Müsavat Partiyasının bəyanatı

Bu gecə Müsavat Partiyası Gəncə şəhər təşkilatının qərargahı polis hücumuna məruz qalıb. Polislər gecə saat 1200-da qərargahın kilidlərini qıraraq, oradakı bütün əşyaları özləri ilə gətirdikləri yük maşınına yığaraq, polis idarəsinin həyətinə gətiriblər. Daha sonra Müsavat Partiyası Məclisinin üzvü Cahangir Əmirxanlıya bu haqda məlumat veriblər. C. Əmirxanlı gecə bir neçə müsavatçı ilə polis idarəsinə gələrək, onlara məxsus olan əşyaları geri alaraq, həmin əşyaları öz evinə gətirməyə məcbur olub.
Xatırladaq ki, aprelin 16-da C. Əmirxanlı və digər partiya rəhbərləri ABŞ səfirliyinin Gəncə şəhərində səfərdə olan siyasi məsələlər üzrə müşaviri Rebekka Naslındla həmin qərargahda görüş keçiriblər. Qərargaha edilən bu qəfil hücumun əsas səbəbinin məhz bu görüş olduğu istisna edilmir.
Müsavat Partiyası Gəncə polisinin bu qeyri-qanuni hərəkətlərini qətiyyətlə pisləyir, bunu siyasi partiyaların fəaliyyətini məhdudlaşdırmaq faktı kimi qiymətləndirir. Biz habelə bu hadisənin günahkarlarının dərhal cəzalandırılmasını tələb edirik.

Müsavat Partiyasinin mətbuat xidməti, 18 aprel 2007-ci il