Müsavatın 3-cü etiraz aksiyası
Minlərlə insan bu rejimə YOX dedi!

Müsavat Partiyası bu ilin 3-cü aksiyasını - martın 18-də saat 15-dən 17-dək Bakının Həzi Aslanov m/s-dan Ukrayna meydanınadək yürüş-mitinqini uğurla başa çatdırdı. Mitinqi İbrahim İbrahimli aparırdı. Mitinqdə Millət Vəkili Pənah Hüseynov, gənclərin nümyəndəsi Tural Abbaslı, Müsavat başqanının müşaviri, Səxavət Əlisoy, keçmiş səhiyyə naziri Əli İnsanovun hüquqlarını müdafiə komitəsinin sədri Rizvan Talıbov və Müsavat başqanı İsa Qəmbər çıxış etmişlər!

Çıxışları diqqətinizə çatdırırıq:

“Quldurluğa görə bu hakimiyyət mühakimə olunmalıdır”

Müsavat deputat qrupunun üzvü Pənah Hüseyn bunun səbəbini izah edərək bildirdi ki, araşdırma aparılarkən əraziyə verilən enerjinin gərginliyi cəmi 160 voltdur və ona görə də elektrikdən normal şəkildə istifadə etmək mümkün olmur: “Bunlar bizə keyfiyyətsiz, zay mal verib cibimizə girirlər. Bu, Azərbaycan miqyasında 100 milyonlarla ölçülən bir oğurluqdur. Biz ciblərimizdən oğurlanan bu vəsaiti mənimsəyən adamlara, konkret olaraq “Azərenerji”yə və onun rəhbərliyinə xalq oğrusu deməyib nə deyək? Bunlar oğrudur. İkincisi bu, bir soyğunçuluqdur. Bizə nəinki keyfiyyətsiz mal verirlər, hətta istifadə eləmədiyimiz mal, məsələn, elektrik enerjisi üçün pul tələb edirlər. Bu, təkcə soyğunçuluq deyil, quldurluqdur. Oğurluq, soyğunçuluq və quldurluğa görə isə bunlar bizə cavab verməlidir. Bu adamlar mühakimə olunmalı və onlardan kompensasiya istənilməlidir".

Millət vəkili işıqla bərabər, vətəndaşlara keyfiətsiz qaz verilməsindən, sayğaclara da hansısa əməllərin edilməsindən danışdı. P.Hüseyn dedi ki, Azərbaycanda bütün sahələrdə quldurluq, soyğunçuluq, əliəyrilik müşahidə olunur. Natiq Fövqəladə Hallar Nazirliyinin bahalı, çoxlu yanacaq işlədən maşınlarından da bəhs etdi: “Əgər enerji qıtlığı varsa, qənaət lazımdırsa, xalqın inkidi ağır vəziyyətində qudurğanlıq etməyin mənası nədir? Özlərini bizə göstərirlər”. Çıxışçı Dövlət Əmlakının İdarə Olunması və Dövlət Əmlakının Özəlləşdirilməsi Komitəsinin fəaliyyətini də kəskin tənqid etdi. Bildirdi ki, Əli İnsanovun məhkəməsində səslədirilən özəlləşdirmə ilə bağlı faktlar bu komitənin nə işlə məşğul olduğunu, milyardlarla pulu mənimsədiyini, bu qurumun əslində dövlət əmlakının talan olunması komitəsi olduğunu göstərir: “Dövlət əmlakını bu cür adamlara tapşırmaq təqribən qoyunu canavara tapşırmaq kimi bir şeydir. Kərəm Həsənov canavar-zad deyil, canavarlar başqalarıdır. Biz xalqın bu həqiqi, sürüyeyən canavarlardan xilas olmasını tələb edirik. Xilas edə bilmirlərsə, getsinlər”.

P.Hüseyn təmsil olunduğu rayonların timsalında bütün bölgələrin ağır problemlərlə üzləşdiyini konkret faktlarla söylədi: “Məncə, Müsavat Partiyası da bəyan etməlidir ki, biz bu gün hakimiyyət uğrunda yox, ailəmizin, uşağımızın, ata-anamızın yaşayışı uğrunda mübarizə aparırıq. Görün vəziyyət hansı həddə gəlib çatdı ki, Sirus Təbrizli dedi “qardaş, yalan danışmayın, bu iş yerləri yoxdur, camaat işıq, qaz tapmır, dövlət başçısına yalan məlumat verməyin”. Daha sonra P.Hüseyn deputat Hüseyn Abdullayevin də hökumətin nağıllarına etiraz etdiyini xatırlatdı. Sonra o, maraqlı “açıq səsvermə” keçirdi. O, “Fəzail Ağamalını, yoxsa Hüseyn Abdullayevi haqlı sayırsınız” deyə meydana müraciət etdi. F.Ağamalıya bir nəfər də olsa “səs” verən olmasa da, H.Abdullayevin adı gələndə yüzlərlə əl havaya qalxdı. Pənah bəy bildirdi ki, bu ölkədə sosial inqilabı müxalifət yox, İqtisadi İnkişaf və Maliyyə nazirlikləri hazırlayır: “Çünki bu cür siyasi kursun axırı yoxdur”.
Deputat əhalini mövcud ağır durumdan çıxarmaq üçün Müsavat başqanının çıxış yolu göstərdiyini də bildirdi. Qeyd etdi ki, hökumət əhalinin kommunal borclarını ləğv etməlidir. P.Hüseyn yekunda bütün xalqı öz haqqı uğrunda mübarizə aparmağa, bütün təşkilatları Tanrının yaratdığı şansdan yararlanıb birləşməyə çağırdı: “Biz bu vəziyyətdən mütləq çıxacağıq və qalib gələcəyik”.

Gəncliyə mesaj: “Hakimiyyəti layiq olduğu yerə göndərək!”

Azərbaycan gəncliyi adından danışmaq üçün söz alan Tural Abbaslı bildirdi ki, qiymət artımının ən böyük zərbəsi elə onlara dəyib: “Bu gün Azərbaycan gəncliyi elmlə məşğul olmaq, təhsil haqqında düşünməli olduğu halda, müvəqqəti iş yerlərində çalışır. Azərbaycan gəncliyinin böyük əksəriyyəti “konduktor”dur. Bu, məqsədyönlü siyasətin tərkib hissəsidir. Amma öz övladları nəinki Azərbaycanda, xarici dövlətlərdə təhsil alırlar. Sadə insanların övladları isə təhsil almaq əvəzinə, universitet rəhbərliyilə danışıb işləyirlər ki, təhsilhaqqını ödəyə bilsinlər”. T.Abbaslı hakimiyyətin lazımsız yerlərdə körpülər, keçidlər tikdirməklə xalqın gözünə kül üfürdüyünü bildirdi: “Kimə lazımdır bu lazımsız keçidlər? Əyalətlərdə gənclər qalmayıb, əksəriyyəti Türkiyəyə, Rusiyaya, özü də hambal işləməyə gedirlər. Budurmu İlham Əliyevin, yaxud bunların ümummilli liderinin uzaqgörən siyasəti? Bizə belə hakimiyyət lazım deyil”. Natiq həmyaşıdlarının problemlər ucbatından ailə qura bilmədiyini də söylədi. Bildirdi ki, gənclərin son qəpiyinə də göz dikən hakimiyyəti qəbul etmirlər: “Bu hakimiyyəti layiq olduğu yerə, özləri deyən kimi, tarixin arxivinə göndərmək lazımdır”. T.Abbaslı Azərbaycan gəncliyinin müti olmadığını, yatmış şir olan gəncliyin öz vaxtını gözlədiyini dedi və həmyaşıdlarını mübarizəyə səslədi.

“Haqqımızı tələb etməyincə, onu geri ala bilməyəcəyik”

Müsavat başqanının müşaviri Səxavət Əlisoy Sumqayıtda həkim həmkarları ilə söhbəti xatırlamaqla sözə başladı: “Onlar dedilər ki, İlham Əliyev hər il bizim maaşımızı bir-iki kiloqram qoyun ətinin pulu miqdarında artırır. Müəllimlərə də münasibət eynidir. Əcəba, bir vaxtlar ən mübariz xalq olan Azərbaycan xalqı indi bir-iki kiloqram qoyun ətindən ötrü haqq sözünü deməkdənmi qorxur? Belədirsə, bu, dəhşətdir. Biz haqqımızı tələb etməyincə, onu geri ala bilməyəcəyik”. S.Əlisoy xatırlatdı ki, Kommunist Partiyası sıralarında 500 min nəfər üzv olanda dağıldı: “YAP-ın da üzvlərinin sayı 500 min nəfərə çatıb. YAP dağılır, özü də yuxarıdan”. Natiq YAP üzvü olan həkimlərə müraciət etdi: “YAP-ın yaradıcılarından biri olmuş Əli İnsanov bu gün bu partiyanı “yaramaz partiya” adlandırırsa, hansı mənəviyyatla o partiyanın sıralarında qalmaq olar? Özünüzdə təpər tapıb, YAP üzvlüyündən imtina edin. Bu partiyanın rəhbərliyində cinayətkarlar, adam öldürənlər azmıdır? Bunu biz yox, YAP-ı yaradanlar deyirlər. Dünən Sirus Təbrizli, srağagün Əli İnsanov, Əli Əlirzayev dedi, sabah onların sayı artacaq”.
Daha sonra analoji sözlərlə müəllimlərə müraciət edən S.Əlisoy Cəfər Cabbarlının şerindən misal gətirəndən sonra “YAP-ın altından biri çıxandan sonra o partiyanın guppultusunu görəcəksiniz” dedi.

Qərbi azərbaycanlıların mitinqi azadlıq meydanında olacaq

Meydan çıxış üçün söz verilən Əli İnsanovun Hüquqlarını Müdafiə Komitəsinin sədri, Qayıdış Birliyinin rəhbəri Rizvan Talıbovu yüksək səviyyədə qarşıladı. Kifayət qədər səviyyəli çıxışı ilə yadda qalan R.Talıbov ölkə insanının başına gətirilən oyunlardan bəhs etdi: “Mən inanıram ki, Azərbaycan xalqı öz haqqını bu rejimdən alacaq, bu dilənçilikdən, səfalətdən qurtaracaq. Buna inandığım üçün də Müsavat və KAXCP-nin təşkil etdiyi mitinqə qoşulmuşam. Bütün tərəfdarlarımı, bütün ermənistanlıları bu korrupsiya və rüşvətə uğramış rejimə qarşı bütün müxalifət qüvvələrinə dəstək verməyə çağırıram”. Rizvan bəy ermənistanlıların guya hakimiyyətdə təmsil olunması səbəbindən iqtidarı dəstəklədiyi haqda fikirləri “ağ yalan” adlandırdı. Eyni zamanda xalqa müraciət etdi: “Evdə oturmayın, əzizlərim, mübarizə, haqq-ədalətin bərpa zamanı gəlib çatıb”. R.Talıbov hakimiyyətə işləyən televiziyalara da müraciətlə onları xalqa xidmət etməyə səslədi. Natiq daha sonra kütləvi tədbirlərin şəhər mərkəzində keçirilməsi təşəbbüsü ilə çıxış etdi: “Biz bu aksiyamızı Prezident Aparatı, Hökumət Evinin qarşısında, Azadlıq meydanında keçirməliyik”.
Onun bu təklifi razılıqla qarşılandı və meydan uzun müddət “Azadlıq!”, “İstefa!” hayqıraraq dəstək verdi. Ardınca R.Talıbov “70 faizi ermənistanlılardan ibarət olan” polislərə üz tutub onları salamladı. Eyni zamanda onları qanunçuluğu pozanların keşiyində durmamağa çağırdı. Ermənistanlı toplumun da xalqın maraqları uğrunda mübarizəyə hazır olduğunu bəyan etdi. Bildirdi ki, Qayıdış Birliyi aprelin 25-də keçirəcəyi toplantısında davamlı kütləvi etiraz aksiyalarına başlamaq qərarını verəcək: “Biz Azərbaycanın gələcəyi uğrunda mübarizə aparan qüvvələrə dəstək vermək haqqında qərar layihəsi hazırlamışıq. Bizim aksiyalarımız yalnız və yalnız Azadlıq meydanına sığa bilər. Biz bu aksiyanı bütün müxalifətlə birgə o meydanda keçirəcəyik. Xalqın haqqını yeyənlərə, ermənilərlə qohum olanlara qalib gələcəyik”.
Yekunda YAP ideoloqu Sirus Təbrizlinin çağırışına uyğun olaraq Milli Parkda etiraz gəzintisinə səsləyən R.Talıbov eks-nazir Əli İnsanovu müdafiə edənlərə təşəkkürünü bildirərək elm adamını həbsdə saxlayanları lənətlədi.
Daha sonra Müsavat başqanı İsa Qəmbərə söz verildi.

Mitinqin yekununda qəbul edilən qətnamədə bahalaşma ilə bağlı qərarların dərhal ləğvi, əhalinin aztəminatlı təbəqələrinin sosial vəziyyətini yaxşılaşdırmaq üçün ciddi tədbirlərin həyata keçirilməsi, əmək haqları təqaüdlər və digər xarakterli yardımların ciddi surətdə artırılması, əhalinin kommunal xərclər və enerji daşıyıcıları ilə bağlı dövlətə olan bütün borclarını silinməsi, korrupsiya, rüşvətxorluq, məmur özbaşınalığına qarşı sərt tədbirlərin görülməsi tələbləri əksini tapırdı. Yüksək əhval-ruhiyyə ilə keçirilən etiraz tədbiri dövlət himninin oxunması ilə yekunlaşdı.

Mitinqin əsas şüarları bunlar idi:

- "İşıq pulu, qaz pulu - hanı Ceyhanın pulu?"
- "Bahalaşdı yanacaq, yox iqtidarda qanacaq..."
- "Qaz, işıq çox baha, yaşamaq olmur daha..."
- "Bahalaşır qaz, işıq, çox pis günə qalmışıq..."
- "İstefa!.."
- "Müsavat!.."
- "İsa bəy!.."
...

Mitinqdə 3-4 min nəfər müsavat fəalı və bitərəf iştirak edirdi. Bakı polis idarəsinin məlumatına görə, 18 mart mitinqinə 500-550 nəfər qatılıb...

Müsavat Partiyasının 18 mart 2007-ci ildə keçirdiyi yürüş-mitinqin qətnaməsi

Hökumətin enerji daşıyıcılarının və digər kommunal xidmətlərin qiymətlərinin birdən-birə kəskin şəkildə artırmaq haqqında qərarı ölkədə sosial-iqtisadi durumu gərginləşdirib, əhalinin əksər təbəqələrinin, xüsusən də aztəminatlı ailələrin vəziyyətini daha da pisləşdirib. Hakimiyyət dairələri, xüsusilə də ölkə başçısı yol verdikləri səhvi düzəltmək əvəzinə nümayişkaranə surətdə, onsuz da, psixoloji durumu gərgin olan xalqı hövsələdən çıxaran uğursuz və səviyyəsiz bəyanatlar verir, ölkədə gərgin olan ab-havanı bir az da gərginləşdirirlər. Bütün bunlar bir daha təsdiq edir ki, “sürətli iqtisadi inkişaf”, “xalqın gündən-günə artan rifahı” haqqında söylənilən nağıllar sabun köpüyü kimi dağılmaqda, hökumətin iqtisadi siyasətinin iflasa uğradığını əyani surətdə təsdiq etməkdədir. Üstəlik korrupsiya və rüşvətin çiçəklənməsi, aydın surətdə nəzərə çarpan özbaşınalıq və anarxiya mühiti, məmur özbaşınalığı və qanunlara hörmətsizlik təkcə xalqın həyat səviyyəsi baxımından yox, həmçinin sahibkarlıq sahəsində də vəziyyəti xeyli dramatikləşdirir. Nəticə etibarı ilə vətəndaşların bu iqtidarın səriştəsiz siyasətinə, ölkə əhalisinə sayğısızlığına etirazları günbəgün genişlənir.

Müsavat Partiyası hesab edir ki, indiki şəraitdə xalqın bütün təbəqələri hakimiyyətin bütün özbaşınalıqlarına qarşı səfərbər olmalı, öz hüquqları uğrunda ardıcıl mübarizəyə qalxmalıdır. Yalnız belə bir şəraitdə ölkədə hökm sürən dərəbəyliyin və qanunazidd hərəkətlərin qarşısını almaq və ölkədəki vəziyyəti normallaşdırmaq mümkündür. Partiya əmindir ki, xalqımız bu anormal hakimiyyətin şıltaqlıqlarına dözməyəcək, onu öz yerində oturtmaq üçün daha geniş birlik və həmrəylik nümayiş etdirərək mübarizəni davam etdirəcək.

Müsavat Partiyasının 18 mart 2007-ci ildə keçirdiyi mitinqin iştirakçıları hakimiyyətin iqtisadi cəhətdən əsaslandırılması mümkün olmayan absurd siyasətini kəskin surətdə pisləyərək tələb edir:

  • geniş xalq kütlələrinin maraqlarına cavab verməyən bu məsuliyyətsiz qərarlar dərhal ləğv edilsin;

  • əhalinin aztəminatlı təbəqələrinin sosial vəziyyətini yaxşılaşdırmaq üçün ciddi tədbirlər həyata keçirilsin, əmək haqları, pensiya, müavinət və digər xarakterli yardımlar ciddi surətdə artırılsın;

  • əhalinin kommunal xərclər və enerjidaşıyıcıları ilə bağlı dövlətə olan bütün borcları ləğv edilsin;

  • korrupsiya və rüşvətxorluğa, inhisarçılığa, məmur özbaşınalığına qarşı sərt tədbirlər görülsün;

  • neft və digər büdcə gəlirləri və onların xərclənməsi üzərində həqiqi ictimai nəzarət və şəffaflıq təmin edilsin, bu gəlirlərdən səmərəsiz istifadəyə son qoyulsun.

Müsavat Partiyasının mətbuat xidməti, 18 mart, 2007-ci il