MÜSAVAT MƏCLİSİNƏ BOŞ QALAN YERLƏRƏ SEÇKİLƏR KEÇİRİLƏCƏK
Divanın dünənki toplantısında bununla bağlı qərar verilib

Dünən Müsavat Partiyası Divanının növbəti toplantısı keçirilib. Toplantıda qərarların icrası, ictimai-siyasi vəziyyət və partiyanın vəzifələri ilə bağlı məsələlər müzakirə olunub. Divanda həmçinin Sumqayıt şəhərində “Azərkimya” Dövlət Şirkətinə məxsus 4 iri müəssisənin bağlanması nəticəsində 10 minədək insanın işsiz qalması da müzakirə olunub.

Divan hesab edir ki, bu qədər adamın iş yerini itirməsi yeni iş yerlərinin yaradılması haqqında vaxtaşırı cəmiyyətə yalan məlumatlar ötürən iqtidarın apardığı səriştəsiz və xalqazidd iqtisadi siyasətinin nəticəsidir.
Divanda həmçinin partiya Məclisinin növbəti sessiyasının martın 31-də keçirilməsi haqqında qərar qəbul edilib. Məclisin sessiyasının gündəliyinin layihəsi təsdiq edilib. Bu sessiyada Məclisdəki boş yerlərə seçkilər keçirilməsi nəzərdə tutulub. İddiaçılar 14 martdan başlayaraq 27 mart saat 18:00-dək ərizələrini Məclisin rəhbərliyinə təqdim edə bilərlər.

Bakıda keçirilmiş Türkiyə-Azərbaycan diaspor liderlərinin forumu da müzakirə olunan məsələlər sırasında olub. Divan belə bir tədbirin keçirilməsini təqdir etsə də, foruma dəvətlərin siyasi konyuktura əsasında aparılmasına, müxalifət nümayəndələrinin ora dəvət olunmamasına etirazını bildirib. Eyni zamanda forumda Güney Azərbaycanda yaşayan soydaşlarımızın hüquqlarının tapdanmasına prinsipial qiymət verilməməsi də təəssüflə qarşılanıb.

XATİRƏ, "Yeni Müsavat" qəzeti, 13.03.2007