Müsavat Partiyası Məclisinin növbəti toplantısı keçirilib

İyunun 29-da Müsavat Partiyası Məclisinin növbəti toplantısı keçirilib. Öncə yeni seçilmiş rayon təşkilatları sədrlərinin məclis üzvü səlahiyyətləri təsdiq edilib. Sonra Məclisin komissiyalarının hesabatları dinlənildi. “Qarabağ” komissiyasının sədri Qalabəy Ağalar və İnsan Haqları komissiyasının sədri Məmməd Zeynallı rəhbərlik etdiyi komissiyaların fəaliyyəti barədə məlumat verib və məclis üzvlərinin suallarını cavablandırıblar.

Daha sonra ölkədəki ictimai-siyasi vəziyyət və partiyanın qarşısında dayanan vəzifələr müzakirə olunub. Bununla bağlı Müsavat Partiyasının başqanı İsa Qəmbər məruzə edib.

Başqan çıxışına “Müsavat Məclisində təsadüfi adamlar yoxdur” fikrini səsləndirməklə başladı: “Müsavatın rəhbərliyində tarixin sınaqlarından keçmiş, özünü təsdiqləmiş insanlar cəmləşib. Ona görə də bu insanlar bir-birinə qarşı maksimum diqqətli, qayğıkeş olmalıdırlar. Bir-birinin üzərində qalib gəlməyə çalışmağa ehtiyac yoxdur. Bir-birinin qədrini bilmək çağırışını yada salıram”.
O, ötən üç ay ərzində Azərbaycanda qeyri-adi proseslərin getmədiyini bildirdi: “Hər şey əvvəlki qaydada davam edir. Ən diqqəti cəlb edən məsələ qəzetlərə, mətbuat azadlığına qarşı hücumlar, hazırda 7 jurnalistin həbsdə saxlanmasıdır. Bu məsələ Müsavatın gündəliyindədir. Həm jurnalistlərin azad olunması, həm də ölkədə söz azadlığının sərhədlərinin genişləndirilməsi istiqamətində əlimizdən gələni edirik. İkinci uzun müddətdir davam edən proses hakimiyyətlə xalq arasında uçurumun dərinləşməsidir. Bu proses də çox sürətlə davam edir. Üçüncü proses hakimiyyətin öz daxilində gedən proseslərdir. Bu proses çox ciddi şəkildə davam edir. Hakimiyyətdaxili ziddiyyətlər artıq antaqonist ziddiyyətlərə çevrilib. Bu ziddiyyətləri təmsil edən qrupların barışdırılması qeyri-mümkündür. Bu vəziyyət isə Azərbaycanın idarəedilməsinə də dəhşətli mənfi təsir göstərir.

Əliyev rejiminin ölkə və beynəlxalq miqyasda nüfuzdan düşməsi prosesi də sürətlə davam edir. Son dövrlər diqqəti cəlb edən bir neçə hadisə baş verib. Biri Rusiya prezidentinin Corc Buşa Qəbələ RLS-dən birgə istifadə ilə bağlı təklifi, digəri isə Azərbaycanın bir qrup kifayət qədər yüksək rəsmi vəzifə tutan ziyalılarının Dağlıq Qarabağa və Ermənistana səfəri ilə bağlı məsələdir. Birinci məsələ ilə əlaqədar partiyamızın Divanı rəsmi münasibət bildirib. Qəbələ RLS Azərbaycana ziyanı xeyirindən çox olan obyektdir. Biz hər zaman onun ləğvini tələb etmişik. Eyni zamanda mövqeyimiz belədir ki, əgər Putinin təklifi ətrafında ciddi danışıqlar başlansa, Azərbaycan da RLS-in sahibi kimi danışıqlarda tərəf olmalıdır.

Ziyalıların Qarabağ və Ermənistan səfərinə gəlincə, bu gün hakimiyyət, İlham Əliyev çox sərt bəyanatlar verir. Bu bəyanatlarda müharibə sözü sülh danışıqlarından bəzən çox səslənir. Ancaq birdən-birə Azərbaycanın Rusiyadakı səfiri bir qrup ziyalı ilə Xankəndidə separatçı rejimin rəhbəri ilə onun iqamətgahında görüşür. Bu səfər İlham Əliyevin həmin o sərt bəyanatları ilə uyğun gəlmir. Biz hakimiyyətdən izahat tələb etməliyik. Tənqidimiz də Əliyev rejiminə yönəlməlidir. Səfərdə iştirak edən soydaşlarımızı da tənqid edə bilərik. Ancaq onları xain, vətənin düşməni adlandırmaq doğru deyil. Əvvəla Polad Bülbüloğlu, Kamal Abdulla və Fərhad Bədəlbəyli kifayət qədər sayılıb-seçilən ziyalılardır, hərəsinin öz sahəsində uğurları var. Bir qayda olaraq özlərinə hörmət qoyan adamlardılar. Heç birimiz iddia edə bilmərik ki, onların hər üçü Qarabağı bizdən və ya başqa azərbaycanlılardan az sevirlər. Hədəf Azərbaycan hakimiyyəti olmalıdır. Bu kontekstdə İlham Əliyevin komandası ilə birgə istefası tələbi də tam haqlı tələbdir".

İsa Qəmbər yayın istisi olsa da Müsavatın bütün strukturlarının işləməkdə davam etdiyini dedi: “Həlledici qərarlarımızı bu ilin sonlarında qəbul edəcəyik. Çox ciddi qərarlar qəbul etmək ərəfəsindəyik. Biz ölkədə vəziyyəti dəyişib problemləri həll etmək istəyiriksə, deməli nədənsə başlamalıyıq. Bizim hələlik anlaşa biləcəyimiz yeganə qüvvə xalqdır. Xalqı özünə inandırmağı bacarmalıyıq. Xalq hiss etməlidir ki, onlarla bir yerdəyik. Məsələn, Azərbaycandakı müəllim və ya həkim ordusu Müsavatın müttəfiqi olarsa, bu bəlkə də bütün partiyalardan üstün bir qüvvədir. Məncə, biz yaxın dövrlərdə ziyalı, müəllim, həkim, mühəndis, qaçqınlar kateqoriyası ilə yanaşı, kiçik və orta sahibkarlıqla məşğul olan təbəqələrə diqqətimizi artırmalıyıq. Çünki bu gün onlar çox ciddi yaşamaq mücadiləsi aparırlar. İş adamlarına qarşı soyğunçuluq siyasəti aparılır. Bir tərəfdən Vergilər, bir tərəfdən Fövqəladə Hallar Nazirliyi, bir tərəfdən Gömrük, bir tərəfdən hüquq-mühafizə orqanları halal iş qurmaq istəyən adamları qul kimi rejimə işlətmək siyasəti həyata keçirir”.

Müsavat başqanı sonda 2008-ci ilə ciddi hazırlaşmaq lazım olduğunu dedi: “Tam əminliklə deyirəm ki, 2008-ci ildə bu hakimiyyətə qalib gəlmək imkanları 2003-dən az olmayacaq. Bəlkə də çox olacaq. Bu şansları cəmiyyətin və bizim necə dəyərləndirəcəyimiz isə artıq bizlərdən asılıdır”.

Məruzə ətrafında geniş müzakirələr olub və müvafiq qərarlar qəbul edilib. Məclis partiyanın demokratiyanın müdafiəsi sahəsində əsas prioritetləri barədə qərar qəbul edib. Bundan əlavə Azərbaycan Xalq Cümhuriyyətinin 90 illiyini və mərhum prezidənt Əbülfəz Elçibəyin 70 illiyini yüksək səviyyədə keçirməsi ilə bağlı da qərarlar qəbul olunub. 2008-ci il Xalq Cümhuriyyəti ili elan olunub. Məclis Azərbaycan və Ermənistan Respublikalarının Rusiya Federasiyasındakı səfirlarinin təşəbbüsü və ATƏT-in xətti ilə hər iki ölkənin ictimaiyyət nümayəndələrinin qarşılıqlı səfərləri barədə bəyanat qəbul edib (Bəyanatın mətni aşağıda tam dərc edilib).

Axırda cari məsələlərə toxunulub.

Müsavat Partiyası Məclisinin Bəyanatı

28 iyun 2007-ci il tarixdə Azərbaycan və Ermənistan Respublikasının Rusiya Federasiyasındakı səfirlərinin təşəbbüsü və ATƏT-in xətti ilə hər iki ölkənin ictimaiyyət nümayəndələrinin bir gün ərzində baş tutan qarşılıqlı səfərləri Azərbaycan cəmiyyətində birmənalı qarşılanmayıb.

Azərbaycan respublikasını təmsil edən səfirin başçılıq etdiyi nümayəndə heyətinin işğal zonasına və düşmən Ermənistana səfəri dövlət başçısının xəbəri və dəstəyi olmadan baş tuta bilməzdi. Bu səfərin qısa zamanda və yüksək səviyyədə baş tutması, Ermənistan nümayəndə heyətinin Azərbaycanda İ. Əliyev tərəfindən qəbul edilməsi də bu fikri təsdiq edir. Azərbaycan cəmiyyəti üçün gözlənilməz olan bu səfərlərin təşkili və yüksək səviyyədə qəbullar İ. Əliyevin son zamanlarda sərtləşən siyasi ritorikası ilə uyğun gəlməməklə bərabər Azərbaycanın ardıcıl xarici siyasətinin və Ermənistan-Azərbaycan konfliktinin həlli ilə bağlı konsepsiyasının olmadığını bir daha göstərir.

Azərbaycan Respublikasının Rusiyadakı səfiri rəsmi şəxsdir və onun başçılıq etdiyi nümayəndə heyətinin işğal zonasında yaradılan oyuncaq hərbi-polis rejiminin hərbi cinayətlərdə ittiham olunan başçısı ilə görüşməsi bu rejimin tanınması və legitimləşdirilməsi istiqamətində atılan addım kimi dəyərləndirilməlidir. Azərbaycan tərəfindən hərtərəfli düşünülmədən atılan bu addımın ölkəmizin bu qondarma, oyuncaq rejimin beynəlxalq aləmdə izolyasiyası üçün apardığı siyasi-diplomatik iş üçün də ciddi problemlər yaradacağı qaçılmazdır. Oyuncaq Dağlıq Qarabağ rejimi ilə rəsmi kontaktlar quran Azərbaycan hökuməti artıq heç bir xarici ölkəni bu tip kontaktlardan qaçmağa çağıra bilməyəcək və bu rejimin beynəlxalq siyasi-diplomatik izolyasiyadan çıxmasının qarşısını ala bilməyəcəkdir.

Müsavat Partiyasının Məclisi Azərbaycan-Ermənistan konfliktinin dinc yolla həllini tərəfdarı olduğunu və danışıqların resurslarının hələ bitmədiyini bir daha bəyan etməklə bərabər, Azərbaycan Respublikasının dövlət başçısı İ. Əliyevi ardıcıl xarici siyasət aparmağa, nəticələri öncədən hərtərəfli düşünülməmiş addımlar atmaqdan çəkinməyə və konfliktin həli ilə bağlı yeni yanaşması varsa bu barədə ictimaiyyətə açıqlama verməyə çağırır.

Bakı şəhəri, 30 iyun 2007-ci il