Növbəti toplantı

Bu gün Müsavat Partiyası Divanının növbəti toplantısı keçirilib. Müzakirə zamanı əsas diqqət bu ilin payızında keçiriləcək prezident seçkilərinə yönəlib. Bu yöndə görüləcək işlər haqqında fikir mübadiləsi aparılıb. Ermənistanda keçirilmiş prezident seçkilərinin nəticələri və İrəvanda baş vermiş son hadisələr də nəzərdən keçirilib. Bu qonşu ölkədə seçkilərin nəticələrinin açıq-aşkar saxtalaşdırılmasına və dinc nümayişçilərə qarşı 8 insanın ölümü ilə nəticələnən zorakılığa görə yalnız Koçaryan-Sarkisyan rejimi deyil, beynəlxalq qurumların loyal münasibəti də qınanılıb, baş verənlərdə onların da ən azı mənəvi məsuliyyət daşıdığı vurğulanıb və bu haqda bəyanat qəbul edilib.

Rusiyada keçirilmiş prezident seçkiləri isə bu ölkədə avtoritarizmin möhkəmlənməsinin növbəti mərhələsi və hakimiyyətin varisə ötürülməsi əməliyyatı kimi qiymətləndirilib.

Divan üzvü, professor Adil Qeybullanın hakimiyyətin təzyiqləri nəticəsində çalışdığı özəl tibb müəssisəsindən işdən çıxarılması qətiyyətlə pislənilib.

Daha sonra Kosovanın müstəqilliyi ilə bağlı məsələ müzakirə edilib. Azərbaycanın Kosovanın müstəqilliyini heç vaxt tanımayacağı haqqında verdiyi bəyanat, bu ölkədən əsgərlərimizin çıxarılması qərarı, ümumiyyətlə bu məsələdə Rusiya ilə eyni mövqedən çıxış etməsi strateji baxımdan səhv mövqe hesab edilib.

Yığıncağın sonunda bir sıra cari məsələlərə baxılıb.

isagambar.az, 03 mart 2008-ci il, Bakı