Növbəti toplantı

Bu gün Müsavat Partiyası Divanının növbəti toplantısı keçirilib. Toplantıda qərarların icra vəziyyəti və partiyadaxili məsələlərə baxılıb. Sonra 27 may yürüş-mitinqinə hazırlıq məsələləri müzakirə edilib və müvafiq tapşırıqlar verilib.

Daha sonra toplantıda son vaxtlar hakimiyyət tərəfindən azad mətbuata edilən basqılar ətrafında müzakirələr aparılıb. Divan son günlər Fövqəladə Hallar Nazirliyinin əməkdaşlarının “Gündəlik Azərbaycan” və “Realnıy Azerbaydjan” qəzetlərinin redaksiyasına hücum etməsini və redaksiyanın binasını möhürləməsini qətiyyətlə pisləyib və bunu hər iki qəzetin fəaliyyətini birdəfəlik dayandırmağa yönəlmiş cəhd kimi qiymətləndirib. Toplantıda habelə qanunsuz məhkəmə hökmləri ilə həbs olunmuş bütün jurnalistlərin dərhal azadlığa buraxılması bir daha hakimiyyətdən tələb edilib.

Yığıncaqda ötən il mayın 22-də Güney Azərbaycanda başlayan milli-oyanış hərəkatının ildönümü ilə bağlı da fikir mübadiləsi aparılıb. Müsavat Partiyası bundan sonra da güneyli soydaşlarımızın öz milli haqları uğrunda mübarizəsinə mənəvi-siyasi dəstək verəcək. Patiya Divanı İran hökuməindən Azərbaycan türklərinin hüquqlarına hörmətlə yanaşmağı tələb edib.
Sonda cari məsələlərə baxılıb.

isagambar.az, Bakı, 21 may 2007-ci il