Müsavatın etiraz mitinqi baş tutdu
14 aylıq sükut pozuldu
Dünən milli azadlıq hərəkatının yeni mərhələsinə start verildi

Dünən Müsavat Partiyasının təşkilatçılığı ilə “Qiymət artımına yox!” şüarı ilə metronun “Həzi Aslanov” stansiyasının qarşısından Ukrayna meydanınadək yürüş-mitinq keçirildi. Bir il iki aylıq qeyri-rəsmi fövqəladə vəziyyətdən sonra, özü də kütləvi aksiya üçün ilk dəfə sınaqdan keçirilən ərazidəki tədbirin necə alınacağı hamı üçün maraqlı idi. Hakimiyyət də möhkəm hazırlıq görmüşdü. Demək olar ki, bütün ətraf binaların arasında içərisində “döyüşə hazır” olan polislərlə doldurulmuş avtobuslar yerləşdirilmişdi. Təkcə Ukrayna meydanı ilə üzbəüz bağın yuxarı başında içində polislər olan 7 avtobus dayanmışdı.

Meydanı üzük qaşı kimi əhatəyə alan polislərdən əlavə, mülki geyimli əməliyyatçılar da çox idi. Üzərində “DİN-in qərargahı” yazılan avtobus isə görünür, mitinq yerindən “canlı yayın” məqsədilə gətirilmişdi və meydanın bir küncündə saxlanılmışdı. Hakimiyyətin kütləvi tədbirdən ehtiyatlanması açıq-aydın diqqət çəkirdi. Hətta ətrafdakı dükanların fəaliyyəti məhdudlaşdırılmış, bağdakı obyektlərin sahiblərinə isə işləmək qadağan edilmişdi. Çoxsaylı polis qüvvəsi xof yaratmaqla insanların aksiyaya axınının qarşısını almağa çalışırdı. Hətta Daxili Qoşun hissələrinin də ehtiyat qüvvə kimi yaxın ərazilərə gətirildiyi barədə xəbərlər dolaşırdı. Lakin bütün bu kimi tədbirlərə baxmayaraq xalqın fədakar nümayəndələri aksiyaya gəlib etiraz səslərini ucaltmaqla hakimiyyətin qiymət artımına qarşı çıxdılar.

Saat 16:00-da əllərində Azərbaycanın və Müsavatın bayraqlarını tutmuş gənclərin “Müsavat” hayqırtıları ilə neçə aylardan bəri ölkə paytaxtını saran cansıxıcı sükut pozuldu. Müsavat Partiyasının başqanı İsa Qəmbərin yürüş iştirakçılarına qoşulması coşqunun artmasına səbəb oldu. Fədakar insanlar “İsa bəy”, “Müsavat” sədaları ilə başqanı qarşıladılar. Onu partiya rəhbərliyinə daxil olan şəxslər, Müsavat deputat qrupunun üzvləri və digər nüfuzlu simalar müşayiət edirdi. Bunun ardınca aksiyada yeni şüar səslənməyə başladı: “İnsanları eşidin, qiymətləri endirin!” Adamlar sanki bir yerə toplaşmaq üçün qəribsəmişdilər. Hətta bir sıra aksiya iştirakçılarının bu tədbirdən riqqətə gələrək sevinclə digərlərinə “bayramın mübarək” dediyini eşitdik. Gənclərin növbəti şüarları “İs-te-fa!”, ardınca da “Rejimə yox!” oldu. Daha sonra “Zalımlara, soyğunçulara ar olsun!”, “Su, işıq, qaz!” hayqırtıları eşidildi. Tarif Şurası da yaddan çıxmadı, insanlar bu qurumun ünvanına “Ar olsun!” qışqırdılar. Yürüşçülərin sırasında cəbhəçilər də var idi, demokratlar da, milli istiqlalçılar da. İnsanların içərisində məşhurlar da az deyildi: Cümə məscidinin imam-camaatı Hacı İlqar, tanınmış yazarlar Hacı Zamin, Şahvələd Çobanoğlu, hüquq müdafiəçisi Novella Cəfəroğlu, QAT sədri Akif Nağı və digərləri.

Ukrayna meydanı çox da uzaqda olmadığından, yürüşçülər bu ünvana tez yetişdilər. Meydandakı insanları görən yürüşçülər bir az da coşqu ilə hayqırmağa, haqlarını tələb etməyə başladılar. Mitinqdə aparıcılıq missiyasını Müsavat Məclisinin üzvü İbrahim İbrahimli öz üzərinə götürmüşdü. İbrahim bəy Azərbaycanda neçə vaxtdan bəri hökm sürən fövqəladə vəziyyət rejiminə son qoyaraq ilk dəfə qiymət artımına etiraz edən Müsavat Partiyasının meydana daxil olduğunu elan edəndən sonra “Müsavat!” sədaları ucaldı. İ.İbrahimli sözünə davam etdi: “Nə qədər ki, Azərbaycanda Müsavat Partiyası var, bu millətə, bu xalqa qarşı aparılan soyqırıma həmişə etiraz olacaq!” Yenə də “Müsavat” hayqırtıları ətrafa yayıldı. Tarif Şurasının məlum qərarını pisləyən İbrahim bəy Azərbaycanın əli iş tutan kişilərinin böyük əksəriyyətinin dünyanın müxtəlif yerlərinə səpələndiyini xatırlatdı: “Bu qədər sərvəti, var-dövləti olan məmləkətdən Azərbaycan vətəndaşları qaçaq düşüb. Belə bir vəziyyətdə dövlət başçısı televiziyadan deyir ki, Azərbaycanda tərəqqi, inkişaf var. Bir azdan dünyadan əmək miqrantları Azərbaycana gələcək. Sual olunur, didərgin düşən 3 milyon vətəndaşını vətənə qaytara bilməyən, öz vətəndaşının qazını, işığını, suyunu kəsənlərin ölkəsinə kimlər gələcək? Nəyə gələcək bu məmləkətə? Öz ailə-uşağının gözünə dik baxa bilməmək üçünmü?”

İbrahim bəy bildirdi ki, bu gün Heydər Babayevin bağındakı quşların yediyi yemi heç Azərbaycan vətəndaşlarının orta təbəqəsi də yeyə bilmir. Onun bu sözləri “Ar olsun!” hayqırtıları ilə müşayiət olundu. Mitinqdə xüsusi şövqlə və məharətlə aparıcılıq edən İ.İbrahimlinin giriş nitqindən sonra meydan əhli yumruğunu göyə qaldırıb dövlət himnimizi oxudu.

Çıxış üçün ilk söz alan Müsavat Partiyasının Mərkəzi İcra Aparatının rəhbəri Arif Hacılı hakimiyyətin xalqın taleyini düşünmədiyini, Azərbaycana yalnız varlanmaq yeri kimi baxdığını dedi: “Hakimiyyət hər vasitə ilə xalqın cibinə girməklə məşğuldur. Bu gün o, Azərbaycan xalqının nəinki gələcəyini, hətta bu gününü də düşünmür. Xatırlayırsınızsa, İlham Əliyev seçki kampaniyası apardığı dövrdə bildirirdi ki, Bakı-Ceyhan neft kəmərinin işə düşməsilə insanların həyat səviyyəsi, sosial-iqtisadi vəziyyət yaxşılaşacaq. Bu gün bəyan edir ki, ölkənin dövlət büdcəsinin artması ilə əlaqədar guya xalqın həyat səviyyəsi yüksəlib. Ancaq siz bilirsiniz ki, Azərbaycanda hazırda dəhşətli və ədalətsiz bir təbəqələşmə prosesi gedir. Əhalinin 5-7 faizi milyardlara sahib olduğu halda, 90 faizindən artığı yoxsulluq həddində yaşamaq məcburiyyətindədir. İnsanlar çörəklə imtahana çəkilirlər”.

Arif bəy vətəndaşlarımızı bu günü və gələcəklərini düşünməyə səslədi və hər kəsi öz haqları uğrunda mübarizəyə çağırdı. Müsavatın isə daim bu mübarizənin önündə olacağını vurğuladı: “Əgər biz indi etiraz səsimizi qaldırmasaq, neft gəlirləri azalmağa başlayanda, təqribən 10-12 il sonra Azərbaycan neft ixrac edən ölkədən neft idxal edən ölkəyə çevriləndə ölkə indikindən daha dəhşətli bir xarabazara çevriləcək”.

Mitinqin keçirildiyi ərazidəki 34-cü dairədən deputat seçilən millət vəkili Nəsib Nəsibli öncə bu ünvanda ağır vəziyyətdə yaşayan seçicilərinin, xüsusilə də ailəvi yataqxanalarda məskunlaşanların problemlərindən bəhs etdi. Bildirdi ki, işsiz seçicilərinin elektrik enerjisinin haqqını hələ köhnə qiymətlə ödəyə bilmədiyi barədə Milli Məclisdə məsələ qaldırmışdı. Lakin nəinki bu barədə tədbir görülmədi, hətta enerjinin qiyməti üç dəfə artırıldı: “İndi bu işsiz, binəva insanlar elektrik enerjisinin haqqını, digər kommunal xərcləri necə ödəsinlər?” Nəsib bəy neftin hesabına dövlət büdcəsinin artmasına toxunaraq qeyd etdi ki, bütün bu artımlar cəmiyyətin həyatına təsir göstərmir: “O millətdə ki, həqiqətən əyriyə əyri, haqsızlığa “yox” deyən insanlar var, həmin millətin gələcəyi təhlükədə deyil. Burda olan müxalif əhval-ruhiyyəli, haqsızlığa, hoqqabazlığa, əliəyriliyə “yox” deyən insanlardır. Azərbaycanda nəinki müxalifət yoxdur, əksinə, on minlərlə, yüz minlərlədir. Bu müxalifətin nümayəndələri indi burdadır. Sizlərə eşq olsun!"

Vaxtilə müxalifəti MSK-da ləyaqətlə təmsil etmiş Ənvər Əliyev bildirdi ki, mitinq iştirakçılarının sayı həddindən çox ola bilərdi: “Mən bu millətdən həmişə razıyam. İnanıram ki, normal şərait olsa, o, istədiyi sözü deyəcək və qüdrətini göstərəcək. Arzu edirəm ki, sıralarımız daha qüvvətli olsun. Haqqı deməyi bacaran millət tarixdə yaşayır. Hər şeyə baş əyənlərin axırı heçdir, bunu hamı bilməlidir”. Daha sonra o, sual etdi: “Mən başa düşmürəm, indiki hakimiyyət hansı adla bu vətəni idarə edir? 3 milyon insan xaricdədir. Onlar burdakı 3 milyonu dolandırır. Qalan 30 faiz də acından ölür”. Ənvər bəy müxalifəti yox etmək istəyənlərə də sərt mesaj verdi: “Müxalifəti yoxa çıxaran hakimiyyətlərin axırda özləri yoxa çıxdı”.

ADP funksioneri Nurəddin İsmayılov çıxışında öz haqqı uğrunda mübarizəyə qalxan insanları meydanda görməkdən şərəf duyduğunu bəyan etdi. Eyni zamanda bütün insanların bir araya gəlməsini zəruri saydı. Bildirdi ki, 2003-cü ildə bütün demokratik düşərgənin bir araya gəlməsi nəticəsində İsa bəy prezident seçkilərinin qalibi oldu və 2005-ci ildə “Azadlıq” bloku parlament seçkilərini uddu: “İndiyədək bizim səsimizi oğurlayan, seçki qutularına girənlər indi də bizim cibimizə, evimizə giriblər. Baş verənlər bir partiyaya, bir bloka qarşı yox, bütövlükdə millətə qarşıdır. Ona görə də bütün cəmiyyət aktiv mübarizəyə başlamalıdır. Səs-səsə, əl-ələ verməli, haqq işimizi davam etdirməliyik”.

İ.İbrahimli bu bahalaşmadan sonra da bəzi insanların televiziyadan hökumətə 25 faizlik artıma görə minnətdarlıq etmələrinə diqqət çəkəndə yerbəyerdən “Ar olsun!” sədaları ucaldı. Bundan sonra qiymət və maaş artımına gerçək reaksiyanın necə olduğunu mitinq Lətifə anadan eşitdi. Çıxışı çox maraqla qarşılanan və dəfələrlə alqışlan Lətifə ana kreslolara yayxanıb qiymətləri artıranlara “Ar olsun!” deməklə sözünə başladı. O, Azərbaycanda şan-şöhrət içində yaşayanları işğal altında olan Qarabağa, çadırlara, vaqonlara baxıb xəcalət çəkməyə çağırdı: “50 yerdə villa tikdirib, quşla, delfinlə oynayıb, öz şanında-şöhrətində gəzənlərə ar olsun!” Lətifə ana insanları çörəklə imtahana çəkənləri öz əməllərindən geri çəkilməyə çağırdı: “Vicdanınız olsun. Toyuq da su içəndə Allaha baxır. Bir siz də Allahınızı yadınıza salın. Bəsdir, bu camaatı qırdınız. Gecəyarısı qiymətləri qaldırırsınız, elə bil səhər camaat bir-birinə 20 Yanvarın xəbərini verir. Neçə-neçə adamları infarkt vurub. Deyirlər arığa dərisi də yükdür. Millət dolana bilmədiyi halda, beş gündən bir nəyə qiyməti qaldırırsınız? Sizinçün nə var, hər gün kefdə, şənlənməkdə, yemək-içməkdəsiniz. Balalarınız bu gün sürdüyü maşını sabah sürmür. Sizə ar olsun ki, Azərbaycan oğlanları gedib 20 Yanvarda oğul-qızlarımızı əzənlərin qabağında işləyir. Ar olsun sizlərə ki, qız-gəlinimiz Dubaya axışır. Bundan artıq binamusluq olar? Bəsdir bu milləti ayaqladınız!” Məmurlara sözünü dedikdən sonra Lətifə ana üz tutdu meydan əhlinə: “Xalq olaraq, millət olaraq ayağa qalxın, sözünüzü deyin”.

Qarabağdan qaçqın düşən Xudaverdi Orucov da qiymət artımına kəskin etiraz ifadə etdi: “Bu gün artıq bıçaq sümüyə dirənib. Mən problemlər içərisində olan, iş tapa bilməyən ali təhsilli övladımın üzünə baxa bilmirəm. Bu ədalətsizliyə son qoymaq lazımdır”. Qarabağ itkisindən söz açan Xudaverdi kişi artıq Azərbaycan ərazilərində ikinci erməni dövlətinin yaranması təhlükəsinin real olduğundan danışdı. Bundan sonra isə bütün xalqa ünvanlı çağırışını elədi: “Müsavat haqq sözü deyir. Durun ayağa, nə oturmusunuz? Onsuz da axırı ölümdür. Gəlin, kişi kimi yaşayıb kişi kimi ölək!”

AMİP-in sədr müavini Əli Orucov bildirdi ki, hakimiyyət hər zaman xalqın müqavimətini qırmağa səy göstərsə də, istəyinə çatmayıb: “Bu izdiham göstərdi ki, heç bir rejim sizi sındıra bilməz”. Əli bəy partiyasının mövqeyini bir daha ifadə etdi: “AMİP həmişə xalqla bir yerdə olub və bundan sonra da bu mübarizədə sizinlə olacaq. Mən əminəm ki, bu millət yenə də haqq mübarizəsində qalib gəlib ilin xalqı adını qazanacaq və öz hakimiyyətini quracaq”.

İ.İbrahimli sözü “Müsavat deputat qrupunun generatoru” kimi təqdim etdiyi millət vəkili Pənah Hüseynə verdi. İnsanlar tribunaya qalxan Pənah bəyi böyük sayğı və coşqu ilə qarşıladılar. Millət vəkili “Müsavat!” çağırışını edəndən sonra izdiham da uzun müddət bu şüarı səsləndirdi. Pənah Hüseyn atalarının çiynində mitinqi seyr edən uşaqlara diqqət çəkdi və “Bizi mübarizəyə bu uşaqların gələcəyi səsləyir” dedi. Bildirdi ki, 10, 15, 20 ildən sonra bu torpağı, vətəni və dövləti quru yurd şəklində bu balalarımıza verməyə haqqımız yoxdur: “Mən bugünkü mitinqi Azərbaycanın ən yeni tarixində mübarizəmizin başlanğıcı hesab edirəm. İnşallah, xalqımızın köməyi, millətimizin iradəsi, oğlanlarımızın, kişilərimizin və xanımlarımızın köməyilə bu millət öz haqqını bərpa edəcək. Bu gün onun cibinə girən, oğurluq edən, onun bu gününü, gələcəyini oğurlayan adamların cavabını verəcək. Belə hökumət, belə nazirlər, belə qərarları verən vəzifəlilər istefaya getməlidir”.

Meydan bunu gözləyirmiş kimi qəzəblə “İs-te-fa!” hayqırmağa başladı. Pənah bəy bir neçə gündən sonra bu tələbi Milli Məclisdə səsləndirəcəklərini dedi: “Müsavatın bu aksiyası çox böyük əhəmiyyətə malikdir. Amma biz bu hərəkatı bütövlükdə Azərbaycan xalqının ümumxalq mübarizəsinə, ümumxalq hərəkatına çevirməliyik”. Çıxışçı bunun üçün kifayət qədər resursların olduğunu bəyan etdi: “Mən bu hərəkatın qələbəsinə əminəm. Müsavat Partiyası başda olmaqla bizim şanlı, mübariz, fədakar müxalifətimiz, demokratik qüvvələrimizlə bərabər Müsavat deputat qrupu da öndə olacaq. Biz haqqımızı bunların boğazından çıxaracağıq, inşallah”.
Müsavat Partiyası Məclisinin sədri Sülhəddin Əkbər iştirakçıları salamlamaqla yanaşı haqqı, hüququ uğrunda mübarizədən çəkinənləri qınadı: “Kimlər ki, zalımla mübarizə aparmır, öz haqqı və hüququ ilə birlikdə şərəf və ləyaqətini də itirəcək. Bu vaxtadək partiya liderləri, siyasətçilər hədəfə alınırdısa, əzilirdisə, indi artıq sadə vətəndaşlar hədəfdədir. Bu aksiya onu göstərdi ki, Müsavat həmişə xalqın yanındadır. Mübarizə bu gün də var, yarın da, biz də onun ən ön sıralarında”.

Müsavat başqanının nitqi dinlənildikdən sonra (İsa bəyin çıxışı ilə səh. 7-də tanış ola bilərsiniz - red.) İ.İbrahimli insidentsiz, yüksək əhval-ruhiyyədə başa çatan yürüş-mitinqin qətnaməsini oxudu. Sənəddə hakimiyyətdən enerjidaşıyıcılarının qiymətlərinin artımı ilə bağlı verdiyi məsuliyyətsiz qərarları dərhal ləğv etmək, əhalinin aztəminatlı təbəqələrinin sosial vəziyyətini yaxşılaşdırmaq üçün ciddi tədbirlər həyata keçirilməsi, əməkhaqları, pensiya, müavinət və digər xarakterli yardımların ciddi surətdə artırılması tələb edilir. Qətnamədə hakimiyyətdən korrupsiya, rüşvətxorluq, inhisarçılıq və məmur özbaşınalığına qarşı sərt tədbirlərin görülməsi, neft və digər büdcə gəlirləri, həmçinin onların xərclənməsi üzərində həqiqi ictimai nəzarət, şəffaflığın təmin edilməsi, bu gəlirlərdən səmərəsiz istifadəyə son qoyulması tələbləri də yer alıb. İbrahim bəy yekunda uca səslə mitinqçilərə müraciət etdi: “Mən sizə Azərbaycan milli azadlıq hərəkatının yeni mərhələsinin başlaması münasibətilə uğurlar arzulayır, gələcəkdə meydana səsləyirəm. Eşq olsun!”

Sürəkli alqışlardan sonra aksiya Müsavat Partiyasının himninin oxunuşu ilə başa çatdı. Beləliklə, son onillikdə Müsavat yanvar ayında heç zaman müşahidə olunmayan etiraz tədbirini keçirməklə sükunət buzunun vaxtından tez, yaz gəlməmiş qırılmasına nail oldu.

Yeni Müsavat qəzeti, 29 yanvar 2007-ci il

“Biz bu hakimiyyəti yerində oturdacağıq”

İsa Qəmbər: “Qiymət artımının səbəbi iqtidarın səriştəsiz, oğru və saymaz olmasıdır”

“Qiymət artımına yox!” şüarı ilə dünən Ukrayna meydanında keçirilən mitinqdə Müsavat Partiyasının başqanı İsa Qəmbər geniş nitq söylədi. Müsavat başqanının sürəkli alqışlar, “İsa bəy” hayqırtıları ilə müşayiət olunan çıxışının mətnini təqdim edirik:

- Mənim əziz bacılarım və qardaşlarım!

Sizləri, öz haqları uğrunda qəhrəmancasına mübarizəyə başlayan insanları, Azərbaycan xalqının fədakar övladlarını salamlayıram. Eşq olsun sizlərə!
Bu gün burda bizim keçirdiyimiz kütləvi tədbir Müsavat Partiyasının mitinqi deyil. Bu, xalqın mitinqidir, xalqın öz hüquqları uğrunda mübarizəsinin yeni mərhələsinin başlanğıcıdır. Bu gün hamının ürəyi doludur. Biz xalqımıza danışmaq, sözünü demək, öz hüquqları uğrunda mübarizə aparmaq imkanını yaratmışıq, yaradırıq və yaradacayıq.

Bu hakimiyyət bütün xalqımızı şoka saldı. Minimum əməkhaqqı 40 manat, orta əməkhaqqı 140 manat olan bir məmləkətdə, əhalisinin əksəriyyəti işsiz olan, işləyənin də çox aşağı maaş aldığı bir ölkədə, 1 mln.200 min təqaüdçüsü olan bir məmləkətdə işıqpulu 3 dəfə, benzin 60 qəpiyə, başqa enerjidaşıyıcılarının qiymətləri və kommunal xərclər xeyli artırıldı. Hakimiyyət niyə bu addımı atır? Bunun konkret səbəbləri var.

Birinci səbəb odur ki, hakimiyyət savadsız və səriştəsizdir. Bu insanlar neçə illərdir hakimiyyətdədirlər, indiyədək xalqa öz sosial-iqtisadi proqramlarını təqdim etməyiblər. Təbii onların da içində savadlı adamlar var, biz onlara da hörmətlə yanaşırıq. Ancaq savadlı adamlar dönüb mirzələrə çevriliblər, bunların yalan yazı-pozularını hazırlayıb ortaya qoymaq məcburiyyətindədirlər. Hətta bəzən hakimiyyətin bu cinayətkar qərarlarını izah eləmək məcburiyyətindədirlər. Bütövlükdə isə, yenə təkrar edirəm, bu hakimiyyət savadsız və səriştəsizdir.

İkinci səbəb ondan ibarətdir ki, indi ölkədə oğru, korrupsioner, rüşvətxor bir hakimiyyət var. Əgər hakimiyyət rüşvətxor, oğru olmasaydı, qiymətləri bu qədər artırmağa ehtiyac olmazdı. Yadınıza salırıq ki, keçən ilin sonunda parlamentdə büdcə müzakirələri olanda bizim millət vəkillərimiz, mütəxəssislərimiz - hamımız bunun oğru bir büdcə olduğunu dedik. Belə bir büdcə ilə proseslərin çox mənfi istiqamətə yönələcəyini bildirdik. Bir-iki ay keçmədi, bu qiymət artımı baş verdi. Niyə baş verdi? Çünki bunlar bu büdcəni doldurmalıdırlar. Rəqəmləri 6 milyarda qaldırıblar və büdcəni doldurmaq lazımdır. Büdcəni doldurmağın isə iki yolu var: ya sən rüşvətdən, oğurluqdan əl çəkməlisən, ya da ki, xalqın cibinə girməlisən. Bu hakimiyyət yenə əvvəlki kimi ikinci yolu, xalqın cibinə girmək yolunu seçdi. Faktlar yüzlərlə, minlərlədir. Hamısını sadalamağa vaxt çatmaz. Bircə faktı xatırladıram ki, 5-6 il əvvəl bunlar “Azərenerji” üçün 500 mln. dollar məbləğində xaricdən kredit almışdılar. Bu krediti yeyib-dağıdıblar, oğurlayıblar və indi həmin borcu qaytarmaq zamanı gəlib. Ancaq onu öz ciblərindən, xalqdan oğurladığı milyardlardan qaytarmaq istəmirlər. Yenə də xalqın cibinə girirlər. Bu, oğru bir hakimiyyətdir və qiymətlərin artırılmasının əsas səbəbi də budur.
Üçüncü səbəb ondan ibarətdir ki, Əliyev rejimi öz xalqı ilə hesablaşmır, onu saymır, vətəndaşlarına hörmət eləmir. Bu hakimiyyətin xalqa münasibətini görürsünüz. Durub deyir ki, “müxalifətdən naftalin iyi gəlir”. Vallah, bilmirəm, bunlar bizi nə vaxt iylədilər, niyə iyləyirlər bizi? Ancaq mən bilirəm ki, naftalin iyi oğurluq, rüşvət, quldurluq, cinayət iyindən yaxşıdır. Müxalifət hər zaman xalqla bir yerdədir. Qiymətlərin artması hər bir vətəndaşımız kimi, mənə də, mənim müavinlərimə də, Müsavatın rəhbərliyində olan şəxslərə də, hər bir sıravi müsavatçıya da, hamımıza zərbədir. Hamımız düşünürük ki, bu ayın axırında işıqpulunu necə verəcəyik, supulunu, digər xərcləri necə ödəyəcəyik? Hamımıza dəyir bu zərbə. Çünki biz bu xalqın içində yaşayırıq. Biz İlham Əliyev kimi, onun məmurları kimi günlərimizi İsveçrə kurortlarında keçirmirik. Yanvar ayı başa çatmaq üzrədir, bu adam cəmi iki-üç gün ölkədə olub, qalan vaxtlarını İsveçrənin kurortlarında, xaricdə keçirib. Gəldi, Tarif Şurasının qərarlarını müdafiə elədi. Elan elədi ki, “bu, mənim qərarlarımdır”. Sonra da xalqa həmişəki yalanları danışıb və çıxıb getdi. Yenə də vaxtının çoxunu xaricdə keçirəcək.

Bu adamların xalqdan xəbəri yoxdur, xalqın çəkdiyini onlar çəkmirlər. Bu günlərdə çox adamlar haqlı suallar qoyurlar. Deyirlər ki, İlham Əliyev, onun nazirləri xalqın orta aylıq əməkhaqqı ilə, pensionerin puluyla, işsizin müavinəti ilə bir ay dolansınlar, görək yaşaya bilərlərmi? Ancaq öz maaşlarını artırmağı unutmurlar. Sən demə, 22 yanvarda bunlar nazirlərin, baş nazirin, nazir müavinlərinin, icra başçılarının maaşlarını artırmağı unutmayıblar. Rəsmi dərc eləmirlər, ancaq deyəsən, onların da maaşını 25 faiz artırıblar. Ancaq onların maaşı 25 faiz artanda, baş nazirin məvacibi 2 min dollara, bəzi məmurların maaşı 1500, 1800 dollara çatır. Ancaq 40, 50, 80 manat maaş alan həkim, müəllim, mühəndis, ondan az pensiya alan təqaüdçünün aldıqlarını 25 faiz artıranda axı, bu, qəpik-quruş eləyir. Fərq burasındadır. Maaşları, pensiyaları 400-500 dollara, alimin, professorun maaşını heç olmasa 1000 dollara çatdırmış olsaydılar, indiki 25 faizlik artımın bir xeyri, təsiri olardı. Benzinin qiymətini 60 qəpiyə qaldırıb deyirlər ki, dünya bazarında belədir. Əvvəla, Amerikada benzinin qiyməti Azərbaycandan ucuzdur. İkincisi, Azərbaycanda işləyən insanın bir ayda qazandığını, Amerikada bir günə qazanırlar. Bunları nə cür müqayisə eləmək olar? Sən dünya standartlarına uyğunlaşmaq istəyirsənsə, qiymətlərlə yanaşı, maaşları da uyğunlaşdır, camaatı işlə təmin elə, pensiyaları, tələbələrin təqaüdlərini, işləyə bilməyənlərin müavinətlərini qaldır. Ondan sonra de ki, mən dünya standartları ilə iş görürəm.

Əzizlərim, biz bu gün seçki, hakimiyyət davası eləmirik, heç bir siyasi şüar irəli sürmürük. Bu gün bizim bir şüarımız var - “İşıq, su, qaz - belə bahalıq olmaz!” (Aksiya iştirakçıları “İs-te-fa!” hayqırmağa başladı).

Mənim əziz bacılarım və qardaşlarım! Mən sizinlə hər zaman açıq danışmışam. Biz mitinq üçün müraciət edəndə dedik ki, aksiyaya təqribən 10 min adam yığışacaq. Bu gün bura təqribən elə o qədər insan toplaşıb, bir qədər çox, ya az ola bilər, say üstündə dava eləmirik. Ancaq mən sizə açıq deyim ki, 10 min adamın “istefa” qışqırmasıyla bu hakimiyyət istefaya getməyəcək. Əgər biz bu hakimiyyəti dəyişmək istəyiriksə, yüz minlərlə insan meydanlara yığılmalıdır. Əgər biz bu hakimiyyəti xalqa zidd, cinayətkar siyasətdən çəkindirmək istəyiriksə, on minlər, yüz minlər meydanlara yığışmalıdır. Bu hakimiyyət qiymətləri yenə artırmağa hazırlaşır. Əgər müqavimət olmasa, bizlər öz hüquqlarımızı müdafiə eləməsək, bunlar dayanmayacaqlar. Bir-iki aya qazın, başqa məhsulların da qiymətini artırmaq fikrindədirlər. Bunun qarşısını yalnız xalqın müqaviməti ala bilər. Ona görə də biz bir daha bütün xalqımızı öz haqlarını müdafiə eləməyə çağırırıq. Bütün siyasi qüvvələri, ictimai təşkilatları, özünə hörmət eləyən insanları, hamını müqavimətə, öz hüquqları uğrunda mübarizəyə çağırırıq. Yalnız bizim birgə mübarizəmizlə bu hakimiyyətin cinayətkar siyasətini dayandırmaq, onları susdurmaq, xalqla hesablaşmağa məcbur eləmək mümkün olacaq. Mən sizləri bu mübarizəyə çağırıram. Müsavat Partiyası bu hərəkatı davam elətdirəcək. Bir günlə, bir mitinqlə məsələ həll olunmur. Mübarizə davam edəcək. Mübarizə təkcə bu, gözəl Ukrayna meydanında yox, Bakının bütün meydanlarında aparılacaq. Bilsinlər, bizim Azadlıq meydanına çıxan günümüz də olacaq, bilsinlər bunu!
Biz vəziyyəti ölçüb-biçib yaxın günlərdə növbəti mitinqimizin vaxtını elan edəcəyik. Yenə də sizlərin hamınızı bu mitinqə dəvət eləyəcəyik. Gələn dəfə artıq siz dostlarınızı, qonşularınızı, bu bahalıqdan əziyyət çəkən, buna etiraz eləmək istəyən bütün insanları da bura dəvət eləməlisiniz. Daha möhtəşəm, daha güclü etiraz tədbirləri ilə biz bu hakimiyyəti yerində oturtmalıyıq və oturdacayıq!

Eşq olsun sizlərə!
Yaşasın Müstəqil, Demokratik, Bütöv, Firavan Azərbaycan!
Tanrı Azərbaycanımızı qorusun!
Tanrı sizləri qorusun!

Müsavat Partiyasının 28 YANVAR 2007-ci ildə keçirdiyi yürüş-mitinqin qətnaməsi

Hökumətin enerji daşıyıcılarının və digər kommunal xidmətlərin qiymətlərinin birdən-birə kəskin şəkildə artırmaq haqqında qərarı ölkədə sosial-iqtisadi durumu gərginləşdirib, əhalinin əksər təbəqələrinin, xüsusən də aztəminatlı ailələrin vəziyyətini daha da pisləşdirib. Hakimiyyət dairələri, xüsusilə də ölkə başçısı yol verdikləri səhvi düzəltmək əvəzinə nümayişkaranə surətdə, onsuz da, psixoloji durumu gərgin olan xalqı hövsələdən çıxaran uğursuz və səviyyəsiz bəyanatlar verir, ölkədə gərgin olan ab-havanı bir az da gərginləşdirirlər. Bütün bunlar bir daha təsdiq edir ki, “sürətli iqtisadi inkişaf”, “xalqın gündən-günə artan rifahı” haqqında söylənilən nağıllar sabun köpüyü kimi dağılmaqda, hökumətin iqtisadi siyasətinin iflasa uğradığını əyani surətdə təsdiq etməkdədir. Üstəlik korrupsiya və rüşvətin çiçəklənməsi, aydın surətdə nəzərə çarpan özbaşınalıq və anarxiya mühiti, məmur özbaşınalığı və qanunlara hörmətsizlik təkcə xalqın həyat səviyyəsi baxımından yox, həmçinin sahibkarlıq sahəsində də vəziyyəti xeyli dramatikləşdirir. Nəticə etibarı ilə vətəndaşların bu iqtidarın səriştəsiz siyasətinə, ölkə əhalisinə sayğısızlığına etirazları günbəgün genişlənir.

Müsavat Partiyası hesab edir ki, indiki şəraitdə xalqın bütün təbəqələri hakimiyyətin bütün özbaşınalıqlarına qarşı səfərbər olmalı, öz hüquqları uğrunda ardıcıl mübarizəyə qalxmalıdır. Yalnız belə bir şəraitdə ölkədə hökm sürən dərəbəyliyin və qanunazidd hərəkətlərin qarşısını almaq və ölkədəki vəziyyəti normallaşdırmaq mümkündür. Partiya əmindir ki, xalqımız bu anormal hakimiyyətin şıltaqlıqlarına dözməyəcək, onu öz yerində oturtmaq üçün daha geniş birlik və həmrəylik nümayiş etdirərək mübarizəni davam etdirəcək.

Müsavat Partiyasının 28 yanvar 2007-ci ildə keçirdiyi mitinqin iştirakçıları hakimiyyətin iqtisadi cəhətdən əsaslandırılması mümkün olmayan absurd siyasətini kəskin surətdə pisləyərək tələb edir:

• geniş xalq kütlələrinin maraqlarına cavab verməyən bu məsuliyyətsiz qərarlar dərhal ləğv edilsin;
• əhalinin aztəminatlı təbəqələrinin sosial vəziyyətini yaxşılaşdırmaq üçün ciddi tədbirlər həyata keçirilsin, əmək haqları, pensiya, müavinət və digər xarakterli yardımlar ciddi surətdə artırılsın;
• korrupsiya və rüşvətxorluğa, inhisarçılığa, məmur özbaşınalığına qarşı sərt tədbirlər görülsün;
• neft və digər büdcə gəlirləri və onların xərclənməsi üzərində həqiqi ictimai nəzarət və şəffaflıq təmin edilsin, bu gəlirlərdən səmərəsiz istifadəyə son qoyulsun.

Müsavat Partiyasının mətbuat xidməti, 28 yanvar 2007-ci il