Müsavat Partiyasının başqanı İsa Qəmbər “Milli Mətbuat Günü” münasibəti ilə jurnalistləri təbrik edib

Təbrikdə deyilir:

“Hörmətli jurnalistlər!

Milli Mətbuatımızın 132-ci ildönümü münasibəti ilə sizi ürəkdən təbrik edir, hamınıza xoşbəxtlik arzulayıram.

Azərbaycan mətbuatı çox zəngin ənənələrə malikdir. Bu mətbuatın ilki “Əkinçi” qəzetindən, onun yaradıcısı Həsən bəy Zərdabidən tutmuş bu günə kimi yüzlərlə qəzet və jurnalist Azərbaycan cəmiyyətinin inkişafında, maarifləndirilməsində misilsiz rol oynamışdir. Mətbuatımızın 132 illik tarixi həm də xalqımızın və ölkəmizin bu müddət ərzində keçdiyi ziddiyyətli yolun, inkişaf mərhələsinin tarixidir.

Azərbaycan mətbuatı bu gün də cəmiyyətin önündə gedən, onun avanqardı olan əsas ictimai institutlardan biridir. 1988-ci ildə ölkədə başlanan xalq hərəkatı azad və müstəqil mətbuatın inkişafına yeni təkan verdi, bu hərəkatın dalğasında çoxlu alternativ fikir tribunası yarandı. Təəssüf ki, bu düzxətli inkişaf olmadı və müəyyən bir dövrdən sonra, xüsusilə 90-cı illərin ortalarından başlayaraq Əliyevlər rejiminin aramsız təzyiqləri nəticəsində milli mətbuatımız çox ciddi problemlərlə üzləşdi. Həmin vaxtdan etibarən mətbuata təzyiqlər ilbəil çoxaldı, şiddətləndi, bu gün isə o, özünün ən pik nöqtəsinə çatıb. Təkcə 2007-ci ildə 7 jurnalist öz peşə fəaliyyətinə görə uydurma ittihamlarla həbsə atılıb. Mərhum jurnalist Elmar Hüseynovun qətlindən 2 ildən artıq bir vaxt keçsə də, bu qətlin icraçılarının və iştirakçılarının aşkara çıxarılması istiqamətində heç bir konkret nəticə əldə edilməyib. Neçə-neçə jurnalist “naməlum şəxslər” tərəfindən döyülüb, şikəst edilib, amma yenə də heç kim cəzalandırılmayıb. Medianın problemlərini sadalamaqla qurtaran deyil. Təsadüfi deyil ki, nüfuzlu beynəlxalq təşkilatların hesabatlarında Azərbaycan media sahəsində ən pis vəziyyətdə olan ölkələrin siyahısındadır. Bütün bunlara baxmayaraq fədakar jurnalistlər söz azadlığı və öz azadlıqları uğrunda mübarizəni davam etdirirlər.

Hörmətli jurnalistlər!

Mən bir daha sizi peşə bayramınız münasibəti ilə ürəkdən təbrik edir edirəm. Ümid edirəm ki, sizin mübarizliyiniz cəmiyyətin, beynəlxalq təşkilatların dəstəyi sayəsində mətbuatımız problemlərin öhdəsindən gələcək və biz ölkədə azad və müstəqil mətbuatın qorunmasına, inkişafına nail olacağıq.

isagambar.az, Bakı, 21.07.2007