Müsavat Partiyasının bəyanatı

Bu gün Ağır Cinayətlərə Dair İşlər Üzrə Məhkəmədə “Realnıy Azerbaydjan” və “Gündəlik Azərbaycan” qəzetlərinin baş redaktoru Eynulla Fətullayevə 8 il yarım həbs cəzası verilib. Başdan ayağa saxtakarlıqdan ibarət olan bu məhkəmə prosesində jurnalist terrorçuluqda, vergidən yayınmada və digər absurd ittihamlarla təqsirli bilinib. Əslində isə o, öz yazılarına və müxalif siyasi mövqeyinə, hakimiyyət, onun ən yüksək eşalonunda təmsil olunan adamlar haqqındakı tənqidi fikirlərinə görə məhkum edilib. Məhkəmənin gedişi, irəli sürülən ittihamların mahiyyəti açıq-aydın göstərirdi ki, ən yüksək dairələrdən siyasi sifariş verilib və hakim bu siyasi sifarişi can-başla yerinə yetirməyə çalışır. Əslində bu məhkəmə prosesi dünyada indiyə kimi keçirilmiş ən absurd məhkəmə proseslərindən biri kimi tarixə düşəcək.

Müsavat Partiyası bu hökmü Azərbaycanda söz və mətbuat azadlığına qarşı yönəlmiş növbəti bir repressiya faktı kimi qiymətləndirir və qeyd edir ki, əslində hakimiyyətin məqsədi jurnalistlərdən tənqidi fikirlərinə görə intiqam almaqdan ibarətdir. Odur ki, Müsavat Partiyası bu qanunsuz hökmün dərhal ləğv edilməsini, Eynulla Fətullayevin, eləcə də saxta ittihamlarla həbsdə yatan digər jurnalistlərin dərhal azadlığa buraxılmasını tələb edir.

isagambar.az, 30 oktyabr 2007-ci il, Bakı