Müsavat Məclisinin növbəti yığıncağı keçirildi

Bu gün Müsavat Partiyası Məclisinin toplantısı keçirilib. Yeni seçilmiş rayon(şəhər) təşkilatlarının səlahiyyətləri təsdiq olunduqda sonra partiyanın 15 oktyabr 2008-ci il keçiriləcək prezident seçkilərində iştirak edib-etməməklə bağlı məsələ müzakirə edilib. Müsavat Partiyasının başqanı İsa Qəmbər geniş məruzə ilə çıxış edib. Sonra məruzə ətrafında müzakirələr olub. Sonda Müsavat başqanı yekun nitqi söyləyib və Məclis müzakirə edilən məsələ ilə bağlı qərar qəbul edib (qərarın mətni əlavə edilir).

Daha sonra Məclisə boş qalmış yerlərə seçkilər keçirilib.

Axırda cari məsələlərə baxılıb.

isagambar.az, Bakı, 02 avqust 2008-ci il

Müsavat Partiyası Məclisinin 2008-ci il 15 oktyabr prezident seçkiləri barədə qərarı

Müsavat Partiyası 12 oktyabr 2007-ci il tarixdə keçirilən Məclisdə ölkədə keçiriləcək növbəti prezident seçkilərinə öz namizədi ilə qatılmaq haqqında qərar qəbul etmiş, eyni zamanda seçkilərdə iştirakdan imtina edilə biləcəyini də istisna etməmişdi.

Ötən müddət ərzində Müsavat Partiyası ölkədə ictimai-siyasi mühitin canlandırılması, demokratik qüvvələrin inteqrasiyası istiqamətində ciddi addımlar atmış, siyasi partiya və qeyri-hökumət təşkilatlarının nümayəndələri ilə, beynəlxalq təşkilatlarla apardığı məsləhətləşmələrdə, habelə keçirdiyi kütləvi tədbirlərdə seçkilərin mümkün qədər demokratikliyini təmin edilməsi üçün maksimum səy göstərmişdir. Elə hakimiyyətin tam nəzarəti altında olan MSK-ya partiya nümayəndələrinin göndərilməsindən imtina edilməsi də seçki qanunvericiliyində demokratik müxalifətin, beynəlxalq təşkilatların, o cümlədən Venetsiya Komissiyasının təkliflərinin nəzərə alınması naminə edilmişdi.

Cəmiyyətdə hökm sürən xof mühitini dağıtmaq, əhalinin fəallığının artırılması üçün mitinq və digər tədbirlərin keçirilməsinə edilən cəhdlər hakimiyyətin müqaviməti ilə üzləşmiş, repressiv rejim azadlıqların hüdudlarını daha da daraltmışdır. Ölkədə həbs və repressiyaların davam etməsi, üç jurnalistin qondarma ittihamlarla hələ də həbsdə saxlanılması bütün deyilənlərin əyani təcəssümüdür. Seçki Məcəlləsinin daha da mürtəceləşdirilməsi seçkiqabağı mühiti daha da antidemokratik etmiş və seçki prosesinin bütünlüklə hakimiyyətin inhisarına keçməsinə şərait yaratmışdır. Seçki müddətinin və seçkiqabağı təbliğata ayrılan vaxtın yarıbayarı azaldılması faktiki olaraq siyasi partiyalar üçün əlverişsiz şərait yaradıb. KİV, xüsusən də elektron KİV üzərində hakimiyyətin total nəzarəti siyasi müxalifəti öz fikirlərini ictimaiyyətə çatdırmaq imkanlarından məhrum etmişdir.

Elə bunun nəticəsidir ki, hakimiyyətə qarşı ümumxalq narazılıgının maksimum səviyyədə olmasına baxmayaraq, cəmiyyətdə seçkilərə və dinc demokratik yolla hakimiyyət dəyişikliyinin mümkünlüyünə inam ciddi surətdə sarsılıb.

Bütün bunlar ölkədə elan olunmamış Fövqəladə Vəziyyət şəraitinin hökm sürdüyünü sübuta yetirir. Nüfuzlu beynəlxalq müşahidəçilərin rəylərinə görə ölkədə seçkiqabağı demokratik şərait mövcud deyil və belə bir şəraitdə azad və ədalətli seçkilərin keçiriləcəyi ciddi şübhə altındadır.

Müsavat Partiyasının Məclisi 2008-ci il prezident seçkilərində iştirak məsələsini geniş və hərtərəfli müzakirə edərək qərara alır:

- Azərbaycanın milli maraqlarının və demokratik inkişaf perspektivinin qorunub-saxlanmasında və ölkənin bütün demokratik potensialının vahid mövqedə toparlanmasında
Müsavat partiyasının qərarlarının strateji önəm daşıdığını;

- seçkiqabağı mühitin anti-demokratikliyini və bərabər imkanların olmamasını;
- seçki məcəlləsinin daha da mürtəceləşdirilməsini;
- cəmiyyətdə seçkilərə və dinc demokratik yolla hakimiyyət dəyişikliyinin mümkünlüyünə inamın ciddi şəkildə sarsılmasını;
- demokratik qüvvələrin resurs və imkanlarının, eyni zamanda fəaliyyət azadlığının hakim rejim tərəfindən əhəmiyyətli dərəcədə məhdudlaşdırılmasını;
- partiyanın MSK-da iştirak hüququndan seçki komissiyalarının hakimiyyət və müxalifət arasında paritet əsasında qurulması tələbi ilə imtina etdiyini və nəticədə komissiyalarda müxalifətin təmsil olunmadığını nəzərə alaraq

1. 15 oktyabr 2008-ci ildə keçiriləcək prezident seçkisində iştirakdan imtina edilsin.
2. Prezident seçkiləri dövründə təbliğat kampaniyası aparmaq hüququndan istifadə edərək kütləvi aksiyaların və digər tədbirlərin keçirilməsi məqsədəuyğun sayılsın, seçki prosesinin monitorinqi üçün digər siyasi qüvvələr və qeyri-hökumət təşkilatları ilə əməkdaşlıq imkanları araşdırılsın.
3. Xalqın öz taleyinə sahib çıxması, cəmiyyətin fəallaşdırılması, 2009-cu il bələdiyyə və 2010-cu il parlament seçkilərində demokratik qüvvələrin uğur qazanması, ölkədə siyasi vəziyyətin köklü surətdə dəyişdirilməsi naminə avtoritarizmə qarşı mübarizənin geniş cəbhəsinin yaradılması məqsədəuyğun hesab edilsin.

Bakı şəhəri, 02 avqust 2008-ci il