Müsavat Partiyası Divanının növbəti toplantısı olub

Bu gün Müsavat Partiyasının Divanının növbəti toplantısı olub. Toplantıda Qərarların icra vəziyyəti və görülən işlərə baxıldıqdan sonra partiyadaxili məsələlər ətrafında fikir mübadiləsi aparılıb. Sonra Müsavatın 29 aprel 2007-ci il tarixli yürüş-mitinqinin nəticələri müzakirə edilib. Mayın 27-də növbəti mitinqin keçirilməsi ilə bağlı qərar qəbul edilib. Daha sonra son vaxtlar PKK-çıların və onların himayə etdiyi şəxslərin ölkəmizə köçürülməsi ilə bağlı məsələ müzakirə edilib və bununla bağlı bəyanat qəbul olunub ( Bəyanatın mətni aşağıda tam şəkildə verilir).

Axırda cari məsələlərə baxılıb.

Müsavat Partiyasının Bəyanatı

Azərbaycan milli müstəqilliyini bərpa etdikdən sonra ona dost olmayan ölkələr və güclər dövlətimizin müstəqilliyi, ərazi bütövlüyü və suverernliyini təhlükə altına almağa və təhdid etməyə, ölkəmiz üçün müxtəlif süni problemlər yaratmağa başladılar. Azərbaycanın enerji ehtiyatlarını beynəlxalq şirkətlərlə birgə istismara başlaması, Rusiya və İrandan yan keçməklə alternativ yollarla dünya bazarlarına çıxarması, NATO ilə tərəfdaşlığı gücləndirməsi, AB-nin yaxın qonşuluq siyasətinə cəlb olunması ─ beləliklə bir dövlət olaraq möhkəmlənməyə və beynəlxalq münasibətlər sistemində öz layiqli yerini tutmağa başlaması bu xarici güclərin narahatlığını daha da artırır.
Azərbaycanın ən böyük mövcud problemi davakar erməni etnik separatizmi və ərazilərimizin bir hissəsinin işğal altında olmasıdır. Bu problemi yaradan və arxasında duran qüvvələr müxtəlif dövrlərdə ölkəmizdə yaşayan digər etnik qrupları da separatizmə təhrik etmiş, separatçı qüvvələrin əliylə Azərbaycanda kütləvi insan itgisi ilə nəticələnən terror hadisələri törətmiş və bu gün də nəinki bu niyyətlərindən əl çəkməmişlər, əksinə milli maraqlarımızı təhdid edən yeni problemlər yaratmaq niyyətindədirlər.

Azərbaycanda stabilliyin yaranmasında maraqlı olmayan bu güclər 90-cı illərin əvvəlindən başlayaraq ölkəmizdə PKK terror təşkilatının şəbəkəsini qurmağa başlamışlar. Bu barədə dünya və ölkə mətbuatında çox saylı məlumatlar getməsinə baxmayaraq bu günə kimi nəinki bu terror təşkilatına qarşı təsirli tədbirlər görülməmiş, əksinə PKK ölkəmizdə daha da güclənmişdir. PKK lideri Abdulla Öcalan məhkəmə prosesində verdiyi ifadədə ən güclü dayaqlarından birinin məhz Azərbaycan olduğunu təsdiq etmişdir. Bunun başlıca səbəblərindən biri də PKK-nın ölkəmizdə yüksək səviyyədə dəstəklənməsidir. Heç təsadüfi deyildir ki, PKK ABŞ və AB tərəfindən terrorist bir təşkilat kimi tanındığı və ona qarşı mübarizə aparıldığı bir halda Türkiyəyə qardaş deyən Azərbaycanda bu təşkilat nəinki terrorist bir təşkilat kimi tanınmır və ona qarşı mübarizə aparılmır, əksinə son zanmanlarda daha da güclənməyə başlamışdır.

Son dövrlər Türkiyə, İran və Rusiya üzərindən PKK-çıların və onların nəzarətində olan kürdlərin kütləvi şəkildə ölkəmizə maneəsiz daxil olması, əsasən ticarət, tikinti şəbəkələrində və bəzi müəssisələrdə yerləşdirilməsi hər bir Azərbaycan vətəndaşı kimi bizi də narahat etməyə bilməz. Bu prosesin Ermənistan-Azərbaycan münaqişəsınin həlli üçün aparılan danışıqların kritik dönəmə girdiyi, İranın nüvə proqramı ətrafında böhranın dərinləşdiyi və Azərbaycanın strateji seçim zamanının çatdığı bir dövrə təsadüf etməsi narahatçılığımızı daha da artırır. Azərbaycanın pozitiv strateji inkişafını, ABŞ, NATO və AB ilə münasibətlərinin keyfiyyətcə yeni mərhələyə keçməyə başlamasını öz geopolitik və geostrateji maraqları üçün potensial təhdid hesab edən xarici qüvvələr bu prosesi sürətləndirməklə ölkəmizdə bir tərəfdən süni miqrasiya problemi, yeni potensial etnik qarşıdurma zəmini hazırlamaq, digər tərəfdən də yeni qüvvələrinin ölkəmizə gətirilməsi ilə daha da güclənən PKK vasitəsilə ölkəmizin ictimai-siyasi sabitliyini təhdid edəcək, hər zaman hərəkətə keçməyə hazır, inkişaf etmiş terror potensialı yaratmaq niyyətindədirlər.

Müsavat Partiyası son zamanlar daha da güclənən bu prosesi milli maraqlarımıza ciddi təhdid kimi dəyərləndirir və onun arxasında duran dövlətlərdən və güclərdən Azərbaycan xalqına qarşı dost olmayan bu hərəkətləri durdurmağı tələb edir.

Biz, eyni zamanda Azərbaycan hökumətini gec də olsa PKK-nı terror təşkilatı kimi tanımağa və onunla mübarizə aparmağa, Azərbaycan vətəndaşı olmayan şəxslərin Türkiyə və İran üzərəindən kütləvi şəkildə ölkəmizə gətirilməsinin qarşısını almağa, artıq ölkəmizdə yerləşdirilənləri isə həmən deportasiya etməyə, bütün Azərbaycan vətəndaşlarını isə ölkəmizin inkişafının tarixi bir mərhələsində vətəndaş aktivliyi və sayıqlığı göstərməyə, xüsusən də yüz illərdir bizimlə çiyin-çiyinə yaşayan kürdəsilli soydaşlarımızı gözlənilən təhriklərə uymamağa, bir olan vətənimiz naminə birlik və bərabərliyimizi qorumağa çağırırıq.

Müsavat Partiyasının Mətbuat Xidməti, 30.04.2007