İsa Qəmbər xalqı mitinqə çağırdı

"Cəmiyyət öz taleyinə sahib çıxmalıdır"

Müsavat Partiyası 18 mart aksiyasının şüarları sırasına vətəndaşların komunal borclarının silinməsi tələbini daxil edib". Sabah bahalaşma əleyhinə yürüş-mitinq keçiriləcək. Aksiya saat 15-dən 17-dək metronun həzi Aslanov stansiyası - Ukrayna meydanı marşrutu üzrə baş tutacaq. Etiraz nümayişinin təşkilatçısı olan Müsavat Partiyasının başqa İsa Qəmbər bununla bağlı mətbuat konfransı keçirdi. Enerjidaşıyıcıları və kommunal xidmətlərin qaldırılmasına qarşı etiraz hərəkatına yanvar ayından başladıqlarını qeyd edən başqan sabahkı tədbirin böyük önəm daşıyacağını vuğruladı. hamını aksiyada iştiraka çağıran İsa bəy həmçinin bu hərəkatı zəruri edən amillərdən danışdı: "hesab edirik ki, xalqın qiymət artımına etiraz etməyə bütün cəhətlərdən haqqı var. Çünki bahalaşma heç bir ciddi iqtisadi əsaslandırma olmadan, planlaşdırılmadan, savadsız şəkildə həyata keçirilib. Əslinə qalsa, bu, ölkənin problemlərini onsuz da pis vəziyyətdə yaşayan xalqın üzərinə qoymaq cəhdindən başqa bir şey deyil. Qiymət artımı qərarının verilməsinin üç səbəbdən qaynaqlandığını bildirmişdik. Birinci səbəb hakimiyyətin savadsızlığı, ikincisi mövcud rejimin korrupsiyaya uğraması, nəhayət üçüncüsü, xalqa biganə, sayğısız yanaşmasıdır". İ.Qəmbər ötən müddət ərzində qiymət artımı barədə qərarın verilməsinin səbəblərinə dair söylənilənlərin təsdiqini tapdığını bildirdi. Qeyd etdi ki, 2007-ci ilin dövlət büdcəsinə yaxın zamanlarda yenidən baxılması və bir sıra parametrlərin dəyişdiriliməsi ilə bağlı səsləndirilən fikirlər hakimiyyətin savadsızlığını əks etdirən faktlardandır: "2006-cı ilin sonunda 2007-ci il üçün dövlət büdcəsi qəbul edildi. İndi deyirlər ki, yaxın aylar ərzində büdcəyə yenidən baxılmalı bir sıra parametrlər dəyişdirilməlidir. Bunu da belə əsaslandırırlar ki, qiymətlərin, o cümlədən maaş və müavinatların artırılması ilə büdcənin gəlir-xərc hissəsində fərqlər yaranıb. hakimiyyət məsələyə əvvəlcədən sistemli, elmi yanaşsaydı, bu cür biabrçı vəziyyət yaranmazdı. 2006-cı ilin sonunda büdcə ilə bağlı müzakirələr aparılarkən planlaşdırılan qiymət artımı layihəyə daxil edilməliydi". İ.Qəmbər bahalaşmadan sonra ölkədə istehsalat və ticarətlə məşğul olan müəssisələrin rəqabət gücünü itirdiklərini dedi: "həmin müəsislərin 2007-ci illə bağlı əvvəlcədən nəzərdə tutulan planları, satış müqavilələri var idi. İstehsal etdikləri məhsulun maya dəyərini enerjidaşıyıclarının qiymətini nəzərə almaqla müəyyənləşdirirdilər. Qiymətlərin artmasından sonra məhsulların maya dəyəri də kəskin şəkildə bahalaşıb. Məhsulları əvvəlcədən nəzərdə tutulmuş qiymətlərə satmaq şirkətlər üçün əlverişsiz olub. Bu baxımdan müəssisələrin çoxu işləyə bilmir. Sumqayıtdakı "Azərkimya" şirkəti bu səbəblərdən fəaliyyətini dayandırıb. 10 minə yaxın insan faktiki olaraq işsiz qalıb. Qəribə haldır ki, həmin şirkətin rəhbərliyi, Sumqayıtdan "seçilmiş" iqtidar deputatları bu məsələni qabaratmırdılar. Yalnız Müsavat deputat qrupunun üzvü İkram İsrafilin parlamentdəki çıxışından sonra müvafiq qurumlar problemə diqqət yönəltdilər. hazırda Nazirlər Kabineti müəssislərin fəaliyyətinin bərpası üçün variantlar axtarır. Subsidiyalar, borcların silinməsi haqqında fikirləşirlər. Əgər qiymət artımına görə müəsisələrə subsidiyalar veriləcəkdisə, bahalaşmaya nə ehtiyac var idi? Bundan əlavə əgər hakimiyyət dövlət müəssisələrinin borclarını silməyi düşünürsə, vətəndaşlar niyə əziyyət çəkməlidirlər. Fiziki şəxslərin enerjidaşıyıcılarına olan borcları da silinməlidir. Müsavat Partiyası 18 mart aksiyasının şüarları sırasına vətəndaşların komunal borclarının silinməsi tələbini daxil edib". Qiymət artımının korrupsiya ilə bağlı olduğunu deyən İ.Qəmbər ölkədəki rüşvətxorluqla bağlı ciddi faktların bir qisminin Əli İnsanovun məhkəmə prosesində açıqlandığını söylədi: "Sabiq səhiyyə naziri ölkədəki korrupsiya sistemi ilə bağlı ciddi məqamlara aydınlıq gətirdi. Prosesdə baş verənlər, o cümlədən səsləndirilən fikirlər çox maraqlıdır. Əli İnsanovun bölgələrdə hakimiyyətin tapşırığı ilə məktəblər tikdirməsi, yollar çəkdirməsi, sonradan görülən bu işlərin heydər Əliyev Fondunun adına çıxarılması ilə bağlı etirafları korrupsiya sisteminin nə dərəcədə geniş miqyaslı olduğunu aydın şəkildə ortaya çıxardı. hakimiyyətin ifşası prosesi daha da sürətlənib. Sirus Təbrizlinin Atatürk Mərkəzindəki çıxışı da rejimin mahiyyətini, korrupsioner xarakterini bir daha ortaya çıxardı". İ.Qəmbər hakimiyyətin xalqa biganə, sayğısız münasibətinin qabarıq şəkildə ortada olduğunu dedi və Sirus təbrizlidən sitat gətirdi: "İlham Əliyevə ölkədə qaz, su işıq olmadığını deyirəm, lakin Ramiz Mehdiyev və başqaları prezidentə hər şeyin əla olduğunu bildirirlər. Bu yalanlar nəyə lazımdır". Bu sözləri müxalifət yox, Sirus Təbrizli deyir. S.Təbrizli "bu hakimiyyət kəndlərdə, rayonlarda əkin-biçin əvəzinə heydər Əliyevin heykəllərini qoymaqla məşğul olur" deməklə hakimiyyətin simasını ifşa edir. hakimiyyətin Sirus Təbrizli demişkən, simasız quldurlar tərəfindən idarə olunduğu üzə çıxır. Belə bir hakimiyyətdən xalqa sayğı, diqqət gözləmək təbii ki, əsassızdır". Müsavat başqanı bildirdi ki, ötən müddətdə bahalaşmanın yaradacağı situasiya ilə bağlı müxalifət nümayəndələrinin, ekspertlərin, iqtisadçıların vurğuladığı məqamların təsdiqini tapdığını söylədi: "Məncə, indiki mərhələdə cəmiyyətin fəallaşması öz problemlərinə sahib çıxması mühümdür. Biz quyuya su töküb onu doldura bilmərik. Bu hakimiyyəti savadlandırmaq, iqtidarın korrupsiyaya son qoyması mümkün deyil. Çünki bu hakimiyyət korrupsiya, yalan, zorakılıq üzərində qurulub. Rejimin özbaşına dəyişməsi, yaxşılaşması da mümkünsüzdür. Amma hakimiyyətin xalqa biganə siyasətinə son qoya bilərik. Bunun üçün xalqın ayağa qalxması kifayətdir. hesab edirik ki, bu cür əsassız qiymət artımına, xalqa zidd siyasətə etirazını bildirməklə, cəmiyyət iqtidarı bundan sonrakı qərarlarını on dəfə ölçüb bir dəfə biçməyə məcbur edə bilər. hakimiyyətin xalqa zidd siyasətini dəyişə bilsək, bunun müsbət təsiri cəmiyyətin bütün təbəqələrinə - siyasətçilərə, müəllimlərə, həkimlərə, jurnalistlərə, tələbələrə, fəhlələrə də aid olacaq. Bu, yalnız müxalifətin problemi deyil və Müsavatın ayağa qalxıb təkbaşına məsələni həll edəcəyini düşünmək düzgün yanaşma deyil". Mətbuat konfransında İ.Qəmbər həmçinin media mənsublarını bu məsələlərdə bir qədər diqqətli olmağa çağırdı: "Başqalarından prinsipiallıq gözləyirik. Lakin bəzən özümüz-özümüzə rəva bilirik ki, bir cür yazaq, başqa cür hərəkət edək. Bu ölkənin, xalqın problemləri hamımızın problemləri deyilmi? hakimiyyətin xalqa qarşı cinayətkar münasibətini hər birimiz öz üzərimizdə hiss etmirikmi? Bunları görə-görə yazırlarda mövzuya başqa rənglər verməyə, dolayısı ilə hakimiyyəti zərbə altından çıxarmağa, ictimai diqqəti beşinci dərəcəli məsələlərə yönəltməyə cəhd göstərilməməlidir". Başqan eyni zamanda tədricən daha çox siyasi qüvvənin xırda-para məsələləri kənara qoyub bir araya gəldiyini, bunun müsbət hal olduğunu vurğuladı. Qeyd etdi ki, bunun nəticəsi olaraq 18 mart mitinqində bir sıra siyasi qüvvələrin iştirakı gözlənilir: "KAXCP mitinqin təşkilatçılığında iştirak edir. Digər qüvvələr də bu istiqamətdə bir sıra addımlar atmaqdadır. Proses gedir. Bu prosesi xalqımızın, cəmiyyətimizin köklü maraqları naminə sürətləndirməyə çalışmalıyıq. Bir daha həm sizləri, həm də cəmiyyətimizi öz probleminə sahib çıxmağa, mövqe qoymağa, fəallığa səsləyirəm". Daha sonra İ.Qəmbər jurnalistlərin suallarını cavablandırdı.

- MSK-nın tərkibinin formalaşdırılması ilə bağlı Müsavat Partiyası ilə "Azadlıq" blokunun mövqeyi arasında fərq nədən ibarətdir?

- Bir qədər əvvəl deyəndə ki, mövzuları dəyişməyək, real problemlər üzərinə gedək bu cür məsələləri nəzərdə tuturdum. Seçki komissiyaları ilə bağlı Müsavat Partiyasının mövqeyi neçə illərdir bəllidir. Biz seçki komissiyalarının hakimiyyətin nəzarətindən çıxarılmasını, müstəqil dövlət orqanına çevrilməsini, paritet əsaslarla formalaşdırılmasını tələb edirik. Bu məsələ hələ də aktuallığını ona görə saxlayır ki, Müsavat Partiyası 2005-ci il parlament seçkilərindən sonra hakimiyyətin MSK-da təmsil olunmaq təklifini rədd etdik. Mövzunu mətbuatda fikirayrılığı, guya kiminsə paritet tərəfdarı olması, Müsavatın fərqli mövqe sərgiləməsi kimi təqdim etmək yalnız anlaşılmamazlıq yarada bilər. Bu cür canfəşanlığa, diqqəti köklü məsələdən yayındırmağa ehtiyac yoxdur. heç kəsə bunu məsələhət görmürəm. MSK-nın paritet əsaslarla formalaşdırılmasına hakimiyyət razılıq vermir. Ona görə də mübarizə müxalifətlə iqtidar arasında getməlidir. Yoxsa, bu gün hakimiyyəti buna məcbur etməmiş bəzi partiyalar vurulmamış ayının dərisini bölüşdürməyə keçiblər. Bu, ciddi yanaşma deyil.

- Müsavat Partiyası tərəfindən aksiyaların davam etdirilməsi planlaşdırılırmı?

- Mitinqlər davamlı olacaq.

- Sirus Təbrizli çıxışında mitinqlərə çağırış notları səsləndirdi. Ancaq konkret insanlara Müsavatın mitinqlərində iştirak edin demədi. Sizcə bunun səbəbi nədir?

- Sirus Təbrizlinin çıxışı çox maraqlıdır. Orada xeyli təhlili cəhətlər var. Onun xalqı etiraz etməyə çağırmasının özü diqqətəlayiqdir.

- Əli İnsanov tərəfdarları Müsavatın mitinqində iştirak edəcəkləri barədə qərar veriblər. Bu istiqamətdə onlarla hər hansı danışıqlar aparılırımı?

- hər bir Azərbaycan vətəndaşı aksiyada iştirak edə bilər. Əli İnsanovun hakimiyyət tərəfindən təqib edilməsindən narazı qalan soydaşlarımız həmin aksiyada iştirak etmək istəyirlərsə, onların qərarına hörmətlə yanaşırıq.

- Mətbuatda prezident seçkiləri ilə bağlı müxalifətin koalisiyasının yaradıldığına dair xəbərlər yer almaqdadır. hətta sizin bu məsələ ilə bağlı Etibar Məmmədovla görüşdüyünüz bildirilir...

- Etibar Məmmədovla aramızda heç bir görüş olmayıb. Eyni zamanda Rəsul Quliyevlə danışıqlar aparılmayıb. Bu gün bizi prezident seçkiləri, vahid namizəd kimi uydurma mövzular maraqlandırmır. hazırda bizi maraqlandıran məsələ cəmiyyətin öz taleyinə sahib çıxmasıdır.

Yeni Müsavat qəzeti, 17 mart 2007-ci il,  L.ƏLİYEVA