Təbrikdə deyilir:
Əziz soydaşlarım!
Novruz bayramınızı təbrik edir, hamınıza uzun ömür, cansağlığı və xoşbəxtlik arzulayıram.
Novruz xalqımızın ən qədim və əziz bayramıdır. Şərq təqvimində Yeni ilin gəlişini özündə ehtiva edən bahar təravətli, bərəkət ətirli bu bayramı xalqımız həmişə böyük sevgi ilə qeyd edib. Sovet hakimiyyəti illərində xalqımızı öz soykökündən, adət-ənənəsindən uzaqlaşdırmaq üçün Novruz bayramının dövlət səviyyəsində qeyd olunmasına yasaqlar qoyulub, bu əziz günü birdəfəlik təqvimdən silməyə çalışıblar. Lakin bütün bu qadağalara baxmayaraq xalq öz müqəddəs və əziz bayramını həmişə əziz tutub, evlərimizdən Novruz xonçası heç bir zaman əskik olmayıb, tonqallarımızı qalayıb inanclarımıza tapınmışıq.
Çox təəssüf ki, ölkədə günbəgün pisləşən sosial-iqtisadi durum, bazarda qiymətlərin fantastik sürətlə artması müqabilində insanlar neçə illərdir ki, Novruzu ürəkləri istədiyi kimi qeyd edə bilmir. Hakimiyyətin xalqa zidd siyasəti, xüsusilə bu ilin əvvəllərində qiymətlərin cinayətkarcasına fantastik səviyyədə artırılması nəticəsində insanlar artıq sözün həqiqi mənasında həyatla, yaşamaqla sınağa çəkilib. Bu gün biz öz haqlarımız uğrunda fəal mübarizə aparmasaq, hamı bir nəfər kimi öz taleyinə sahib çıxmağa çalışmasa, vəziyyət getdikcə daha kritik həddə çatacaq. Ona görə də mən hamınızı xalqın həyat səviyyəsinin yaxşılaşdırılması uğrunda mübarizədə yaxından iştirak etməyə çağırıram.
Əziz soydaşlarım!
Mən inanıram ki, bütün bu çətinliklərin ömrü çox da uzun deyil və xalqımız tezliklə layiq olduğu xoşbəxt, firavan həyata qovuşmaq üçün daha sıx birləşərək müqəddəs ideyalar ətrafında həmrəylik nümayiş etdirəcək. Məhz bu həmrəylik nəticəsində xalqımızın və ölkəmizin qarşısında duran bütün problemlər həll oluna bilər. Torpaqlarımız düşmən tapdağından azad olunar qaçqınlar öz yuvalarına qayıdar, ölkəmizdə azad demokratik və firavan bir cəmiyyət qurular.
Bir daha hamınızı bu əziz bayram münasibətilə təbrik edir, bütün arzu və istəklərinizin çin olmasını arzulayıram.
Tanrı Azərbaycanımızı qorusun!