Müsavat Partiyasının başqanı İsa Qəmbər 31
dekabr - Dünya Azərbaycanlılarının Həmrəylik Günü və Yeni il münasibətilə
xalqımızı təbrik edib
Təbrikdə deyilir:
Əziz həmvətənlərim!
31 dekabr- Dünya Azərbaycanlılarının Həmrəylik Günü və Yeni İl bayramı
münasibətilə sizləri təbrik edir, hamınıza can sağlığı, xoşbəxtlik və firavan
həyat arzulayıram.
Dünya Azərbaycanlılarının Həmrəylik Günü müstəqillik tariximizlə yaşıddır. Artıq
neçə ildir ki, biz bu bayramı qeyd edir, dünyanın müxtəlif ölkələrində yaşayan
soydaşlarımızın təşkilatlanması və ölkəmizin maraqları naminə birgə fəaliyyət
göstərməsinə calışırıq. Bu sahədə xeyli uğurlar qazanmış, təcrübə toplamışıq.
Hazırda azərbaycanlıların kompakt yaşadığı bir çox ölkələrdə və ayrı-ayrı
şəhərlərdə müxtəlif diaspor təşkilatları fəaliyyət göstərir, Azərbaycan
həqiqətlərinin dünyaya çatdırılmasında, mədəniyyətimizin təbliğ edilməsində
mühüm rol oynayırlar. Lakin etiraf etmək lazımdır ki, biz hələ dünyada güclü
diaspor və lobbi şəbəkəsinə malik deyilik. Təbii ki, bunun obyektiv səbəbləri
var. Amma bu işi yüksək səviyyəyə qaldırmaq, başqalarının yüz illər boyu nail
olduqlarına qısa vaxt ərzində çatmaq üçün bizim potensialımız var və bu
potensialdan səmərəli istifadə etməliyik. Xaricdəki təşkilatlarımızla əlaqələri
daha da gücləndirməliyik, onları ayrı-ayrı siyasi məqsədlərə, kimlərinsə bayağı
təbliğatına xidmət etməyə yox, Vətən və xalq naminə fəaliyyətə səfərbər
etməliyik.
Əziz həmvətənlərim!
Bu gün biz həm də başqa bir bayramı, Yeni ilin gəlişini qeyd edirik. Hökumətin
hay-küylü, təmtəraqlı hesabatlarına baxmayaraq, yola saldığımız il Azərbaycanın
müstəqillik tarixinin ən ağır illərindən biri oldu. Hələ 2007-ci ilin əvvəlində
qiymətlərin fantastik səviyyədə artırılması, qiymət artımının il boyu davam
etməsi, inflyasiyanın görünməmiş vüsəti əhalinin yaşayışını dözülməz həddə
çatdırıb. Ən acınacaqlısı budur ki, bütün bunlar neft gəlirlərinin sürətli
artımı fonunda baş verir. Hər bir azərbaycanlının sərvəti olan neft bir ailənin
inhisarına alınıb. Məhz ona görə də neft gəlirlərinin artması ölkəyə firavanlıq
əvəzinə fəlakət gətirir, korrupsiyanın, monopoliyanın daha da tüğyan etməsinə
səbəb olur.
2007-ci il ölkədə demokratiyanın, insan haqlarının vəziyyəti baxımından da
acınacaqlı olub. Bir çox jurnalist qanunsuz olaraq müxtəlif bəhanələrlə həbsə
atılıb, mətbuat azadlığının səviyyəsinə görə Azərbaycan ən geridə qalmış Afrika
ölkələri ilə bir səviyyəyə düşüb. Müxalifət partiyalarına, demokratik
təsisatlara qarşı təzyiq və təqiblər daha da artıb.
Qarşıdan gələn il bizim üçün çox əhəmiyyətlidir. Ölkədə növbəti prezident
seçkiləri keçiriləcək. Bu gün Azərbaycanın düşdüyü və ilbəil dərinləşən
ictimai-siyasi, sosial-iqtisadi və mənəvi böhranının əsas səbəbi hazırkı, xalqa
zidd rejimdir. Bu rejim durduqca bizim problemlərimiz də artmaqda davam edəcək.
Ona görə də mən hər bir Azərbaycan vətəndaşına müraciət edərək seçkilərdə fəal
olmağa, özlərinin, ailələrinin, xalqın və Vətənin taleyinə sahib durmağa
çağırıram. Yalnız bu yolla biz ölkəmizi dərin böhrandan çıxarmağa, ölkənin
inkişafına və ərazi bütövlüyümüzün bərpasına nail ola bilərik.
Hörmətli soydaşlarım!
Bir daha sizləri bu əziz bayramlar münasibətilə təbrik edir, Azərbaycanın
xoşbəxt gələcəyi naminə hamınıza birlik və həmrəylik arzulayıram.
Tanrı Azərbaycanımızı qorusun!
Bakı, isagambar.az, 31.12.2007