Növbəti toplantı

Bu gün Müsavat Partiyası Divanının növbəti toplantısı keçirilib.

Qərarların icra vəziyyəti və görülən işlər müzakirə edildikdən sonra partiyadaxili məsələlərə baxılıb. Dekabrın 30-u iş günü elan edildiyinə görə Müsavat Partiyası Məclisinin növbəti toplantısının gələn ilin yanvar ayının 12-də keçirilməsi qərara alınıb.

Sonra ölkədəki ictimai-siyasi vəziyyət müzakirə edilib. Bu yaxınlarda Azərbaycan Pespublikasının mülki məcəllə haqqındakı qanuna edilən əlavə və dəyişikliklər haqqında fikir mübadiləsi aparılıb və bu əlavə və dəyişikliklərin Konstitusiyaya zidd olması bildirilib. Müsavat Deputat Qrupunun bu əlavə və dəyişikliklərin ləğv olunması istiqamətində ardıcıl fəaliyyət göstərməsi məqsədəuyğun sayılıb.
Daha sonra Türkiyənin ABŞ-la birgə Quzey İraqda keçirdiyi hərbi əməliyyatlar barədə müzakirələr aparılıb və bu əməliyyatlara tam dəstək verilib. Qeyd olunub ki, son vaxtlar bir sıra PKK yetkililəri Türkiyə ilə yanaşı Azərbaycanı da hədəfə götürüb və ölkəmizin ünvanına hədələr səslənib. Bununla əlaqədar Müsavat Partiyasının Divanı Azərbaycanın da ABŞ və Türkiyə ilə birgə PKK təhdid və təhlükələrinə qarşı prinsipial mövqe tutması zərurətini qeyd edib. Yığıncaqda Azərbaycan hakimiyyətindən PKK-nın terrorçu təşkilat kimi tanınması bir daha tələb olunub.

Sonda bəzi cari məsələlərə baxılıb.

isagambar.az, 19 dekabr 2007-ci il, Bakı