Müsavat liberal dəyərlərə böyük əhəmiyyət verir
 

Nabranda Beynəlxalq liberal təşkilatlar mövzusunda seminar keçirilib

Almaniyanın Fridrix Nauman Fondunun və Müsavat Partiyasının təşəbbüsü ilə yanvarın 21-dən 23-dək Nabranda “Beynəlxalq liberal təşkilatlar: proqramları və strukturları” mövzusunda seminar keçirilib.

Seminarda Müsavat Partiyasının, Liberal Gənclər Təşkilatının, Azad Fikir Gənclər Təşkilatının üzvləri, eləcə də heç bir siyasi qurumda təmsil olunmayan tələbələr iştirak edib. Fridrix Nauman Fondunun Cənubi Qafqaz ölkələri üzrə rəhbəri Volfhanq Yon, Almaniya Azad Demokratlar Partiyasının Bundestaqdakı deputat qrupunun xarici siyasət məsələləri üzrə müşaviri Frank Şuster və Müsavat Partiyası başqanının müavini Mehman Cavadoğlu məruzə ediblər.

Seminar iştirakçılarına Avropa Liberal Demokrat Partiyası (ALDP) haqda ətraflı məlumat verən F.Şuster bu siyasi qurumun 1976-cı ildən fəliyyət göstərdiyini qeyd etdi. F.Şuster ALDP-yə 31 ölkədən 48 partiyanın üzv olduğunu və bu partiyalardan 20-nin öz ölkələrində iqtidarda olmasını xüsusi vurğuladı. O, Avropada 30 milyon seçicinin ALDP-ni dəstəklədiyini və Avropa Parlamentində 80 deputatla təmsil olunduğunu da bildirdi. Müsavat Partiyasının ALDP-yə üzv olmaqla bağlı müraciətini yüksək dəyərləndirən F.Şuster bu qərarın Azərbaycanda demokratik islahatlara müsbət təsir edəcəyini söylədi.

Müsavat Partiyası başqanının müavini Mehman Cavadoğlu “Azadlıq və inkişaf naminə - Müsavat Partiyasının beynəlxalq liberal ailəyə inteqrasiyası” mövzusunda çıxış etdi. O, Müsavat Partiyasının qərarının uzun sürən müzakirələr nəticəsində əldə edildiyini vurğuladı. Mehman bəy Müsavat Partiyasının məramnaməsində milli dəyərlərlə yanaşı liberalizmin önəmli yer tutduğunu söylədi. Bir əsrlik tarixə malik Müsavat Partiyasının ideoloji əsaslarının mühüm məqamlarının liberal dəyərlərə söykəndiyini qeyd edən M.Cavadoğlu Şərqdə ilk cümhuriyyətin qurulmasında bu partiyanın tarixi xidmətləri olduğunu önə çəkdi. O, Müsavat Partiyasının yarandığı gündən fərdi və qadın azadlıqlarının Azərbaycan cəmiyyətində qəbul olunması istiqamətində gördüyü işlər barədə seminar iştirakçılarına ətraflı məlumat verdi. 1918-1920-ci illərdə - Azərbaycan Xalq Cümhuriyyətində məhz bu partiyanın təşəbbüsü ilə qadınlara seçmək və seçilmək hüququnun verildiyini bildirən M.Cavadoğlu tarixin həmin dönəmində bir sıra qabaqcıl Avropa ölkələrində qadınların seçki hüququndan məhrum olduqlarını da xatırlatdı. Azərbaycan Xalq Cümhuriyyəti dövründə parlamentdə söz və mətbuat azadlıqlarının qorunması haqqında qanunların da Müsavatın təşəbüsü ilə qəbul olunduğunu söyləyən M.Cavadoğlu partiyanın bu gün də Azərbaycanda vətəndaş cəmiyyətinin qurulması uğrunda mübarizə apardığını söylədi.

M.Cavadoğlunun çıxışı tədbir iştirakçılarının ciddi marağına səbəb oldu. Başqan müavini onların çoxsaylı suallarını cavablandırdı.

Yeni Müsavat Qəzeti, 25 yanavar 2006-cı il, Əfqan MUXTARLI