Bu gün Yasamal rayon məhkəməsi “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayevə 2 il 6 ay həbs cəzası verdi. O, guya Xocalı sakinlərinin şərəf və ləyaqətini təhqir etməsilə bağlı uydurma ittihamlarla həbs olunub. Ümumiyyətlə bir neçə aydır ki, hakimiyyətin bu həbsə hazırlıq gördüyü açıq-aşkar hiss olunurdu. “Gündəlik Azərbaycan” və “Realnıy Azerbaydjan” qəzetlərinin redaksiyası qarşısında hakimiyyətin sifarişi ilə təşkil olunmuş piketlər, bir az öncə Yasamal məhkəməsinin bu qəzetləri heç bir əsas olmadan cərimələməsi və nəhayət sonuncu məhkəmə prosesində qeyri-qanuni hüquqa zidd məqamların baş alıb getməsi belə deməyə əsas verir. Nə ölkənin daxilində, nə də onun hüdudlarından kənarda heç kimə sirr deyil ki, E. Fətullayev məhz öz cəsarətli yazılarına görə hakimiyyətin əsas hədəfinə çevrilmişdi.
AŞ PA-nın sessiyasından dərhal sonra baş vermiş bu həbs hadisəsi göstərir ki, Azərbaycan hökuməti nəinki onun ünvanına söylənilən tənqidlərdən heç bir nəticə çıxarmır, əksinə insanlar əqidəsinə və düşüncəsinə görə daha geniş şəkildə təqib olunur, repressiyalara məruz qalır. Bu bir daha onu göstərir ki, Əliyev rejimi heç bir siyasi, demokratik islahatlar aparmaq istəmir, öz köhnə avtoritar idarəçilik metodunda əl çəkmək fikrində deyil.
Müsavat Partiyası E. Fətullayevin həbsini Azərbaycanda azad sözə, müstəqil mətbuata, bütünlükdə demokratiyaya vurulan növbəti ağır zərbə kimi qiymətləndirir və qətiyyətlə pisləyir. Partiya ölkə ictimaiyyətinə, beynəlxalq demokratik təşkilatlara, xüsusilə Avropa Şurasına və ATƏT-ə, demokratik qərb dövlətlərinin rəhbərlərinə və ictimaiyyətinə müraciət edərək məsələyə müdaxilə etməyi və jurnalistin dərhal azadlığa buraxılmasına nail olmağa çağırır. Biz habelə bəyən edirik ki, Azərbaycan hökuməti E. Fətullayevin həyatının təhkükəsizliyi üçün tam məsuliyyət daşıyır.
Müsavat Partiyasinin mətbuat xidməti, 20 aprel 2007-ci il