Bu gün böyük öndər M.Ə. Rəsulzadənin doğum günüdür

Müsavat Partiyası bu münasibətlə onun Novxanıdaki heykəlinin önündə tədbir keçirib. Partiya rəhbərlərinin və fəallarının, deputatların, ziyalıların, digər siyasi partiyaların təmsilçilərinin qatıldığı tədbiri giriş sözü ilə Müsavat Partiyasının məclis üzvü Nəsiman Yaqublu açıb. O, M.Ə. Rəsulzadənin həyat və fəaliyyəti barədə danışıb. Sonra millət vəkili Pənah Hüseyn, KXCP sədri Mirmahmud Mirəli-oğlu, tanınmış şair Teyyub Qurban, böyük öndərin nəvəsi Rəis Rəsulzadə çıxış edərək Rəsulzadə haqqında fikirlərini bildiriblər. Sonda söz Müsavat Partiyasının başqanı İsa Qəmbərə verilib. O, Azərbaycan ictimai-siyasi fikir tarixinin nəhəng siması olan M.Ə. Rəsulzadənin keçdiyi həyat və mübarizə yolu haqqında danışıb. İsa Qəmbər deyib ki, M.Ə. Rəsulzadə Azərbaycanın istiqlal və azadlıq mücahidi olub. Biz böyük öndərin siyasi və mənəvi varisləri kimi onun müstəqil, azad və firavan Azərbaycan ideallarının gerçəkləşməsi uğrunda sonadək mübarizə aparmalı və buna nail olmalıyıq.

Axırda tədbir iştirakçıları M.Ə.Rəsulzadənin Novxanı qəbristanlığında uyuyan yaxınlarının qəbirlərini ziyarət ediblər.

Müsavat Partiyasının mətbuat xidməti, 31 yanvar 2006-cı il