ki, həm ölkə, həm də dünya ictimaiyyətinin İraq türkmənlərinin problemlərinə diqqətini cəlb etmək üçün partiya xüsusi bəyanatla çıxış etsin.

Partiyanın Divanı Mübarək Ramazan ayının gəlişi münasibəti ilə Azərbaycan xalqını təbrik edib və arzularının, niyyətlərinin həyata keçməsini arzulayıb.

Yığıncağın sonunda cari məsələlərə baxılıb.

isagambar.az, Bakı, 10 sentyabr 2007-ci il