Müsavat Partiyası Divanının növbəti toplantısı olub

Bu gün Müsavat Partiyası Divanının növbəti toplantısı keçirilib. Öncə Müsavat Partiyasının Başqanı İsa Qəmbər D. Əliyeva adına Qadın Hüquqlarının Müdafiəsi Cəmiyyətinin sədri, Müsavat Partiyası Başqanının müşaviri Novella Cəfəroğlunu ölkədə insan hüquqlarının müdafiəsi sahəsindəki xidmətlərinə görə ABŞ Dövlət Departamentinin təsis etdiyi mükafata layiq görülməsi münasibəti ilə Divan adından təbrik edib.

Qərarların icra vəziyyəti və görülən işlərə baxıldıqdan sonra, ölkədəki ictimai-siyasi vəziyyət müzakirə edilib. AŞ PA-da Azərbaycanın öhdəliklərin yerinə yetirilməsi ilə bağlı bu gün keçirilən müzakirələr ətrafında fikir mübadiləsi aparılıb. AŞ PA-ya dəvət olunan müxalifət nümayəndələrinin və hüquq müdafiəçilərinin hazırladıqları və Müsavat Partiyası Başqanı tərəfindən imzalanmış sənəd barədə Divan üzvlərinə məlumat verilib. Keçmiş səhiyyə naziri Əli İnsanovun İlham Əliyevin Baş Nazir təyin olunması ilə bağlı söylədiyi fikirlərlə əlaqədar fakt üzrə cinayət işinin qaldırılması üçün respublika prokurorluğuna göndərilən müraciətin mətni müzakirə edilib və qəbul olunub.

Toplantıda aprelin 21-də partiyanın qərargahında talassemiyalı xəstələr üçün qanvermə kampaniyasının aparılması barədə qərar qəbul edilib.

Axırda cari məsələlərə baxılıb.

Müsavat Partiyasının Mətbuat Xidməti, 16.04.2007